ಕೇರಳದಲ್ಲಿ ಮಾಟ-ಮಂತ್ರದ ಕಾರಣಕ್ಕೆ ಮಗಳ ಕೊಲೆ ಮಾಡಿದ ಆರೋಪಿ ಕಾರವಾರದಲ್ಲಿ ಬಂಧನ

Team Udayavani, Apr 20, 2021, 8:54 PM IST

ಕಾರವಾರ: ಕೇರಳದ ಕೊಚ್ಚಿ ನಗರದ ವ್ಯಾಪ್ತಿಯಲ್ಲಿ ಮಾಟ-ಮಂತ್ರದ ಕಾರಣಕ್ಕೆ 13 ವರ್ಷದ ಮಗಳನ್ನೇ ಬಲಿಕೊಟ್ಟು, ನಂತರ ತಲೆ ಮರೆಸಿಕೊಂಡಿದ್ದ ಆರೋಪಿ ಕಾರವಾರದ ಬೀಚ್‌ನಲ್ಲಿ ಅಲೆಯುತ್ತಿದ್ದಾಗ ಕಾರವಾರದ ಬೀಟ್‌ ಹಾಗೂ ಟ್ರಾಫಿಕ್‌ ಪೊಲೀಸರಿಗೆ ಸಿಕ್ಕಿ ಬಿದ್ದಿದ್ದಾನೆ.

ಕೇರಳ ಪೊಲೀಸರಿಗೆ ಬೇಕಾಗಿದ್ದ ಈ ಆರೋಪಿಯನ್ನು ಕರ್ನಾಟಕ ಪೊಲೀಸರ ನೆರವಿನಿಂದ ಕಾರವಾರದಲ್ಲಿ ಬಂಧಿಸಲಾಗಿದೆ. ಕೇರಳದ ಸಾನು ಮೋಹನ್‌ ಬಂಧಿತ ಆರೋಪಿ. ನಲ್ವತ್ತು ವರ್ಷದ ಈತ ಮಾಟ-ಮಂತ್ರದ ಉದ್ದೇಶಕ್ಕಾಗಿ ತನ್ನ ಮಗಳನ್ನೇ ಬಲಿ ನೀಡಿದ್ದ. ಈ ಕೊಲೆ ಮಾ. 20ರಂದು ನಡೆದಿತ್ತು. ಈ ಸಂಬಂಧ ತ್ರಿಕ್ಕಾಕರ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಆದರೆ ಆರೋಪಿ ತಲೆಮರೆಸಿಕೊಂಡಿದ್ದ. ಈತನ ಪತ್ತೆಗಾಗಿ ಕೇರಳ ಪೊಲೀಸರು ಲುಕ್‌ಔಟ್‌ ನೋಟಿಸ್‌ ನೀಡಿದ್ದರು.

ಆರೋಪಿಯ ಮೊಬೈಲ್‌ ಫೋನ್‌ ಕರ್ನಾಟಕದ ಕಾರವಾರದಲ್ಲಿರುವುದು ಗೊತ್ತಾಗಿತ್ತು. ಈ ಜಾಡನ್ನು ಹಿಡಿದ ಕೇರಳದ ಪೊಲೀಸರು ಕಾರವಾರಕ್ಕೆ ಧಾವಿಸಿದ್ದರು. ಇಲ್ಲಿನ ಪೊಲೀಸರ ನೆರವು ಕೋರಿದ್ದರು. ಬಳಿಕ ಕರ್ನಾಟಕ ಹಾಗೂ ಕೇರಳ ಪೊಲೀಸರು ಜಂಟಿ ಕಾರ್ಯಾಚರಣೆ ನಡೆಸಿ ಆರೋಪಿ ಬಂಧಿಸಿದ್ದು, ಈತನನ್ನು ಕೇರಳ ಪೊಲೀಸರಿಗೆ ಸೋಮವಾರ ಬೆಳಗ್ಗೆ ಹಸ್ತಾಂತರಿಸಲಾಗಿದೆ.