ದೆಹಲಿಯಿಂದ ಮಾವನ ಮನೆಗೆ ಬಂದವನಿಗೆ ಸೋಂಕು
Team Udayavani, Jun 17, 2020, 12:46 PM IST
ಮುಂಡಗೋಡ: ದೆಹಲಿಯಿಂದ ಪತ್ನಿಯೊಂದಿಗೆ ಟಿಬೆಟಿಯನ್ ಕ್ಯಾಂಪ್ನಲ್ಲಿನ ಮಾವನ ಮನೆಗೆ ಬಂದಿದ್ದ ಟಿಬೆಟಿಯನ್ ವ್ಯಕ್ತಿಯೊಬ್ಬನಿಗೆ ಕೋವಿಡ್ ಇರುವುದು ಮಂಗಳವಾರ ದೃಢಪಟ್ಟಿದೆ.
ದೆಹಲಿ ಮೂಲದ 30 ವರ್ಷದ ವ್ಯಕ್ತಿಗೆ ಕೋವಿಡ್ ಇರುವುದು ದೃಢಪಟ್ಟಿದ್ದು, ಈತ ಜೂ. 7ರಂದು ತನ್ನ ಪತ್ನಿಯೊಂದಿಗೆ ದೆಹಲಿಯಿಂದ ವಿಮಾನದ ಮೂಲಕ ಬೆಂಗಳೂರಗೆ ಆಗಮಿಸಿ ಅಲ್ಲಿಂದ ಕಾರ್ ಮೂಲಕ ತಾಲೂಕಿನ ಟಿಬೆಟಿಯನ್ ಕ್ಯಾಂಪ್ಗೆ ಆಗಮಿಸಿದ್ದ. ಈ ದಂಪತಿ ಕ್ಯಾಂಪ್ ಆಗಮಿಸಿದಾಗ ಟಿಬೆಟಿಯನ್ ಆಡಳಿತ ಸಮಿತಿಯವರು ಇವರನ್ನು 14 ದಿನಗಳ ಕಾಲ ಕ್ವಾರಂಟೈನ್ ಇಟ್ಟಿದ್ದು, ಜೂ. 10ರಂದು ಗಂಟಲು ದ್ರವ ತೆಗೆದು ಪರೀಕ್ಷೆಗೆ ಕಳುಹಿಸಲಾಗಿತ್ತು. ಇದೀಗ ಪತಿಯ ವರದಿಯಲ್ಲಿ ಕೋವಿಡ್ ಇರುವುದು ದೃಢಪಟ್ಟಿದೆ. ಪತ್ನಿಯ ವರದಿ ಬರುವುದು ಬಾಕಿಯಿದೆ. ಈ ವ್ಯಕ್ತಿಯೊಂದಿಗೆ ಹಾಸ್ಟೆಲ್ನಲ್ಲಿ ಪ್ರಥಮ ಸಂಪರ್ಕದಲ್ಲಿದ್ದ 30 ಜನರು ಹಾಗೂ ಈ ವ್ಯಕ್ತಿಯ ಮಾವನ ಮನೆಯ 10 ಜನರನ್ನು ಹಾಸ್ಟೆಲ್ನಲ್ಲಿ ಕ್ವಾರಂಟೈನ್ ಮಾಡಲಾಗಿದೆ. ಈ ವ್ಯಕ್ತಿಯನ್ನು ಕಾರವಾರ ಕೋವಿಡ್ ಆಸ್ಪತ್ರೆಗೆ ಕಳುಹಿಸಲಾಯಿತು.
ವಿಷಯ ತಿಳಿಯುತ್ತಿದ್ದಂತೆ ತಹಶೀಲ್ದಾರ್ ಶ್ರೀಧರ ಮುಂದಲಮನೆ, ತಾಲೂಕು ಆಸ್ಪತ್ರೆ ಆಡಳಿತ ವೈದ್ಯಾಧಿಕಾರಿ ಡಾ| ಎಚ್.ಎಫ್.ಇಂಗಳೆ, ಟಿಬೆಟಿಯನ್ ಕ್ಯಾಂಪ್ನ ಆಡಳಿತ ಅಧಿಕಾರಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಕೊರೋನಾ ಪಾಸಿಟಿವ್ ಬಂದ ವ್ಯಕ್ತಿಯ ಸಂಚಾರ ಹಾಗೂ ಪ್ರಥಮ ಸಂಪರ್ಕದ ಕುರಿತು ಮಾಹಿತಿ ಸಂಗ್ರಹಿಸಿದರು.