ದುಬಾೖ ನಗರಿಗೆ ಸೌದಿ ಸವಾಲು

Team Udayavani, Feb 17, 2021, 6:55 AM IST

ರಿಯಾದ್‌: ತನ್ನ ದೇಶದ ಆರ್ಥಿಕ ಲಾಭ ಬೇರೆ ದೇಶಗಳಿಗೆ ಹರಿದು ಹೋಗುವುದನ್ನು ಸಾಧ್ಯವಾದಷ್ಟು ತಗ್ಗಿಸಲು ಹಾಗೂ ದೇಶೀಯ ಮಟ್ಟದಲ್ಲಿ ಅಪಾರ ಪ್ರಮಾಣದ ಉದ್ಯೋಗಗಳನ್ನು ಸೃಷ್ಟಿಸಲು ಸೌದಿ ಅರೇಬಿಯಾ ಹೊಸತೊಂದು ಹೆಜ್ಜೆಯ  ನ್ನಿಟ್ಟಿದೆ. ಸೌದಿ ಅರೇಬಿಯಾ ಇಟ್ಟಿರುವ ಈ ಹೊಸ ಹೆಜ್ಜೆ ಪಕ್ಕದ ರಾಷ್ಟ್ರವಾದ ಯು.ಎ.ಇ.ನ ಪ್ರಮುಖ ನಗರ ದುಬಾೖಗೆ ಹೊಸ ಸವಾಲಾಗಲಿದೆ ಎಂದು ತಜ್ಞರು ಅಂದಾಜಿಸಿದ್ದಾರೆ.

ಏನಿದು ಸವಾಲು?: ಸೌದಿ ಅರೇಬಿಯಾವನ್ನು ಹೊರತುಪಡಿಸಿದಂತೆ ಮಧ್ಯಪ್ರಾಚ್ಯದ ಇತರ ರಾಷ್ಟ್ರಗಳಲ್ಲಿ ಕೇಂದ್ರ ಕಚೇರಿಗಳನ್ನು ಹೊಂದಿರುವ ಎಲ್ಲ ಬಹುರಾಷ್ಟ್ರೀಯ ಕಂಪೆನಿಗಳು ಆದಷ್ಟು ಬೇಗನೇ ತಮ್ಮ ಕಚೇರಿಗಳನ್ನು ಸೌದಿಗೆ ವರ್ಗಾಯಿಸುವಂತೆ ಅಲ್ಲಿನ ಸರಕಾರ ಒತ್ತಡ ಹೇರಲಾರಂಭಿಸಿದೆ. ಕಚೇರಿಗಳ ಸ್ಥಳಾಂತರಕ್ಕೆ ಇನ್ನು 3 ವರ್ಷಗಳ ಗಡುವು ನೀಡಲಾಗಿದೆ. 2024ರ ಜ. 1ರೊಳಗೆ ತಮ್ಮ ಕಚೇರಿಗಳನ್ನು ಸೌದಿಗೆ ಸ್ಥಳಾಂತರಿಸುವ ಕಂಪೆನಿಗಳೊಂದಿಗೆ ಮಾತ್ರ ತನ್ನ ವ್ಯಾವಹಾರಿಕ ಒಪ್ಪಂದವನ್ನು ಮುಂದುವರಿಸುವುದಾಗಿ ಸರಕಾರ ಖಡಾಖಂಡಿತವಾಗಿ ಹೇಳಿದೆ.

ರಿಯಾದ್‌ ಅಭಿವೃದ್ಧಿಗೆ ಪಣ: ಹೀಗೆ ಸೌದಿಗೆ ಕಾಲಿಡುವ ಹೊಸ ಕಂಪೆನಿಗಳಿಗೆ ಜಾಗ ಮಾಡಿಕೊಡಲು ರಾಜಧಾನಿ ರಿಯಾದ್‌ ನಗರವನ್ನು ದುಪ್ಪಟ್ಟು ವಿಶಾಲಗೊಳಿಸಲು ಹಾಗೂ ಅದನ್ನು ಜಾಗತಿಕ ವ್ಯಾಪಾರದ ಸ್ವರ್ಗವಾಗಿಸಲು ಅಲ್ಲಿನ ರಾಜಕುಮಾರ ಮೊಹಮ್ಮದ್‌ ಬಿನ್‌ ಸಲ್ಮಾನ್‌, ಇದಕ್ಕಾಗಿ 58 ಲಕ್ಷ ಕೋಟಿ ರೂ.ಗಳನ್ನು ಮೀಸಲಿಡಲು ನಿರ್ಧರಿಸಿದ್ದಾರೆ.