ಬೀದರ್ ನಲ್ಲಿ ಕೋವಿಡ್ ಸೋಂಕಿಗೆ 3 ಸಾವು, 50 ಹೊಸ ಪ್ರಕರಣ ದೃಢ
Team Udayavani, Aug 3, 2020, 8:01 PM IST
ಬೀದರ್: ಜಿಲ್ಲೆಯಲ್ಲಿ ವೇಗವಾಗಿ ಹಬ್ಬುತ್ತಿರುವ ಕೋವಿಡ್ ವೈರಸ್ ನಿಂದ ಸೋಮವಾರ ಮೂವರು ಸಾವನ್ನಪ್ಪಿದ್ದರೆ, 50 ಹೊಸ ಪಾಸಿಟಿವ್ ಪ್ರಕರಣಗಳು ವರದಿಯಾಗಿವೆ.
ಬೀದರ್ ವಿದ್ಯಾನಗರ ಬಡಾವಣೆಯ 86 ವರ್ಷದ ವೃದ್ಧ ರಕ್ತದೊತ್ತಡ ಸೇರಿದಂತೆ ಕೆಮ್ಮು, ಜ್ವರ, ಶಕ್ತಿ ಹೀನತೆ, ತೀವ್ರ ಉಸಿರಾಟದ ತೊಂದರೆಯಿಂದ ಬಳಲಿ ಬ್ರಿಮ್ಸ್ನಲ್ಲಿ ಕೊನೆಯುಸಿರೆಳೆದಿದ್ದರೆ, ಭಾಲ್ಕಿ ಪಟ್ಟಣದ 66 ವರ್ಷದ ಸೋಂಕಿತ ಕೆಮ್ಮು ಉಸಿರಾಟದ ತೊಂದರೆಯಿಂದ ಬಳಲಿ, ಬ್ರಿಮ್ಸ್ನಲ್ಲಿ ಚಿಕಿತ್ಸೆ ಪಲಿಸದೇ ಮೃತಪಟ್ಟರೆ ಮೈಲೂರು ಬಡಾವಣೆಯ 72 ವರ್ಷದ ಮಹಿಳೆಯು ಕಿಡ್ನಿ ಸಮಸ್ಯೆ ಸೇರಿದಂತೆ ಲೋ ಬಿಪಿ, ತೀವ್ರ ಉಸಿರಾಟದ ತೊಂದರೆಯಿಂದ ಸಾವನ್ನಪ್ಪಿದ್ದಾರೆ. ಮೂವರಲ್ಲಿ ಕೊವೀಡ್-19 ದೃಢಪಟ್ಟಿದ್ದು, ಇದರೊಂದಿಗೆ ಜಿಲ್ಲೆಯಲ್ಲಿ ಮೃತರ ಸಂಖ್ಯೆ 82ಕ್ಕೆ ಏರಿಕೆಯಾಗಿದೆ.
ಸೋಮವಾರ ಹೊಸದಾಗಿ ಪತ್ತೆಯಾಗಿರುವ 50 ಪ್ರಕರಣಗಳಲ್ಲಿ ಅತಿ ಹೆಚ್ಚು ಹುಮನಾಬಾದ್ ಮತ್ತು ಚಿಟಗುಪ್ಪ ತಾಲೂಕಿನಲ್ಲಿ ಅತಿ ಹೆಚ್ಚು 28 ಕೇಸ್ ಸೇರಿವೆ. ಇನ್ನುಳಿದಂತೆ ಬೀದರ್ ನಗರ ಹಾಗೂ ತಾಲೂಕಿನ 11, ಔರಾದ್- ಕಮಲನಗರ ತಾಲೂಕಿನ 6 ಕೇಸ್, ಬಸವಕಲ್ಯಾಣ- ಹುಲಸೂರು ತಾಲೂಕಿನ 3 ಹಾಗೂ ಭಾಲ್ಕಿ ತಾಲೂಕಿನಲ್ಲಿ 1 ಕೇಸ್ ದೃಢಗೊಂಡಿವೆ.
ಹೊಸ ಕೇಸ್ಗಳು ಸೇರಿ ಜಿಲ್ಲೆಯಲ್ಲಿ ಈಗ ಸೋಂಕಿತರ ಸಂಖ್ಯೆ 2448 ಆಗಿದೆ. ಇಂದು ಒಂದೇ ದಿನ 90 ಜನ ಸೇರಿ ಇದುವರೆಗೆ 1670 ಸೋಂಕಿತರು ಚಿಕಿತ್ಸೆಯಿಂದ ಗುಣಮುಖರಾಗಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ. ಇನ್ನೂ 692 ಪ್ರಕರಣಗಳು ಸಕ್ರೀಯವಾಗಿವೆ. ಈವರೆಗೆ ಜಿಲ್ಲೆಯ 50,760 ಜನರ ಗಂಟಲು ದ್ರವ ಮಾದರಿ ಪರೀಕ್ಷೆ ನಡೆಸಲಾಗಿದ್ದು, ಈ ಪೈಕಿ 48,083 ಮಂದಿಯದ್ದು ನೆಗೆಟಿವ್ ಬಂದಿದೆ. ಇನ್ನೂ 229 ಜನರ ವರದಿ ಬರವುದು ಬಾಕಿ ಇದೆ.