ಹೊಸಮಠ: ನೆನಪಾಗಿ ಕಾಡುತ್ತಿದೆ ಮುಳುಗು ಸೇತುವೆ

Team Udayavani, Jul 29, 2021, 2:00 AM IST

ಕಡಬ: ಉಪ್ಪಿನಂಗಡಿ- ಸುಬ್ರಹ್ಮಣ್ಯ ರಾಜ್ಯ ಹೆದ್ದಾರಿಯಲ್ಲಿ ಕಡಬದ ಹೊಸಮಠದಲ್ಲಿ ಹೊಸ ಸೇತುವೆ ನಿರ್ಮಾಣ ವಾಗಿ ಮುಳುಗು ಸೇತುವೆ ತೆರವು ಗೊಂಡು ಇತಿಹಾಸದ ಪುಟ ಸೇರಿದರೂ ಎಡೆಬಿಡದೆ ಸುರಿವ ಮಳೆಯ ನಡುವೆ ನೆರೆ ನೀರಿನಲ್ಲಿ ಮುಳುಗೇಳುತ್ತಿದ್ದ ಹಳೆಯ ಸೇತುವೆ ನೆನಪಾಗಿ ಕಾಡುತ್ತಿರುವುದಂತೂ ಸುಳ್ಳಲ್ಲ.

ಅದೆಷ್ಟೋ ಜೀವಗಳನ್ನು ಬಲಿ ತೆಗೆದು ಕೊಂಡು, ದುರಂತಗಳಿಗೆ ಸಾಕ್ಷಿಯಾಗಿದ್ದ ಈ ಸೇತುವೆ ಮಳೆಗಾಲದಲ್ಲಿ ಶಾಲಾ ಮಕ್ಕಳಿಗೆ ಹೆಚ್ಚು ರಜೆಗೆ ಕಾರಣವಾದ “ಹೆಗ್ಗಳಿಕೆ’ಯನ್ನೂ ಹೊಂದಿತ್ತು.

ಹೊಸಮಠ ಸೇತುವೆಗೆ ಬರೋಬ್ಬರಿ 6 ದಶಕಗಳ ಇತಿಹಾಸ ಇದೆ. ಅಂದು ಮೈಸೂರು ರಾಜ್ಯ ಆಡಳಿತ ಅವಧಿಯಲ್ಲಿ ಪುಣ್ಯ ಕ್ಷೇತ್ರಗಳಲ್ಲಿ ಒಂದಾದ ಕುಕ್ಕೆ ಸುಬ್ರಹ್ಮಣ್ಯಕ್ಕೆ ಸಂಪರ್ಕ ಕಲ್ಪಿಸುವ ಉಪ್ಪಿನಂಗಡಿ-ಕಡಬ- ಸುಬ್ರಹ್ಮಣ್ಯ ರಸ್ತೆ ನಿರ್ಮಾಣ ನಡೆದಿತ್ತು. ಆದರೆ ಗುಂಡ್ಯ ಹೊಳೆಗೆ ಹೊಸಮಠದಲ್ಲಿ ಸೇತುವೆ ಇರಲಿಲ್ಲ. ಅಲ್ಲಿ ಸೇತುವೆ ನಿರ್ಮಾ ಣವಾಗಬೇಕು ಎನ್ನುವ ಸ್ಥಳೀಯರ ಅಹ ವಾಲಿಗೆ ಸ್ಪಂದಿಸಿದ ಅಂದಿನ ಸರಕಾರ ಹೊಸ ಮಠದಲ್ಲಿ ಮುಳುಗು ಸೇತುವೆ ನಿರ್ಮಿಸಿತ್ತು.

ಅಂದಿನ ಕಾಲಕ್ಕೆ ಅದೊಂದು ದೊಡ್ಡ ಸೇತುವೆ. ಆದರೆ ನಿರ್ಮಾಣವಾದ ವರ್ಷ ದಲ್ಲೇ ಮಳೆಗಾಲದಲ್ಲಿ ಸೇತುವೆ ಮುಳುಗಡೆ ಯಾಯಿತು. ಅಂದಿನ ಲೋಕೋ ಪಯೋಗಿ ಸಚಿವ ಭಕ್ತವತ್ಸಲಂ 1955ರಲ್ಲಿ ಈ ಸೇತುವೆಯನ್ನು ನೆರೆ ನೀರಿ ನಲ್ಲಿ ಮುಳು ಗಿದ್ದಾಗಲೇ ಉದ್ಘಾಟಿಸಿ ಹೋಗಿದ್ದರು.

ಹಲವು ದುರಂತಗಳಿಗೆ ಸಾಕ್ಷಿಯಾಗಿದ್ದ ಸೇತುವೆ:

ಹೊಸಮಠ ಸೇತುವೆಯ ಇತಿಹಾಸ ಕೆದಕಿ ದರೆ ಹಲವು ದುರಂತ ಘಟನೆಗಳು ಎದುರಾ ಗುತ್ತವೆ. ಸೇತುವೆಯಲ್ಲಿ ನೆರೆ ನೀರು ನಿಂತಾಗ ದಾಟುವ ದುಸ್ಸಾಹಸಕ್ಕೆ ಇಳಿದವರನ್ನು ನೆರೆನೀರು ತನ್ನ ಒಡಲೊಳಗೆ ಸೇರಿಸಿಕೊಂಡ ಅದೆಷ್ಟೋ ಉದಾಹರಣೆಗಳಿವೆ. ಸೇತುವೆ ನಿರ್ಮಾಣವಾಗಿ ಐದೇ ವರ್ಷದಲ್ಲಿ ಆ ರಸ್ತೆಯಲ್ಲಿ ಓಡಾಡುತ್ತಿದ್ದ ಖಾಸಗಿ ಬಸ್‌ ನೆರೆ ಸಂದರ್ಭದಲ್ಲಿ ಸೇತುವೆ ದಾಟಲು ಹೋಗಿ ನೀರು ಪಾಲಾಗಿ ಒಬ್ಬ ಬಲಿಯಾಗಿದ್ದರು. ಅದಾದ ಕೆಲವು ವರ್ಷ ಬಳಿಕ ಸುಬ್ರಹ್ಮಣ್ಯಕ್ಕೆ ಬಂದಿದ್ದ ತಮಿಳುನಾಡಿನ ಯಾತ್ರಾರ್ಥಿಗಳು ಸೇತುವೆ ದಾಟಲು ಹೋಗಿ ಇಬ್ಬರು ಯುವಕರು ನೀರುಪಾಲಾಗಿದ್ದರೆ ಅಡಿಕೆ ಸಸಿ ಸಾಗಿಸುತ್ತಿದ್ದ ಲಾರಿಯೊಂದು ನೀರುಪಾಲಾಗಿ ಕೃಷಿಕರೊಬ್ಬರು ಮೃತಪಟ್ಟಿದ್ದರು. 2006ರಲ್ಲಿ ಕಡಬಕ್ಕೆ ಸಿಮೆಂಟ್‌ ಹೇರಿಕೊಂಡು ಬರುತ್ತಿದ್ದ ಲಾರಿಯೊಂದು ಸೇತುವೆಯಿಂದ ಕೆಳಕ್ಕೆ ಬಿದ್ದು, ನಾಲ್ವರು ನೀರುಪಾಲಾಗಿ ಪ್ರಾಣ ಕಳೆದುಕೊಂಡಿದ್ದರು. ಅಂತೆಯೇ ಅದೆಷ್ಟೋ ಜನ ವಾಹನಗಳು ಆಯ ತಪ್ಪಿ ಸೇತುವೆಯಿಂದ ಕೆಳಗೆ ಬಿದ್ದಿರುವುದು ಅಧಿಕೃತವಾಗಿ ಲೆಕ್ಕಕ್ಕೆ ಸಿಕ್ಕಿಲ್ಲ. ಅನೇಕರು ಇಲ್ಲಿ ಆತ್ಮ ಹತ್ಯೆ ಮಾಡಿಕೊಂಡಿದ್ದರು. ಅನೇಕರು ಆತ್ಮಹತ್ಯೆಗೆ ಯತ್ನಿಸಿ ಸಾರ್ವಜನಿಕರ ಸಕಾಲಿಕ ಕ್ರಮದಿಂದ ಪಾರಾದ ಘಟನೆಗಳೂ ಇವೆ.