ಕುಂದಾಪುರ ರಾಷ್ಟ್ರೀಯ ಹೆದ್ದಾರಿ ಫ್ಲೈಓವರ್‌ ಕಾಮಗಾರಿ ಆರಂಭ

Team Udayavani, Apr 21, 2020, 5:20 AM IST

ಕುಂದಾಪುರ: ಲಾಕ್‌ಡೌನ್‌ ಇದ್ದರೂ ನಿರ್ಮಾಣ ಕಾಮಗಾರಿಗೆ ತೊಂದರೆಯಾಗಬಾರದು ಎಂಬ ದೃಷ್ಟಿ ಯಿಂದ ಕುಂದಾಪುರ ರಾಷ್ಟ್ರೀಯ ಹೆದ್ದಾರಿಫ್ಲೈಓವರ್‌ ಕೆಲಸ ನಡೆಸಲು ಅನುಮೋದನೆ ನೀಡಲಾಗಿದೆ. ಈ ಹಿನ್ನೆಲೆಯಲ್ಲಿ ಸೋಮವಾರದಿಂದ ಕಾಮಗಾರಿ ಆರಂಭವಾಗಿದೆ.

ಇದಕ್ಕೂ ಮುನ್ನ ಬೆರಳೆಣಿಕೆ ಕೆಲಸಗಾರರು ಕೆಲಸ ನಿರ್ವಹಿಸುತ್ತಿದ್ದರು. ಸೋಮವಾರ ಯಂತ್ರಗಳ ಮೂಲಕವೂ ಕೆಲಸ ಮುಂದುವರಿಸಲಾಗಿದೆ. ಕಾಮಗಾರಿ ಅಪೂರ್ಣ ಹಂತದಲ್ಲಿ ಉಳಿದರೆ ಮಳೆ ಬಂದಾಗ ಅಪಾರ ಹಾನಿಯಾಗಬಹುದು. ಮಳೆಗಾಲ ಪೂರ್ಣ ವಾಗುವವರೆಗೆ ಕಾಮಗಾರಿ ನಿರ್ವಹಿಸಲು ಕಾಯಬೇಕಾಗಿ ಬರಬಹುದು ಎಂದು ಈಗಲೇ ತುರ್ತು ಕಾಮಗಾರಿ ಎಂಬ ನೆಲೆಯಲ್ಲಿ ಇದಕ್ಕೆ ಸಹಾಯಕ ಕಮಿಷನರ್‌ ಅವರು ಜಿಲ್ಲಾಧಿಕಾರಿ ಬಳಿ ಅನುಮತಿ ಕೇಳಿದ್ದರು. ಇದೀಗ ಕೇಂದ್ರ ಸರಕಾರ ಕೂಡಾ ಇಂತಹ ಕಾಮಗಾರಿ ನಡೆಸಬಹುದು ಎಂದು ವಿನಾಯಿತಿ ನೀಡಿದೆ. ಇದರಂತೆ ಕೊಲ್ಲೂರು ರಸ್ತೆ, ಸೌಡ ಸೇತುವೆ ಕಾಮಗಾರಿ ಕೂಡಾ ನಡೆಯಲಿದೆ. ಈ ಕುರಿತು ಉದಯವಾಣಿ ವರದಿ ಪ್ರಕಟಿಸಿತ್ತು.