ಪುತ್ತೂರು: ಭೂ ಮಾಪನ ಇಲಾಖೆ, ತಾಲೂಕು ಕಚೇರಿ; 1,006 ಅರ್ಜಿ ವಿಲೇಗೆ ಬಾಕಿ
Team Udayavani, Sep 25, 2022, 10:04 AM IST
ಪುತ್ತೂರು: ತಾಲೂಕಿನಲ್ಲಿ ಭೂ ಅಳತೆಗೆ ಸಂಬಂಧಿಸಿ ಭೂ ಮಾಪನ ಇಲಾಖೆ ಹಾಗೂ ತಾಲೂಕು ಕಚೇರಿಯಲ್ಲಿ 1,006 ಅರ್ಜಿಗಳು ವಿಲೇವಾರಿಗೆ ಬಾಕಿ ಇದೆ.
ಹಲವು ವರ್ಷಗಳಿಂದ ವಿವಿಧ ಕಾರಣಗಳಿಂದ ಸರಕಾರಿ ಹಾಗೂ ಖಾಸಗಿ ಜಾಗಕ್ಕೆ ಸಂಬಂಧಿಸಿದ ಕಡತ ವಿಲೇವಾರಿಗೆ ಅಡ್ಡಿ ಉಂಟಾಗಿದೆ. ಅರಣ್ಯ ಜಮೀನು, ಖಾಸಗಿ ಜಾಗ ಗುರುತಿಸುವಿಕೆ, ಪಹಣಿ ತಿದ್ದುಪಡಿ ಮೊದಲಾದ ವಿಭಾಗಕ್ಕೆ ಸಂಬಂಧಿಸಿದ ಅರ್ಜಿಗಳು ಇದಾಗಿದೆ.
ಬಾಕಿ ಇರುವ ಅರ್ಜಿ
ತಾಲೂಕಿನಲ್ಲಿ ಜೂನ್ ಅಂತ್ಯಕ್ಕೆ ತಾಲೂಕು ಕಚೇರಿ ಹಾಗೂ ಭೂಮಾಪನ ಇಲಾಖೆಯಲ್ಲಿ ಒಟ್ಟು 1,006 ಅರ್ಜಿಗಳು ಬಾಕಿ ಇವೆ. ಇವುಗಳ ಪೈಕಿ 170 ಅಳತೆಗಾಗಿ ಸರ್ವೇ ಕಚೇರಿಯಲ್ಲಿ ಹಾಗೂ 836 ಅರ್ಜಿಗಳು ಪಹಣಿ ತಿದ್ದುಪಡಿ 1-5 ತಯಾರಿಕೆಗಾಗಿ ತಾಲೂಕು ಕಚೇರಿಯಲ್ಲಿ ಇವೆ. 11 ಇಗೆ ಸಂಬಂಧಿಸಿ ತಾಲೂಕು ಕಚೇರಿಯಲ್ಲಿ 646, ಸರ್ವೇ ಕಚೇರಿಯಲ್ಲಿ 85 ಅರ್ಜಿ ಸೇರಿದಂತೆ 731, ಭೂ ಪರಿವರ್ತನೆಗೆ ಸಂಬಂಧಿಸಿ ತಾಲೂಕು ಕಚೇರಿಯಲ್ಲಿ 164, ಸರ್ವೇ ಕಚೇರಿಯಲ್ಲಿ 47 ಸೇರಿದಂತೆ 211, ಗಡಿ ಅಳತೆಗೆ ಸಂಬಂಧಿಸಿ ತಾಲೂಕು ಕಚೇರಿಯಲ್ಲಿ 26, ಸರ್ವೇ ಕಚೇರಿಯಲ್ಲಿ 18 ಸೇರಿದಂತೆ 44, ಸರಕಾರಿ ಜಮೀನಿನ ಅಳತೆಗೆ ಸಂಬಂಧಿಸಿ ಸರ್ವೇ ಕಚೇರಿಯಲ್ಲಿ 20 ಅರ್ಜಿಗಳು ಬಾಕಿ ಇವೆ ಎನ್ನುತ್ತಿದೆ ಅಂಕಿ ಅಂಶ. 1-5 ತಯಾರಿಕೆಗೆ ಸಂಬಂಧಿಸಿ ಹತ್ತಾರು ವರ್ಷಗಳಿಂದ ಅರ್ಜಿಗಳು ಬಾಕಿ ಇದ್ದು ಇದರ ವಿಲೇ ವಾರಿಗೆ ಸಂಬಂಧಿಸಿ ಅರ್ಜಿದಾರ ದಿನ ನಿತ್ಯ ಕಂದಾಯ ಇಲಾಖೆಯ ಕಚೇರಿಅಲೆದಾಟ ಮಾಡಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಕಂದಾಯ ಇಲಾಖೆಯು ಈ ಅರ್ಜಿಗಳ ವಿಲೇವಾರಿಗೆ ಸಂಬಂಧಿಸಿ ಗಡು ವಿಧಿಸಿದ್ದರೂ ಈ ತನಕ ವಿಲೇವಾರಿ ಆಗಿಲ್ಲ.
ಭೂ ಮಾಪಕರ ಕೊರತೆ
ಪುತ್ತೂರು ಭೂ ಮಾಪನ ಇಲಾಖೆಯಲ್ಲಿ ಮಂಜೂರಾತಿ ಹುದ್ದೆಗಳ ಪೈಕಿ ಹಲವು ಹುದ್ದೆಗಳು ಖಾಲಿ ಇವೆ. ಹನ್ನೊಂದು ಜನರ ಪೈಕಿ ನಾಲ್ಕು ಮಂದಿ ನಿಯೋಜನೆ ನೆಲೆಯಲ್ಲಿ ಕಡಬಕ್ಕೆ ಕರ್ತವ್ಯಕ್ಕೆ ತೆರಳಿದ್ದಾರೆ. ದಿನಂಪ್ರತಿ ಸರಕಾರಿ ಹಾಗೂ ಖಾಸಗಿ ಭೂಮಿಗೆ ಸಂಬಂಧಿಸಿ ನೂರಾರು ಅರ್ಜಿಗಳು ಸಲ್ಲಿಕೆಯಾಗುತ್ತಿದ್ದು ವರ್ಷಾನುಗಟ್ಟಲೇ ಕಾಯುವ ಸ್ಥಿತಿ ನಿರ್ಮಾಣವಾಗಿದೆ. ಹೀಗಾಗಿ ದಿನೇ ದಿನೆ ಅರ್ಜಿ ಸಲ್ಲಿಕೆ ಆಗುತ್ತಿದ್ದರೂ ಅದರ ವಿಲೇವಾರಿ ಮಾತ್ರ ಆಗುತ್ತಿಲ್ಲ ಅನ್ನುವುದು ಸಾರ್ವಜನಿಕ ವಲಯದ ಆರೋಪ.
ಅಗತ್ಯ ಕ್ರಮ: ತಾಲೂಕು ಕಚೇರಿ, ಸರ್ವೇ ಇಲಾಖೆಯಲ್ಲಿ ಬಾಕಿ ಇರುವ ಅರ್ಜಿಗಳನ್ನು ತ್ವರಿತವಾಗಿ ವಿಲೇವಾರಿ ಮಾಡುವಂತೆ ಸೂಚನೆ ನೀಡಲಾಗಿದೆ. ಸರಕಾರಿ ಯೋಜನೆಗಳ ಅನುಷ್ಠಾನಕ್ಕೆ ಭೂಮಿ ಕಾದಿರಿಸುವಿಕೆ, ಖಾಸಗಿ ಭೂ ದಾಖಲೆಗಳಿಗೆ ಸಂಬಂಧಿಸಿ ಅರ್ಜಿಗಳನ್ನು ಶೀಘ್ರ ಇತ್ಯರ್ಥಕ್ಕೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ. –ಸಂಜೀವ ಮಠಂದೂರು, ಶಾಸಕರು, ಪುತ್ತೂರು