ಕೋವಿಡ್ ನಿಂದ ಚೇತರಿಸಿದ ಭಾರತೀಯ ಹಾಕಿ ಆಟಗಾರ್ತಿಯರು

Team Udayavani, May 9, 2021, 12:05 AM IST

ಬೆಂಗಳೂರು : ಕೊರೊನಾ ದಿಂದಾಗಿ ಬೆಂಗಳೂರಿನ ಸಾಯ್‌ ಕೇಂದ್ರದಲ್ಲಿ ಕ್ವಾರಂಟೈನ್‌ಗೆ ಒಳಗಾಗಿದ್ದ ಹಾಕಿ ಆಟಗಾರ್ತಿಯರೆಲ್ಲ ಈಗ ಚೇತರಿಸಿಕೊಂಡಿದ್ದಾರೆ.

ನಾಯಕಿ ರಾಣಿ ರಾಮ್‌ಪಾಲ್‌ ಸೇರಿದಂತೆ ಒಟ್ಟು 7 ಆಟಗಾರ್ತಿಯರ ಕೊರೊನಾ ಫ‌ಲಿತಾಂಶ ಪಾಸಿಟಿವ್‌ ಬಂದಿತ್ತು. ಸೋಂಕಿಗೆ ಸಿಲುಕಿದ ಉಳಿದವರೆಂದರೆ ಸವಿತಾ ಪುನಿಯ, ಶರ್ಮಿಳಾ ದೇವಿ, ರಜನಿ, ನವಜೋತ್‌ ಕೌರ್‌, ನವನೀತ್‌ ಕೌರ್‌ ಮತ್ತು ಸುಶೀಲಾ. ಜತೆಗೆ ವೀಡಿಯೋ ವಿಶ್ಲೇಷಕ ಅಮೃತಪ್ರಕಾಶ್‌ ಮತ್ತು ವೈಜ್ಞಾನಿಕ ಸಲಹೆಗಾರ ವೇನ್‌ ಲೊಂಬಾರ್ಡ್‌ ಅವರ ಫ‌ಲಿತಾಂಶವೂ ಪಾಸಿಟಿವ್‌ ಬಂದಿತ್ತು. ಇವರೂ ಚೇತರಿಸಿಕೊಂಡಿದ್ದಾರೆ.

10 ದಿನಗಳ ವಿರಾಮ ಪಡೆದು ಎ. 24ರಂದು ಬೆಂಗಳೂರಿನ ರಾಷ್ಟ್ರೀಯ ಶಿಬಿರಕ್ಕೆ ಆಗಮಿಸಿದಾಗ ನಡೆಸಿದ ಕೋವಿಡ್‌ ಟೆಸ್ಟ್‌ ವೇಳೆ ಇವರೆಲ್ಲರ ಫ‌ಲಿತಾಂಶ ಪಾಸಿಟಿವ್‌ ಬಂದಿತ್ತು.

ರಾಣಿ ಕೃತಜ್ಞತೆ
“ಈ ಸಂದರ್ಭದಲ್ಲಿ ನಮಗೆ ಧೈರ್ಯ ತುಂಬಿದ, ಕಾಳಜಿ ವ್ಯಕ್ತಡಿಸಿದ, ಮಾನಸಿಕವಾಗಿ ಗಟ್ಟಿಗೊಳಿಸಿದ ಎಲ್ಲರಿಗೂ ಕೃತಜ್ಞತೆಗಳು. ನಾನು, ಸಹ ಆಟಗಾರ್ತಿಯರು, ಸಹಾಯಕ ಸಿಬಂದಿಯೆಲ್ಲ ಕೊರೊನಾದಿಂದ ಸಂಪೂರ್ಣವಾಗಿ ಚೇತರಿಸಿಕೊಂಡಿದ್ದೇವೆ. ಎಲ್ಲರೂ ಜತೆಗೂಡಿ ಕೊರೊನಾವನ್ನು ಮಣಿಸೋಣ. ಮಾಸ್ಕ್ ಧರಿಸಿ, ಕೊರೊನಾ ನಿಯಮವನ್ನು ಕಟ್ಟುನಿಟ್ಟಾಗಿ ಪಾಲಿಸಿ, ಸುರಕ್ಷಿತವಾಗಿರಿ…’ ಎಂದು ರಾಣಿ ರಾಮ್‌ಪಾಲ್‌ ಹಾರೈಸಿದ್ದಾರೆ.