ಸಾಸ್ತಾನ: ಟೋಲ್‌ಗೇಟ್‌: ಬೆಳಗ್ಗೆ ವಾಹನ ದಟ್ಟಣೆ; ಎರಡು ಗೇಟ್‌ ವ್ಯವಸ್ಥೆಗೆ ಸೂಚನೆ

Team Udayavani, Apr 25, 2020, 5:16 AM IST

ಕೋಟ: ಸಾಸ್ತಾನ ಟೋಲ್‌ಪ್ಲಾಜಾದಲ್ಲಿ ಎರಡು ಕಡೆ ಒಂದೊಂದು ಗೇಟ್‌ಗಳ ಮೂಲಕ ವಾಹನ ಸಂಚಾರಕ್ಕೆ ಅವಕಾಶ ನೀಡಿದ್ದು ಇದರಿಂದ ಪ್ರತಿದಿನ ಬೆಳಗ್ಗೆ 11ಗಂಟೆಯ ತನಕ ಟೋಲ್‌ನಲ್ಲಿ ವಾಹನದಟ್ಟಣೆ ಹೆಚ್ಚುತ್ತಿದ್ದು ತುರ್ತು ಕಾರ್ಯಗಳಿಗೆ ತೆರಳುವವರಿಗೆ ಸಮಸ್ಯೆಯಾಗುತ್ತಿದೆ. ಉಡುಪಿ ಕಡೆ ಸಂಚರಿಸುವ ಗೇಟ್‌ನಲ್ಲೇ ಅತೀ ಹೆಚ್ಚು ದಟ್ಟಣೆ ಉಂಟಾಗುತ್ತಿದ್ದು ವಾಹನಗಳು ಟೋಲ್‌ಗೇಟ್‌ ದಾಟಲು 5-10 ನಿಮಿಷ ಬೇಕಾಗುತ್ತಿದೆ.

ಸ್ಥಳೀಯರ ದೂರಿನ ಮೇರೆಗೆ ಟೋಲ್‌ಗೆ  ಭೇಟಿ ನೀಡಿದ ಕೋಟ ಠಾಣಾಧಿಕಾರಿ ನಿತ್ಯಾನಂದ ಗೌಡ ಅವರು ಶುಕ್ರವಾರ ಟೋಲ್‌ಗೆ ಭೇಟಿ ನೀಡಿ ಎರಡು ಗೇಟ್‌ಗಳಲ್ಲಿ ವಾಹನ ಸಂಚರಿಸಲು ವ್ಯವಸ್ಥೆ ಮಾಡುವಂತೆ, ಸಾರ್ವಜನಿಕರಿಗೆ ಸಮಸ್ಯೆಯಾಗ ‌ದಂತೆ ನೋಡಿಕೊಳ್ಳುವಂತೆ ಸೂಚಿಸಿದರು.

ಫಾಸ್ಟ್ಯಾಗ್‌  ಸ್ಕ್ಯಾನರ್‌ ಕೊರತೆ
ಸ್ವಯಂಚಾಲಿತ ಫಾಸ್ಟ್ಯಾಗ್‌ ವ್ಯವಸ್ಥೆ ಸ್ಥಗಿತಗೊಂಡಿದ್ದು ಸ್ಕ್ಯಾನರ್‌ ಮೂಲಕ ಸ್ಕ್ಯಾನ್‌ ಮಾಡಿ ಶುಲ್ಕ ಪಡೆಯಬೇಕಿದೆ. ಆದರೆ ಒಂದೇ ಯಂತ್ರ ಇರುವುದರಿಂದ ಎರಡು ಗೇಟ್‌ಗಳಲ್ಲಿ ಕಾರ್ಯನಿರ್ವಹಿಸಲು ಸಾಧ್ಯವಾಗುತ್ತಿಲ್ಲ. ಹೀಗಾಗಿ ಹೆಚ್ಚುವರಿ ಯಂತ್ರದ ವ್ಯವಸ್ಥೆ ಮಾಡಿ ಬೆಳಗ್ಗೆ ಕಡ್ಡಾಯವಾಗಿ ಎರಡು ಗೇಟ್‌ಗಳನ್ನು ತೆರೆಯುವಂತೆ ಠಾಣಾಧಿಕಾರಿಗಳು ತಿಳಿಸಿದ್ದಾರೆ.