ವಿಚಾರಣೆ ವೇಳೆ “ಬ್ರಿಟ್ನಿ’ ಪ್ರಸ್ತಾವಿಸಿದ ಸುಪ್ರೀಂ
Team Udayavani, Jul 7, 2021, 6:55 AM IST
ಹೊಸದಿಲ್ಲಿ: ಹೆತ್ತವರ ವಶದಲ್ಲಿರುವ 21 ವರ್ಷದ ಪ್ರಿಯತಮೆಯನ್ನು ಬಿಡುಗಡೆ ಮಾಡುವಂತೆ ಕೋರಿ 42 ವರ್ಷದ ಆಧ್ಯಾತ್ಮಿಕ ಗುರುವೊಬ್ಬರು ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ಮಂಗಳವಾರ ತಿರಸ್ಕರಿಸಿದೆ. ಜತೆಗೆ ವಿಚಾರಣೆಯ ವೇಳೆ ಅಮೆರಿಕದ ಪಾಪ್ ಗಾಯಕಿ ಬ್ರಿಟ್ನಿ ಸ್ಪಿಯರ್ ಅವರ ಕೇಸನ್ನೂ ಕೋರ್ಟ್ ಪ್ರಸ್ತಾವಿಸಿದೆ.
ಆಕೆ ನನ್ನನ್ನು ಪ್ರೀತಿಸುತ್ತಿದ್ದು, ಹೆತ್ತವರು ಒತ್ತಾಯಪೂರ್ವಕವಾಗಿ ಮನೆಯಲ್ಲಿ ಇರಿಸಿಕೊಂಡಿದ್ದಾರೆ ಎಂದು ಅರ್ಜಿದಾರರು ಆರೋಪಿಸಿದ್ದರು. ಆದರೆ ಯುವತಿಯ ಮಾನಸಿಕ ಸ್ಥಿತಿ ಸರಿಯಾಗಿಲ್ಲ ಎಂಬ ಕಾರಣಕ್ಕೆ ಕೇರಳ ಹೈಕೋರ್ಟ್ ಈ ಅರ್ಜಿಯನ್ನು ತಿರಸ್ಕರಿಸಿತ್ತು. ಅದನ್ನು ಪ್ರಶ್ನಿಸಿ ಅರ್ಜಿದಾರ ಸುಪ್ರೀಂ ಮೆಟ್ಟಿಲೇರಿದ್ದರು.
ವಿಚಾರಣೆ ನಡೆಸಿದ ನ್ಯಾಯಪೀಠ, ಯುವತಿಯು ಮಾನಸಿಕ ಅಸ್ವಸ್ಥಳು ಎಂದು ತಂದೆ-ತಾಯಿಯಿಬ್ಬರೂ ಹೇಳಿದ್ದಾರೆ. ಈ ಕೇಸಲ್ಲಿ ನಾವು ಮಧ್ಯಪ್ರವೇಶಿಸುವುದಿಲ್ಲ ಎಂದಿದೆ. ಜತೆಗೆ, ಬ್ರಿಟ್ನಿ ಕೇಸನ್ನು ಪ್ರಸ್ತಾವಿಸಿದೆ. ಬ್ರಿಟ್ನಿ ಸ್ಪಿಯರ್ ಅವರು ತಮ್ಮ ತಂದೆ ಹಾಗೂ ಇತರರ “ಸಂರಕ್ಷಣಾತ್ಮಕ ಮನೋಭಾವ’ದ ವಿರುದ್ಧ ಕಾನೂನು ಹೋರಾಟ ನಡೆಸುತ್ತಿದ್ದಾರೆ. ತಂದೆಯಿಂದಾಗಿ ನಾನು ನನ್ನ ಇಚ್ಛೆಗೆ ವಿರುದ್ಧವಾಗಿ ಗರ್ಭನಿರೋಧಕ ಮಾತ್ರೆಗಳನ್ನು ಸೇವಿಸಬೇಕಾಗಿದೆ. ಮದುವೆಯಾಗಲು ಹಾಗೂ ಮಕ್ಕಳನ್ನು ಹೊಂದಲೂ ಸಾಧ್ಯವಾಗುತ್ತಿಲ್ಲ ಎಂದು ಬ್ರಿಟ್ನಿ ಅಳಲು ತೋಡಿಕೊಂಡಿದ್ದಾರೆ.