ಮರು ಮತದಾನ ವೆಬ್‌ ಕಾಸ್ಟಿಂಗ್‌ ಮೂಲಕ ವೀಕ್ಷಣೆ

Team Udayavani, May 21, 2019, 6:10 AM IST

ಕುಂಬಳೆ: ಕಾಸರಗೋಡು ಲೋಕಸಭಾ ಕ್ಷೇತ್ರದಲ್ಲಿ ನಕಲಿ ಮತದಾನ ನಡೆದ ತೃಕ್ಕರಿಪುರ ವಿಧಾನಸಭೆ ಕ್ಷೇತ್ರದ ಕಯ್ಯೂರು ಚೀಮೇನಿ ಗ್ರಾ. ಪಂ. ನ ಬೂತ್‌ ನಂಬ್ರ 48 ಕುಳಿಯಾಡ್‌ ಜಿಯುಪಿ ಶಾಲೆಯ ಮತದಾನವನ್ನು ವೆಬ್‌ ಕಾಸ್ಟಿಂಗ್‌ ಮೂಲಕ ಜಿಲ್ಲಾಧಿಕಾರಿ ಡಾ| ಡಿ. ಸಜಿತ್‌ ಬಾಬು ವೀಕ್ಷಿಸಿದರು.

ಬೆಳಗ್ಗೆ 6.30ಕ್ಕೆ ಅಣಕು ಮತದಾನ ಆರಂಭಿಸಿದ್ದಲ್ಲಿಂದ ಎಲ್ಲ ಮತದಾನ ಪ್ರಕ್ರಿಯೆಗಳನ್ನು ಜಿಲ್ಲಾಧಿಕಾರಿ ವೀಕ್ಷಿಸಿದರು.ಬೂತ್‌ನಲ್ಲಿ ಪ್ರಿಸೆ„ಡಿಂಗ್‌ ಅಧಿಕಾರಿಯ ಸಮೀಪ ಸ್ಥಾಪಿಸಿದ ವೆಬ್‌ ಕೆಮರಾ, ಮತದಾರರು ಪೋಲಿಂಗ್‌ ಬೂತ್‌ ನೊಳಗೆ ಪ್ರವೇಶಿಸುವುದು ಮೊದಲಾದ ಪ್ರಕ್ರಿಯೆಗಳನ್ನು ವೀಕ್ಷಿಸಲಾಯಿತು. ಜಿಲ್ಲಾಧಿಕಾರಿ ಕಚೆೇರಿಯಲ್ಲಿ ಸಜ್ಜುಗೊಳಿಸಿದ ಟೆಲಿವಿಷನ್‌ಗೆ ಬೂತ್‌ನಿಂದ ಸಕಾಲಕ್ಕೆ ವೆಬ್‌ ಕಾಸ್ಟಿಂಗ್‌ ದೃಶ್ಯಗಳನ್ನು ಪ್ರಸಾರ ಮಾಡಲಾಯಿತು.

ಅಕ್ಷಯಕೇಂದ್ರಕ್ಕೆ ವೆಬ್‌ ಕಾಷ್ಟಿಂಗ್‌ ಹೊಣೆಗಾರಿಕೆ ನೀಡಲಾಯಿತು. ಬಿಎಸ್‌ಎನ್‌ಎಲ್‌ ವೆಬ್‌ ಕಾಸ್ಟಿಂಗ್‌ಗೆ ಅಗತ್ಯವಿರುವ ನೆಟ್‌ ಸೌಕರ್ಯ ವ್ಯವಸ್ಥೆಗೊಳಿಸಿತು. ಚುನಾವಣಾ ಸಹಾಯಕ ಜಿಲಾಧಿಕಾರಿ ವಿ. ಪಿ. ಅಬ್ದುಲ್‌ ರಹಿಮಾನ್‌, ಕೆ. ನಾರಾಯಣ್‌, ಜೂನಿಯರ್‌ ಸೂಪರಿಂಟೆಂಡೆಂಟ್‌ ಗೋವಿಂದನ್‌ ರಾವಣೇಶ್ವರ, ಅಕ್ಷಯ ಜಿಲ್ಲಾ ಪ್ರಾಜೆಕ್ಟ್ ಮ್ಯಾನೇಜರ್‌ ಶಾರಿಕ ಬಾಲಗೋಪಾಲನ್‌ ವೆಬ್‌ಕಾಸ್ಟಿಂಗ್‌ ವೀಕ್ಷಣೆಯಲ್ಲಿ ಭಾಗವಹಿಸಿದರು.

ಮರುಮತದಾನ ದಿನದಲ್ಲೂ ಕುಟುಂಬ ಶ್ರೀಯಿಂದ ಭೋಜನ
ಮರು ಮತದಾನ ನಡೆದ ಮೇ 19ರಂದು ಕಯ್ಯೂರು- ಚೀಮೇನಿ ಗ್ರಾಮ ಪಂಚಾಯತ್‌ನ ಬೂತ್‌ ನಂಬ್ರ 48 ಕುಳಿಯಾಡ್‌ ಸರಕಾರಿ ಯುಪಿ ಶಾಲೆಯ ಮತದಾನ ಅಧಿಕಾರಿಗಳಿಗೆ ಮತ್ತು ನೌಕರರಿಗೆ ಕುಟುಂಬಶ್ರೀ ಕಾರ್ಯಕರ್ತೆಯರು ಭೋಜನ ನೀಡಿದರು. ಮತದಾನ ಸಾಮಗ್ರಿಗಳೊಂದಿಗೆ ಮುನ್ನಾದಿನ ಮತಗಟ್ಟೆಗೆ ತಲುಪಿದ ಬಳಿಕ ಕುಟುಂಬಶ್ರೀ ಭೋಜನ ವ್ಯವಸ್ಥೆ ಮಾಡಲಾಯಿತು. ಪೋಲಿಂಗ್‌ ಅಧಿಕಾರಿಗಳ ಹೊರತು ಸುರಕ್ಷಾ ಹೊಣೆಗಾರಿಕೆಯಿರುವ ಅಧಿಕಾರಿಗಳಿಗೂ ಕುಟುಂಬಶ್ರೀ ಭೋಜನ ವಿತರಿಸಿತು.