ಹರೇಕಳ ಲಾಕ್‍ಡೌನ್ ಗೆ ಪಜೀರು, ಕೊಣಾಜೆ ಗ್ರಾಮಸ್ಥರು ಬೆಂಬಲ ನೀಡಲು ನಿರ್ಧಾರ

Team Udayavani, Jul 7, 2020, 7:09 PM IST

ಉಳ್ಳಾಲ: ಹರೇಕಳದಲ್ಲಿ ಸಂಪೂರ್ಣ ಲಾಕ್‍ಡೌನ್ ಮಂಗಳವಾರವೂ ಮುಂದುವರೆದಿದ್ದು, ಹರೇಕಳ ಗ್ರಾಮದ ಗಡಿ ಭಾಗದ ಜಂಕ್ಷನ್ ಪ್ರದೇಶವಾದ ಗ್ರಾಮಚಾವಡಿಯಲ್ಲಿ ಪಜೀರು ಮತ್ತು ಕೊಣಾಜೆ ಗ್ರಾಮದ ಅಂಗಡಿ ಮುಗ್ಗಟ್ಟುಗಳು ಇಂದು ತೆರೆದಿದ್ದು ಬುಧವಾರದಿಂದ ಹರೇಕಳ ಗ್ರಾಮದ ಲಾಕ್‍ಡೌನ್‍ಗೆ ಬೆಂಬಲವಾಗಿ ಪಜೀರು ಮತ್ತು ಕೊಣಾಜೆ ಗ್ರಾಮದ ಅಂಗಡಿ ಮುಗ್ಗಟ್ಟುಗಳು ಮಧ್ಯಾಹ್ನದ ಬಳಿಕ ಮುಚ್ಚಲು ವ್ಯಾಪಾರಸ್ಥರು ನಿರ್ಧರಿಸಿದ್ದಾರೆ.

ಹರೇಕಳ ಗ್ರಾಮದಲ್ಲಿ ಐದು ಜನರಿಗೆ ಸೋಂಕು ಹರಡಿದ ಹಿನ್ನಲೆಯಲ್ಲಿ ಸೋಮವಾರದಿಂದ ಗ್ರಾಮಸ್ಥರು ಪಂಚಾಯತ್ ಜನಪ್ರತಿನಿ„ಗಳು ಮತ್ತು ಸರ್ವಪಕ್ಷದ ಮುಖಂಡರು ಜಂಟಿಯಾಗಿ ಹರೇಕಳ ಲಾಕ್‍ಡೌನ್ ಆದೇಶ ಜಾರಿ ಮಾಡಿದ್ದರು. ಕಳೆದೆರಡು ದಿನಗಳಿಂದ ಹರೇಕಳ ಗ್ರಾಮದ ಮೂರು ರಸ್ತೆ ಸಂಪರ್ಕ ಪ್ರದೇಶದಲ್ಲಿ ಚೆಕ್‍ಪೋಸ್ಟ್ ನಿರ್ಮಿಸಿ 60ಕ್ಕೂ ಹೆಚ್ಚು ಯುವಕರ ತಂಡ ವಾರಿಯರ್ಸ್ ಹೆಸರಿನಲ್ಲಿ ಎರಡು ಪಾಳಿಯಲ್ಲಿ ಕರ್ತವ್ಯ ನಡೆಸುತ್ತಿದ್ದಾರೆ. ಹರೇಕಳದಾದ್ಯಂತ ಎಲ್ಲಾ ಅಂಗಡಿ ಮುಗ್ಗಟ್ಟುಗಳು 12.30 ವ್ಯಾಪಾರ ಬಂದ್ ಮಾಡಿ ಲಾಕ್‍ಡೌನ್‍ಗೆ ಸಹಕರಿಸುತ್ತಿದ್ದಾರೆ.

ಗ್ರಾಮಚಾವಡಿ ಬುಧವಾರದಿಂದ ಬಂದ್ : ಹರೇಕಳ, ಪಜೀರು ಮತ್ತು ಕೊಣಾಜೆ ಗ್ರಾಮವನ್ನು ಸಂಪರ್ಕಿಸುವ ಗ್ರಾಮಚಾವಡಿ ಜಂಕ್ಷನ್‍ನಲ್ಲಿ ಹರೇಕಳ ಗ್ರಾಮದ ಅಂಗಡಿ ಮುಂಗಟ್ಟುಗಳು ಬಂದ್ ನಡೆಸಿದರೆ ಪಜೀರು ಮತ್ತು ಕೊಣಾಜೆ ಗ್ರಾಮದ ವ್ಯಾಪಾರಸ್ಥರು ವ್ಯವಹಾರ ನಡೆಸುತ್ತಿದ್ದಾರೆ. ಗ್ರಾಮಚಾವಡಿಯಲ್ಲಿ ಎಲ್ಲಾ ಅಂಗಡಿ ಮುಗ್ಗಟ್ಟುಗಳು ಬಂದ್ ಆದರೆ ಮಾತ್ರ ಲಾಕ್‍ಡೌನ್ ಯಶಸ್ವಿಯಾಗುವ ನಿಟ್ಟಿನಲ್ಲಿ ಎರಡೂ ಗ್ರಾಮದ ವ್ಯಾಪಾರಸ್ಥರು ಬುಧವಾರದಿಂದ ವ್ಯಾಪಾರ ಸ್ಥಗಿತಗೊಳಿಸಲು ನಿರ್ದರಿಸಿದ್ದಾರೆ.