ಈಶ್ವರಿ ಸಂಸ್ಥೆಗೆ 50 ವರ್ಷ

Team Udayavani, May 19, 2020, 4:35 AM IST

ಕನ್ನಡ ಚಿತ್ರರಂಗದಲ್ಲಿ ಈಶ್ವರಿ ನಿರ್ಮಾಣ ಸಂಸ್ಥೆ ಅಂದರೆ ಕನ್ನಡದ ಹೆಮ್ಮೆ ಡಾ.ರಾಜಕುಮಾರ್, ವಿಷ್ಣುವರ್ಧನ್‌, ಅಂಬರೀಶ್‌, ರವಿಚಂದ್ರನ್‌ ಸೇರಿದಂತೆ ಹಲವು ನಟ, ನಟಿಯರ ಅದ್ಭುತ ಚಿತ್ರಗಳನ್ನು ನಿರ್ಮಿಸಿದ ಸಂಸ್ಥೆ ಅದು. ಈ  ಈಶ್ವರಿ ಸಂಸ್ಥೆಇದೀಗ 50ರ ಸಂಭ್ರಮದಲ್ಲಿದೆ. ಹೌದು, ವೀರಸ್ವಾಮಿ ಅವರ ಈಶ್ವರಿ ಸಂಸ್ಥೆ ಹುಟ್ಟಿಕೊಂಡಿದ್ದು, ಎಪ್ಪರತ್ತರ ದಶಕದಲ್ಲಿ 1970 71 ರಲ್ಲಿ ಡಾ.ರಾಜಕುಮಾರ್‌ ಅಭಿನಯದ ಕುಲಗೌರವ ಚಿತ್ರದ ನಿರ್ಮಾಣ ಮೂಲಕ ಈಶ್ವರಿ ಸಂಸ್ಥೆಯನ್ನು ಹುಟ್ಟುಹಾಕಿದ ಹಿರಿಮೆ ಎನ್‌.ವೀರಸ್ವಾಮಿ ಅವರಿಗೆ ಸಲ್ಲುತ್ತದೆ.

ಆ ಬಳಿಕ ನಡೆದದ್ದು ಒಂದು ಇತಿಹಾಸ. ಅವರ ಈಶ್ವರಿ ಸಂಸ್ಥೆಯಲ್ಲಿ ತಯಾರಾದ ಸಿನಿಮಾಗಳು ಸೂಪರ್‌ ಹಿಟ್‌ ಆದವು. ಹಲವಾರು ಪ್ರಶಸ್ತಿ ಪುರಸ್ಕಾರಗಳು ಬಂದವು. ವಿಷ್ಣುವರ್ಧನ್‌, ಅಂಬರೀಶ್‌ ಅವರಂತಹ ಮೇರು ನಟರನ್ನು, ನಟಿಯರನ್ನು, ನಿರ್ದೇಶಕರನ್ನು ಹುಟ್ಟುಹಾಕಿದ ಕೀರ್ತಿ ಈಶ್ವರಿ ಸಂಸ್ಥೆಗೆ ಸಲ್ಲುತ್ತದೆ. ಹಾಗೆಯೇ 90ರ ದಶಕದ ಸಂಸ್ಥೆಯ ಹೆಗ್ಗಳಿಕೆ ಅವರ ಪುತ್ರ ರವಿಚಂದ್ರನ್‌  ಅವರಿಗೂ ಸಲುತ್ತದೆ. ಪ್ರೇಮಲೋಕ, ರಣಧೀರ, ಪುಟ್ನಂಜ, ರಾಮಾಚಾರಿ ಸೇರಿದಂತೆ ಹಲವು ಹಿಟ್‌ ಚಿತ್ರಗಳನ್ನು ಕೊಟ್ಟ ಹೆಮ್ಮೆ ರವಿಚಂದ್ರನ್‌ ಅವರದು. ಬರೀ ನಿರ್ಮಾಪಕರಾಗಿ ಅಲ್ಲದೆ ನಿರ್ದೇಶಕರಾಗಿ ನಟರಾಗಿಯೂ ರವಿಚಂದ್ರನ್‌ ಗುರುತಿಸಿಕೊಂಡರು.

ತಂದೆ ವೀರಸ್ವಾಮಿ ಹುಟ್ಟುಹಾಕಿದ ಈಶ್ವರಿ ಸಂಸ್ಥೆಯನ್ನು ಈಗಲೂ ಮುನ್ನಡೆಸಿಕೊಂಡು ಬರುತ್ತಿದ್ದಾರೆ. ಈಗ ಅವರ ಜೊತೆ ಪುತ್ರರಾದ ಮನುರಂಜನ್‌, ವಿಕ್ರಮ್‌ ಕೂಡ ಇದ್ದಾರೆ. ಈಶ್ವರಿ ನಿರ್ಮಾಣ ಸಂಸ್ಥೆ ಈಗ 50  ವರ್ಷ ಸಂಭ್ರಮದಲ್ಲಿದೆ. ಕನ್ನಡದಲ್ಲಿ ಕರುನಾಡ ಕುಳ್ಳನೆಂದೇ ಪ್ರೀತಿಯಿಂದ ಕರೆಸಿಕೊಳ್ಳುವ ದ್ವಾರಕೀಶ್‌ ಅವರ “ದ್ವಾರಕೀಶ್‌ ಚಿತ್ರ’ ಸಂಸ್ಥೆ ಕೂಡ 50 ವರ್ಷ ಪೂರೈಸಿದೆ. ಅವರ ನಿರ್ಮಾಣ ಸಂಸ್ಥೆಯಾದ “ದ್ವಾರಕೀಶ್‌ ಚಿತ್ರ’ ಬ್ಯಾನರ್‌ನಲ್ಲಿ  ಡಾ.ರಾಜಕುಮಾರ್‌, ರಜನಿಕಾಂತ್‌, ಡಾ.ವಿಷ್ಣುವರ್ಧನ್‌, ಅಂಬರೀಶ್‌, ಶಂಕರ್‌ನಾಗ್‌, ಸುದೀಪ್‌, ಶಿವರಾಜಕುಮಾರ್‌ ಸೇರಿದಂತೆ ಹಲವು ಹೊಸಬರ ಸಿನಿಮಾಗಳನ್ನು ನಿರ್ಮಿಸಿದ್ದಾರೆ.