ದೇವತೆಗಳಿಗೆ ಹಿಂದೂ-ಮುಸ್ಲಿಮರಿಂದ ಜಲಾಭಿಷೇಕ

Team Udayavani, Apr 6, 2022, 2:53 PM IST

ಆಲಮಟ್ಟಿ: ಮಳೆಗಾಲದ ಅವಧಿಯಲ್ಲಿ ಉತ್ತಮ ಮಳೆಯಾಗಿ ಉತ್ತಮ ಬೆಳೆ ಬರಲಿ ಎಂದು ಹಾರೈಸಿ ಪ್ರತಿ ವರ್ಷದಂತೆ ಈ ವರ್ಷವೂ ಪಟ್ಟಣದ ಎಲ್ಲ ದೇವರುಗಳಿಗೆ ಜಲಾಭಿಷೇಕ ಮಾಡಿಸಲಾಯಿತು.

ಹಿಂದೂ-ಮುಸ್ಲಿಮ ಪುರುಷರು, ಮಹಿಳೆಯರು, ಮಕ್ಕಳು ಸೇರಿದಂತೆ ವಯೋಮಾನ ಭೇದವಿಲ್ಲದೇ ಲಿಂಗಭೇದವಿಲ್ಲದೇ ಎಲ್ಲ ಭಕ್ತರು ಸೇರಿಕೊಂಡು ತಾವು ಸ್ನಾನ ಮಾಡಿ ತಾವು ಉಟ್ಟಿರುವ ತೊಯ್ದ ಬಟ್ಟೆಗಳನ್ನುಟ್ಟುಕೊಂಡು ಇಲ್ಲಿನ ಧಾರ್ಮಿಕ ಕೇಂದ್ರಗಳಾಗಿರುವ ದೇವಸ್ಥಾನ ಮತ್ತು ದರ್ಗಾಗಳಿಗೆ ತೆರಳಿ ಜಲಾಭಿಷೇಕ ಮಾಡಿದ್ದು ವಿಶೇಷವಾಗಿತ್ತು.

ಇಲ್ಲಿ ಜಾತಿ-ಮತ ಭೇದವಿಲ್ಲದೇ ಎಲ್ಲ ಧರ್ಮೀಯರೂ ಸೇರಿಕೊಂಡು ಎಲ್ಲ ಜಾತ್ರೆ ಹಾಗೂ ದರ್ಗಾಗಳ ಉರೂಸ್‌ ಗಳಲ್ಲಿ ಭಾಗವಹಿಸಿ ತನುಮನ ಧನದಿಂದ ಸೇವೆ ಸಲ್ಲಿಸುತ್ತಾರೆ. ದೇವಸ್ಥಾನದಲ್ಲಿ ಪ್ರತಿ ಬಾರಿಯೂ ಕೆಲ ಗ್ರಾಮಗಳಲ್ಲಿ ಮಂಗಳವಾರ ಮತ್ತು ಶುಕ್ರವಾರಗಳನ್ನು 5 ವಾರ ಇನ್ನು ಕೆಲ ಗ್ರಾಮಗಳಲ್ಲಿ 11 ವಾರಗಳನ್ನು ಪಾಲಿಸುತ್ತಿದ್ದರೆ ಕೆಲ ಗ್ರಾಮಗಳಲ್ಲಿ ಮಂಗಳವಾರ ಅಥವಾ ಶುಕ್ರವಾರ ಒಂದೇ ಆಚರಿಸತ್ತಾರೆ.

ಈ ದಿನಗಳಂದು ಮನೆಗಳಲ್ಲಿ ಯಾವುದೇ ಪದಾರ್ಥಗಳನ್ನು ಕರಿಯುವುದಿಲ್ಲ. ರೊಟ್ಟಿ, ಚಪಾತಿಗಳನ್ನೂ ಮಾಡುವುದಿಲ್ಲ. ಯಾರೂ ಕೂಲಿ ಕೆಲಸಕ್ಕೆ ಹೋಗುವುದಿಲ್ಲ. ಎಲ್ಲ ನಾಗರಿಕರು ದೇವರ ಹೆಸರಿನಲ್ಲಿ ಧ್ಯಾನ ಮಾಡುತ್ತಾರೆ.