ವಿದ್ಯುತ್‌ ಬಿಲ್‌ ಸರಿಪಡಿಸಿ ಗ್ರಾಹಕರಿಗೆ ನೀಡಲಿದೆ ಜೆಸ್ಕಾಂ

Team Udayavani, May 14, 2020, 4:39 PM IST

ಕಲಬುರಗಿ: ವಿದ್ಯುತ್‌ ಬಿಲ್‌ ಸರಿ ಮಾಡಿ ಗ್ರಾಹಕರಿಗೆ ನೀಡಲಾಗುತ್ತಿದೆ ಎಂದು ಜೆಸ್ಕಾಂ ತಿಳಿಸಿದೆ. ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಕಳೆದ ಏಪ್ರಿಲ್‌ ಮಾಪಕದ ರೀಡಿಂಗ್‌ ತೆಗೆದುಕೊಂಡಿರಲಿಲ್ಲ. ಬದಲಾಗಿ ಹಿಂದಿನ ಮೂರು ತಿಂಗಳ ಸರಾಸರಿ ಆಧರಿಸಿ ಬಿಲ್‌ ನೀಡಲಾಗಿತ್ತು. ಹೀಗಾಗಿ ಮೇ ತಿಂಗಳಿನಲ್ಲಿ ವಾಸ್ತವಿಕ ರೀಡಿಂಗ್‌ ಗಣನೆಗೆ ತೆಗೆದುಕೊಂಡು ಏಪ್ರಿಲ್‌ ತಿಂಗಳಿನ ಸರಾಸರಿ ಬಿಲ್‌ ಪಾವತಿ ಮೊತ್ತ ಕಡಿತಗೊಳಿಸಿ ವಾಸ್ತವಿಕ ಬಿಲ್‌ ಹಾಗು ಸರಾಸರಿ ಬಿಲ್‌ ನ ವ್ಯತ್ಯಾಸ ಸರಿಪಡಿಸಿ ನೀಡಲಾಗುತ್ತಿದೆ ಎಂದು ಕಂಪನಿ ತಿಳಿಸಿದೆ.

ಮಾರ್ಚ್‌ ಮತ್ತು ಏಪ್ರಿಲ್‌ 2020 ವಿದ್ಯುತ್‌ ಬಳಕೆಯ ಎರಡು ತಿಂಗಳ ಬಿಲ್‌ ಒಟ್ಟಿಗೆ ನೀಡಲಾಗಿದೆ. ಕೋವಿಡ್‌-19 ಲಾಕ್‌ಡೌನ್‌ ಸಮಯದಲ್ಲಿ ಬಹುತೇಕ ಜನರು ಮನೆಯಲ್ಲೇ ಇದ್ದರು. ಜತೆಗೆ ವೃತ್ತಿನಿರತರು ಮನೆಯಿಂದಲೇ ತಮ್ಮ ಕರ್ತವ್ಯ ನಿರ್ವಹಿಸಿದ್ದಾರೆ ಹಾಗೂ ಬೇಸಿಗೆ ಆಗಿದ್ದರಿಂದ ಮನೆಯಲ್ಲಿ ಕೆಲವು ಗ್ರಾಹಕರು ಹೆಚ್ಚಿಗೆ ಉಪಯೋಗಿಸಿದ್ದರಿಂದ ವಿದ್ಯುತ್‌ ಬಳಕೆ ಸಾಮಾನ್ಯವಾಗಿ ಹೆಚ್ಚಾಗಿರುತ್ತದೆ.

ಜತೆಗೆ ಬಳಕೆ ಹೆಚ್ಚಾದಂತೆ ಹೆಚ್ಚಿನ ಸ್ಲ್ಯಾಬ್‌ ದರಗಳು ಅನ್ವಯಿಸುವುದರಿಂದ ವಿದ್ಯುತ್‌ ಬಿಲ್ಲು ಹೆಚ್ಚಾಗಿರುತ್ತದೆ. ಕರ್ನಾಟಕ ವಿದ್ಯುತ್‌ ನಿಯಂತ್ರಣ ಆಯೋಗದ ಟ್ಯಾರೀಫ್‌ ಆದೇಶದ ಅನುಸಾರ ಸಾಮಾನ್ಯವಾಗಿ ಒಂದು ವಿದ್ಯುತ್‌ ಬಿಲ್‌ನಲ್ಲಿ ನಿಗದಿತ ಶುಲ್ಕ, ವಿದ್ಯುತ್‌ ಬಳಕೆ ಶುಲ್ಕ ಮತ್ತು ತೆರಿಗೆ ಎಂಬ ಮೂರು ಅಂಶಗಳು ಸೇರಿರುತ್ತವೆ ಎಂದು ಕಂಪನಿ ಪ್ರಕಟಣೆಯಲ್ಲಿ ವಿವರಿಸಲಾಗಿದೆ.