“ಹಗ್ ಕರ್ಟನ್’ ಸುರಕ್ಷಾ ಕವಚ ತಯಾರಿಸಿದ ಬ್ರಝಿಲ್ ಉದ್ಯಮಿ
Team Udayavani, Jun 30, 2020, 2:53 PM IST
ರಿಯೊ ಡಿ ಜನೈರೊ: ಕೋವಿಡ್ -19 ಸೃಷ್ಟಿಸಿರುವ ಅವಾಂತರದಿಂದ ಸಂಘಜೀವಿಯಾಗಿದ್ದ ಮನುಷ್ಯ ನಾಲ್ಕು ಗೋಡೆಗಳ ಮಧ್ಯೆ ಬಂಧಿಯಾಗಿ ನಾಲ್ಕು ತಿಂಗಳು ಕಳೆದಿದ್ದಾನೆ. ಇದೀಗ ಅನ್ಲಾಕ್ ಆಗಿದ್ದರೂ ಸ್ನೇಹಿತರು ಸಂಬಂಧಿಗಳೊಂದಿಗೆ ಮುಕ್ತವಾಗಿ ಕಾಲ ಕಳೆಯಲು ಸಾಮಾಜಿಕ ಅಂತರ ನಿಯಮ ಅಡ್ಡ ಬರುತ್ತಿದ್ದು, ಪ್ರೀತಿಯ ಅಪ್ಪುಗೆಯಿಂದ ವಂಚಿತರಾಗುತ್ತಿದ್ದಾನೆ.
ಇಂತಹ ಪರಿಸ್ಥಿತಿಯ ತೀವ್ರತೆಯನ್ನು ಅರಿತ ಬ್ರಝಿಲ್ನ ಉದ್ಯಮಿಯೊಬ್ಬರು ಈ ಸಮಸ್ಯೆಗೆ ಪರಿಹಾರ ಕಂಡು ಹಿಡಿದಿದ್ದು, “ಹಗ್ ಕರ್ಟನ್’ ಎಂಬ ಸುರಕ್ಷಿತ ಕವಚವನ್ನು ತಯಾರಿಸಿದ್ದಾರೆ.
ಸಾಕಷ್ಟು ಜನರು ಲಾಕ್ಡೌನ್ ವೇಳೆ ತಮ್ಮ ಪ್ರೀತಿ ಪಾತ್ರರಾದವರನ್ನು ಸನಿಹದಿಂದ ನೋಡಲಾಗದೇ ಬೇಸರಗೊಂಡಿದ್ದಾರೆ. ಮಾತ್ರವಲ್ಲದೇ ತಮ್ಮ ತೀರಾ ಹತ್ತಿರ ಸಂಬಂಧಿಗಳೂ ಚಿಕಿತ್ಸೆಗೆ ಒಳಗಾಗುತ್ತಿದ್ದ ವೇಳೆ ಅವರ ಬಳಿ ಇದ್ದು ಹಾರೈಕೆ ಮಾಡಲಾಗದೇ ವ್ಯಥೆ ಪಟ್ಟಿದ್ದಾರೆ. ಈ ಅಂಶಗಳನ್ನು ಗಮನದಲ್ಲಿ ಇಟ್ಟುಕೊಂಡು “ಹಗ್ ಕಾರ್ಟನ್’ ಸಿದ್ಧಪಡಿಸಲಾಗಿದೆ ಎಂದು ಉದ್ಯಮಿ ಹೇಳಿದ್ದಾರೆ.
ಮಗಳಿಗೆ ಪ್ರೀತಿಯ ಅಪ್ಪುಗೆ
ಬ್ರಝಿಲ್ನ ನರ್ಸಿಂಗ್ ಹೋಂನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ 93 ವರ್ಷದ ಡಿಸರ್ ಎಂಬ ಅಜ್ಜಿ 70 ದಿನಗಳ ಬಳಿಕ ಮೊದಲ ಬಾರಿಗೆ ತನ್ನ ಮಗಳನ್ನು ಭೇಟಿಯಾಗಿದ್ದು, “ಹಗ್ ಕಾರ್ಟನ್’ ಧರಿಸುವ ಮೂಲಕ ತಮ್ಮ ಮಗಳಿಗೆ ಪ್ರೀತಿಯ ಅಪ್ಪುಗೆ ನೀಡಿದ್ದಾರೆ.
ಸಾಮಾಜಿಕ ಅಂತರ ನಿಯಮವೂ ಪಾಲನೆಯೊಂದಿಗೆ ಪ್ರೀತಿ ಪಾತ್ರರನ್ನು ಸನಿಹದಿಂದ ನೋಡಲು ಅವಕಾಶ ಮಾಡಿಕೊಟ್ಟ ಉದ್ಯಮಿಯ ಈ ನಡೆಗೆ ಮೆಚ್ಚುಗೆ ವ್ಯಕ್ತವಾಗಿದ್ದು, ವೈದ್ಯರು ಕೂಡ “ಹಗ್ ಕಾರ್ಟನ್’ ಬಳಕೆಗೆ ಅರ್ಹ ಎಂದು ಹೇಳಿದ್ದಾರೆ.