ಬಿ ಸ್ಯಾಂಪಲ್‌’ ಫ‌ಲಿತಾಂಶವೂ ಪಾಸಿಟಿವ್‌ : ಸುಮಿತ್‌ ಮಲಿಕ್‌ಗೆ ಎರಡು ವರ್ಷ ನಿಷೇಧ

Team Udayavani, Jul 2, 2021, 11:42 PM IST

ಹೊಸದಿಲ್ಲಿ : ಭಾರತದ ಕುಸ್ತಿಪಟು ಸುಮಿತ್‌ ಮಲಿಕ್‌ ಅವರ ಟೋಕಿಯೊ ಒಲಿಂಪಿಕ್ಸ್‌ ಕನಸು ಛಿದ್ರಗೊಂಡಿದೆ. “ಬಿ ಸ್ಯಾಂಪಲ್‌’ ಫ‌ಲಿತಾಂಶವೂ ಪಾಸಿಟಿವ್‌ ಬಂದ ಕಾರಣ ಅವರಿಗೆ ಯುಡಬ್ಲ್ಯುಡಬ್ಲ್ಯು ಎರಡು ವರ್ಷಗಳ ನಿಷೇಧ ಹೇರಿದೆ.

ಇದನ್ನು ಸ್ವೀಕರಿಸಲು ಅಥವಾ ಪ್ರಶ್ನಿಸಲು ಸುಮಿತ್‌ಗೆ ಒಂದು ವಾರ ಕಾಲಾವಕಾಶ ನೀಡಲಾಗಿದೆ. ತಮ್ಮ ವಕೀಲರೊಂದಿಗೆ ಚರ್ಚಿಸಿ ಮುಂದಿನ ನಿರ್ಧಾರಕ್ಕೆ ಬರಲಾಗುವುದು ಎಂದು ರೋಹrಕ್‌ನಲ್ಲಿರುವ ಸುಮಿತ್‌ ಕುಟುಂಬದ ಮೂಲಗಳಿಂದ ತಿಳಿದು ಬಂದಿದೆ. ಬಲ ಮೊಣಕಾಲಿನ ಸೆಳೆತ ವಾಸಿಯಾಗಲು ಕೇವಲ ನೋವು ನಿವಾರಕಗಳನ್ನಷ್ಟೇ ತೆಗೆದುಕೊಂಡಿದ್ದಾಗಿ ಸುಮಿತ್‌ ಮಲಿಕ್‌ ಹೇಳಿದ್ದಾರೆ.

ಸೋಫಿಯಾದಲ್ಲಿ ತಟ್ಟಿದ ಕಳಂಕ
ಕಳೆದ ತಿಂಗಳ ಸೋಫಿಯಾ ವಿಶ್ವ ಒಲಿಂಪಿಕ್‌ ಕ್ವಾಲಿಫೈಯರ್‌ ವೇಳೆ ನಡೆಸಲಾದ ಡೋಪ್‌ ಟೆಸ್ಟ್‌ನಲ್ಲಿ ಸುಮಿತ್‌ ಮಲಿಕ್‌ಗೆ
ಪಾಸಿಟಿವ್‌ ಕಳಂಕ ತಟ್ಟಿತ್ತು. ಅಂದೇ ಅವರಿಗೆ ತಾತ್ಕಾಲಿಕ ನಿಷೇಧ ಹೇರಲಾಗಿತ್ತು. ಇದೀಗ ಜೂ. 30ರಂದು ನಡೆಸಲಾದ “ಬಿ ಸ್ಯಾಂಪಲ್‌’ ಫ‌ಲಿತಾಂಶವೂ ಪಾಸಿಟಿವ್‌ ಬಂದುದರಿಂದ ನಿಷೇಧವನ್ನು ಖಾಯಂಗೊಳಿಸಲಾಗಿದೆ. ಜೂ. 3ರಿಂದ ಮುಂದಿನೆರಡು ವರ್ಷಗಳ ವರೆಗೆ ಈ ನಿಷೇಧ ಜಾರಿಯಲ್ಲಿರುತ್ತದೆ.

ಸೋಫಿಯಾ ಕೂಟದಲ್ಲಿ ಸುಮಿತ್‌ ಮಲಿಕ್‌ 125 ಕೆ.ಜಿ. ವಿಭಾಗದಲ್ಲಿ ಗೆದ್ದು ಟೋಕಿಯೊ ಒಲಿಂಪಿಕ್ಸ್‌ ಟಿಕೆಟ್‌ ಪಡೆಯುವಲ್ಲಿ ಯಶಸ್ವಿಯಾಗಿದ್ದರು.