ಶೂಟಿಂಗ್: ಭಾರತದ ಬುಟ್ಟಿಯಲ್ಲಿ 25 ಪದಕ ; 12 ಚಿನ್ನ, 7 ಬೆಳ್ಳಿ, 6 ಕಂಚು
Team Udayavani, Mar 27, 2021, 6:35 AM IST
ಹೊಸದಿಲ್ಲಿ: ಐಎಸ್ಎಸ್ಎಫ್ ಶೂಟಿಂಗ್ ವಿಶ್ವಕಪ್ನಲ್ಲಿ ಆತಿಥೇಯ ಭಾರತ ತನ್ನ ಒಟ್ಟು ಪದಕಗಳ ಸಂಖ್ಯೆಯನ್ನು 25ಕ್ಕೆ ಏರಿಸಿಕೊಂಡು ಪ್ರಭುತ್ವ ಮುಂದುವರಿಸಿತು.
ಶುಕ್ರವಾರದ ಸ್ಪರ್ಧೆಗಳಲ್ಲಿ ಭಾರತಕ್ಕೆ ಮತ್ತೆರಡು ಚಿನ್ನದ ಪದಕದ ಜತೆಗೆ ಒಂದು ಬೆಳ್ಳಿ, ಒಂದು ಕಂಚು ಒಲಿದು ಬಂತು. 50 ಮೀ. ರೈಫಲ್ 3 ಪೊಸಿಶನ್ ಮಿಕ್ಸೆಡ್ ತಂಡ ವಿಭಾಗದಲ್ಲಿ ತೇಜಸ್ವಿನಿ ಸಾವಂತ್-ಸಂಜೀವ್ ರಜಪೂತ್ ಸ್ವರ್ಣಕ್ಕೆ ಗುರಿ ಇರಿಸಿದರು. ಉಕ್ರೇನ್ ವಿರುದ್ಧ ಇವರು 31-19 ಅಂತರದ ರೋಚಕ ಗೆಲುವು ಸಾಧಿಸಿದರು. ಐಶ್ವರಿ ಪ್ರತಾಪ್ ಸಿಂಗ್ ತೋಮರ್-ಸುನಿಧಿ ಚೌಹಾಣ್ ಜೋಡಿ ಕಂಚಿನ ಪದಕ ಜಯಿಸಿತು.
ಪುರುಷರ 50 ಮೀ. ರೈಫಲ್ 3 ಪೊಸಿಶನ್ ತಂಡ ವಿಭಾಗದಲ್ಲಿ ಸ್ವಪ್ನಿಸ್ ಕುಸಲೆ, ಚೈನ್ ಸಿಂಗ್, ನೀರಜ್ ಕುಮಾರ್ ಬಂಗಾರದೊಂದಿಗೆ ರಾರಾಜಿಸಿದರು.
ಪುರುಷರ 25 ಮೀ. ರ್ಯಾಪಿಡ್ ಫೈರ್ ವಿಭಾಗದಲ್ಲಿ 18 ವರ್ಷದ ಯುವ ಶೂಟರ್ ವಿಜಯವೀರ್ ಸಿಂಧು ಬೆಳ್ಳಿ ಗೆದ್ದರು.