ತಾಯಿ ನಿಧನ ಹಿನ್ನಲೆ ; ಅಂತ್ಯಕ್ರಿಯೆಗಾಗಿ ಬನ್ನಂಜೆ ರಾಜಾ ಉಡುಪಿಗೆ 

Team Udayavani, Aug 26, 2018, 3:28 PM IST

ಉಡುಪಿ: ತಾಯಿಯ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲು ಭೂಗತ ಪಾತಕಿ ಬನ್ನಂಜೆ ರಾಜಾ ಅಲಿಯಾಸ್‌ ರಾಜೇಂದ್ರ ಪ್ರಸಾದ್‌ಗೆ ನ್ಯಾಯಾಲಯ ಅನುಮತಿ ನೀಡಿದೆ. 

ನಾಳೆ ಸೋಮವಾರ ಅಂತ್ಯಕ್ರಿಯೆ ನಡೆಯಲಿದ್ದು ,ಬೆಳಗಾವಿಯ ಹಿಂಡಲಗಾ ಜೈಲಿನಿಂದ ಬೆಳಗ್ಗೆ ಭಾರೀ ಭದ್ರತೆಯೊಂದಿಗೆ ರಾಜಾನನ್ನು ಕರೆ ತರಲಾಗುತ್ತಿದೆ. 

ಉಡುಪಿ ನ್ಯಾಯಾಲಯ ಹಿಂಡಲಗಾ ಜೈಲು ಅಧಿಕಾರಿಗಳಿಗೆ ಮತ್ತು ಉಡುಪಿ ಪೊಲೀಸರಿಗೆ ಸೂಕ್ತ ಭದ್ರತಾ ವ್ಯವಸ್ಥೆ ಕಲ್ಪಿಸುವಂತೆ ಸೂಚನೆ ನೀಡಿದೆ.

ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದ ರಾಜಾ ತಾಯಿ ನಿವೃತ್ತ ಶಿಕ್ಷಕಿ ವಿಲಾಸಿನಿ(78) ಅವರು ಶನಿವಾರ  ಕೊನೆಯುಸಿರೆಳೆದಿದ್ದಾರೆ.  

ಜುಲೈನಲ್ಲಿ  ಭಾರೀ ಪೊಲೀಸ್‌ ಭದ್ರತೆಯೊಂದಿಗೆ  ರಾಜಾನನ್ನು ಕರೆತಂದು ಮಲ್ಪೆ ಸಸಿತೋಟದಲ್ಲಿರುವ ಸ್ವಗೃಹದಲ್ಲಿ   ತಾಯಿಯನ್ನು ನೋಡಲು ಅವಕಾಶ ಮಾಡಿಕೊಡಲಾಗಿತ್ತು.  

ಅಂತ್ಯಕ್ರಿಯೆ ವೇಳೆ ವಿಶೇಷ ಭದ್ರತೆಯನ್ನು ಉಡುಪಿ ಪೊಲೀಸರು ಕೈಗೊಳ್ಳಲಿದ್ದಾರೆ.