CONNECT WITH US  

ರೇಡಿಯೇಷನ್‌ ಚಿಕಿತ್ಸೆ

1.  ರೇಡಿಯೇಷನ್‌ ಚಿಕಿತ್ಸೆ ಎಂದರೇನು?
ರೇಡಿಯೇಷನ್‌ ಚಿಕಿತ್ಸೆ ಅಥವಾ ವಿಕಿರಣ ಚಿಕಿತ್ಸೆಗೆ ಸ್ಥಳೀಯವಾಗಿ "ಕರೆಂಟ್‌ ಚಿಕಿತ್ಸೆ' ಅಥವಾ ಶಾಕ್‌ ಚಿಕಿತ್ಸೆ ಎಂದು ಕರೆಯುತ್ತಾರೆ. ಆದರೆ ವಿಕಿರಣ ಚಿಕಿತ್ಸೆಯಲ್ಲಿ  ವಿದ್ಯುತ್‌/ಕರೆಂಟ್‌ ಅಥವಾ ಶಾಕ್‌ ಇರುವುದಿಲ್ಲ. ಹಾಗಾಗಿ ವಿಕಿರಣ ಚಿಕಿತ್ಸೆಗೆ ಈ ಪದಗಳು ತಪ್ಪಾಗಿ ಬಳಕೆ ಆಗುತ್ತಿವೆ ಎಂದು ಹೇಳಬಹುದು. ವಿಕಿರಣ ಚಿಕಿತ್ಸೆ ಎಂದರೆ ಅಧಿಕ ಶಕ್ತಿಯ ಎಕ್ಸ್‌-ರೇ ಅಥವಾ ಗಾಮಾ ಕಿರಣಗಳನ್ನು ಉಪಯೋಗಿಸಿಕೊಂಡು ಕೊಡುವ ಚಿಕಿತ್ಸೆ.
 
ವಿಕಿರಣ ಚಿಕಿತ್ಸೆಯಲ್ಲಿ , ಗಡ್ಡೆಗಳನ್ನು ಕುಗ್ಗಿಸಲು ಅಥವಾ ಕ್ಯಾನ್ಸರ್‌ ಕೋಶಗಳನ್ನು ನಾಶಪಡಿಸಲು ಅಧಿಕ-ಶಕ್ತಿಶಾಲಿಯಾದ ಕಿರಣವನ್ನು ಉಪಯೋಗಿಸುತ್ತಾರೆ.   

ಈ ವಿಕಿರಣ ಚಿಕಿತ್ಸೆಯಲ್ಲಿ ದೇಹದ ಹೊರಭಾಗದಿಂದ ಒಂದು ಸಾಧನವು ಕಿರಣಗಳನ್ನು ಬಿಡುಗಡೆ ಮಾಡಬಹುದು (ಎಕ್ಸ$rರ್ನಲ್‌ ಬೀಮ್‌ ರೇಡಿಯೇಷನ್‌ ತೆರಪಿ) ಅಥವಾ ಕ್ಯಾನ್ಸರ್‌ ಕೋಶದ ಪಕ್ಕದಲ್ಲಿ ಇರಿಸಿದ ವಿಕಿರಣ ಶೀಲ ಸಾಧನದಿಂದ ವಿಕಿರಣವು ಹೊರಹೊಮ್ಮಬಹುದು (ಇಂಟರ್ನಲ್‌ ರೇಡಿಯೇಷನ್‌ ತೆರಪಿ, ಇದನ್ನು ಬ್ರ್ಯಾಕಿತೆರಪಿ ಎಂದೂ ಸಹ ಕರೆಯುತ್ತಾರೆ). 

ಸಿಸ್ಟಮಿಕ್‌ ರೇಡಿಯೇಷನ್‌ ತೆರಪಿಯಲ್ಲಿ  (Systemic radiation therapy) ಚಿಕಿತ್ಸೆಗಾಗಿ ವಿಕಿರಣಶೀಲ ವಸ್ತುಗಳನ್ನು ಉಪಯೋಗಿಸುತ್ತಾರೆ, ವಿಕಿರಣಶೀಲ ಅಯೋಡಿನ್‌ ಇತ್ಯಾದಿ ವಸ್ತುಗಳಿಗೆ ವಿಕಿರಣಶೀಲ ವಸ್ತುಗಳು ಎನ್ನುತ್ತಾರೆ, ಇವು ರಕ್ತವಾಹಿನಿಯ ಮೂಲಕ ಸಾಗಿ ಕ್ಯಾನ್ಸರ್‌ ಕೋಶಗಳನ್ನು  ನಾಶಪಡಿಸುತ್ತವೆ.
  
ಎಲ್ಲಾ  ಕ್ಯಾನ್ಸರ್‌ ರೋಗಿಗಳಲ್ಲಿ ಸುಮಾರು ಅರ್ಧದಷ್ಟು ಜನರು ತಮ್ಮ ಚಿಕಿತ್ಸೆಯ ವಿವಿಧ ಹಂತಗಳಲ್ಲಿ ವಿಕಿರಣ ಚಿಕಿತ್ಸೆಯನ್ನು ಪಡೆಯುತ್ತಿರುತ್ತಾರೆ. 
 
2.  ವಿಕಿರಣ ಚಿಕಿತ್ಸೆಯು ಕ್ಯಾನ್ಸರ್‌ ಕೋಶಗಳನ್ನು ಹೇಗೆ ನಾಶಪಡಿಸುತ್ತದೆ?
ಕ್ಯಾನ್ಸರ್‌ ಕೋಶಗಳ DNA (ವಂಶವಾಹಿನಿ ಕೋಶಗಳ ಒಳಭಾಗದಲ್ಲಿರುವ ಮತ್ತು ಮುಂದಿನ ಪೀಳಿಗೆಗೆ ವರ್ಗಾವಣೆಯಾಗುವ ಮಾಹಿತಿಗಳನ್ನು ಒಳಗೊಂಡಿರುವ ಕಣಗಳು)ಯನ್ನು ನಾಶಪಡಿಸುವ ಮೂಲಕ ವಿಕಿರಣ ಚಿಕಿತ್ಸೆಯಲ್ಲಿ ಕ್ಯಾನ್ಸರ್‌ ಕೋಶಗಳನ್ನು ನಾಶಪಡಿಸಲಾಗುತ್ತದೆ. ವಿಕಿರಣ ಚಿಕಿತ್ಸೆಯು ಒಂದೋ ನೇರವಾಗಿ ಈNಅಯನ್ನು ನಾಶಪಡಿಸುತ್ತದೆ ಅಥವಾ ಕೋಶದ ಒಳಭಾಗದಲ್ಲೇ ವಿದ್ಯುತ್‌ ಕಣಗಳನ್ನು ಉತ್ಪಾದಿಸುತ್ತದೆ (ಮುಕ್ತ ಧಾತುಗಳು). ಈ ಕಣಗಳು ಈNಅಗೆ ಹಾನಿ ಉಂಟು ಮಾಡುವ ಮೂಲಕ ಅವುಗಳನ್ನು ನಾಶಪಡಿಸುತ್ತವೆ.
  
ವಿಶೇಷವಾಗಿ ಹಾನಿಗೆ ಒಳಗಾದ ಕ್ಯಾನ್ಸರ್‌ ಕಣಗಳು ಒಂದೋ ಸಾಯುತ್ತವೆ ಅಥವಾ ಮತ್ತೆ ವಿಭಜನೆಗೊಳ್ಳುವುದನ್ನು ನಿಲ್ಲಿಸುತ್ತವೆ, ಒಂದುವೇಳೆ ಹಾನಿಗೊಳಗಾದ ಕೋಶವು ನಾಶವಾದರೆ ಅದು ದೇಹದ ಸಹಜ ವಿಸರ್ಜನಾ ಪ್ರಕ್ರಿಯೆಯ ಮೂಲಕ ಹೊರಬೀಳುತ್ತದೆ. 

3.  ವಿಕಿರಣ ಚಿಕಿತ್ಸೆಯಲ್ಲಿ  ಕೇವಲ ಕ್ಯಾನ್ಸರ್‌ ಕೋಶಗಳು ಮಾತ್ರವೇ ನಾಶವಾಗುತ್ತವೆಯೇ?
ಇಲ್ಲ, ವಿಕಿರಣ ಚಿಕಿತ್ಸೆಯಲ್ಲಿ ಆರೋಗ್ಯಶಾಲಿ ಜೀವಕೋಶಗಳಿಗೂ ಸಹ ಹಾನಿಯಾಗಬಹುದು, ಈ ಹಾನಿಯು ಅಡ್ಡ ಪರಿಣಾಮದ ರೂಪದಲ್ಲಿ  ಕಾಣಿಸಿಕೊಳ್ಳಬಹುದು. 

ವಿಕಿರಣ ಕ್ಯಾನ್ಸರ್‌ ತಜ್ಞರು (Radiation Oncologists),ರೇಡಿಯೇಷನ್‌ ಚಿಕಿತ್ಸೆಯ ಯೋಜನೆಯನ್ನು ಹಾಕಿಕೊಳ್ಳುವಾಗ ಸಹಜ ಜೀವಕೋಶಗಳಿಗೆ ಆಗಬಹುದಾದ ಹಾನಿಯನ್ನು ಅಂದಾಜು ಮಾಡುತ್ತಾರೆ. ಈ ಹಂತದಲ್ಲಿ ದೇಹದ ಎಲ್ಲಾ ಭಾಗಗಳ ಸಹಜ ಅಂಗಾಂಶಗಳು ಸುರಕ್ಷಿತವಾಗಿ ಪಡೆಯಬಹುದಾದ ವಿಕಿರಣ ಪ್ರಮಾಣವನ್ನು ತಿಳಿದಿರಬೇಕಾಗುತ್ತದೆ.  ಈ ವಿವರವಾದ ಮಾಹಿತಿಗಳು ಚಿಕಿತ್ಸಾ ಅವಧಿಯಲ್ಲಿ ಯಾವ ಭಾಗಕ್ಕೆ ಕಿರಣವನ್ನು ಹಾಯಿಸಬೇಕು ಎಂದು ನಿರ್ಧರಿಸಲು ಕ್ಯಾನ್ಸರ್‌ ತಜ್ಞರಿಗೆ ಸಹಾಯ ಮಾಡುತ್ತವೆ. 
  
4.  ರೋಗಿಗಳು ವಿಕಿರಣ ಚಿಕಿತ್ಸೆಯನ್ನು ಯಾಕಾಗಿ ಪಡೆಯಬೇಕು?
ವಿಕಿರಣ ಚಿಕಿತ್ಸೆಯನ್ನು ಕೆಲವು ಸಂದರ್ಭಗಳಲ್ಲಿ ಗುಣಪಡಿಸುವ ಉದ್ದೇಶಕ್ಕಾಗಿ ನೀಡಲಾಗುವುದು (ಅಂದರೆ ವಿಕಿರಣ ಚಿಕಿತ್ಸೆಯಿಂದ ಕ್ಯಾನ್ಸರ್‌ ಅನ್ನು ಗುಣಪಡಿಸುವ ಉದ್ದೇಶದಿಂದ, ಅಂದರೆ ಒಂದೋ ಗಡ್ಡೆಯನ್ನು ನಿವಾರಿಸಿ ಅಥವಾ ಕ್ಯಾನ್ಸರ್‌ ಮರುಕಳಿಸದಂತೆ ಮಾಡಿ ಅಥವಾ ಎರಡೂ ವಿಧದಲ್ಲಿ ) ಇಂತಹ ಸಂದರ್ಭಗಳಲ್ಲಿ ಒಂಟಿಯಾಗಿ ಅಥವಾ ಶಸ್ತ್ರಚಿಕಿತ್ಸೆ, ಕೀಮೋತೆರಪಿಗಳ ಜೊತೆಗೆ ಸಂಯೋಜನೆಗೊಳಿಸಿ ಈ ಚಿಕಿತ್ಸೆಯನ್ನು ನೀಡುತ್ತಾರೆ.  
 
ವಿಕಿರಣ ಚಿಕಿತ್ಸೆಯನ್ನು ಕೆಲವು ಬಾರಿ ಶಾಮಕ ಆರೈಕೆಯ ಉದ್ದೇಶಕ್ಕಾಗಿಯೂ ಸಹ ನೀಡುತ್ತಾರೆ.  ಶಾಮಕ ಆರೈಕೆಗಳಲ್ಲಿ ರೋಗವನ್ನು ಗುಣಪಡಿಸುವ ಉದ್ದೇಶ ಇರುವುದಿಲ್ಲ. ಈ ಆರೈಕೆಗಳು ರೋಗಿಯ ರೋಗ ಲಕ್ಷಣಗಳನ್ನು ತಗ್ಗಿಸುತ್ತವೆ ಮತ್ತು  ಕ್ಯಾನ್ಸರ್‌ ಕಾಯಿಲೆಯ ನೋವಿನಿಂದ ರೋಗಿಯು ಬಳಲುವುದನ್ನು  ಕಡಿಮೆಗೊಳಿಸುತ್ತವೆ.  

ಕೆಲವು ವಿಧದ ಶಾಮಕ ವಿಕಿರಣ ಚಿಕಿತ್ಸೆಗಳು ಅಂದರೆ:

ಕ್ಯಾನ್ಸರ್‌ ಕೋಶಗಳಿಂದ ಮೆದುಳಿನಲ್ಲಿ ಮತ್ತು ದೇಹದ ಇತರ ಭಾಗಗಳಲ್ಲಿ  (ಮೆಟಾಸ್ಟೇಸಸ್‌) ಆಗಿರುವ ಗಡ್ಡೆಯನ್ನು ಕರಗಿಸಲು ಕೊಡುವ ವಿಕಿರಣ ಚಿಕಿತ್ಸೆ.

ಬೆನ್ನು ಮೂಳೆಯನ್ನು ಒತ್ತುತ್ತಿರುವ ಅಥವಾ ಮೂಳೆಯಲ್ಲಿಯೇ ಬೆಳೆಯುತ್ತಿರುವ ಮತ್ತು ನೋವುಂಟು ಮಾಡುತ್ತಿರುವ ಗಡ್ಡೆಯನ್ನು ಕುಗ್ಗಿಸಲು ವಿಕಿರಣ ಚಿಕಿತ್ಸೆಯನ್ನು ನೀಡುವುದು.

ರೋಗಿಯ ಅನ್ನಾಹಾರ ಮತ್ತು ಪಾನೀಯ ಸೇವನೆಗೆ ಅಡ್ಡಿ ಮಾಡುತ್ತಿರುವ, ಅನ್ನನಾಳದ ಹತ್ತಿರ ಇರುವ ಗಡ್ಡೆಯನ್ನು ಕುಗ್ಗಿಸಲು ಕೊಡುವ ವಿಕಿರಣ ಚಿಕಿತ್ಸೆ. 

5. ವ್ಯಕ್ತಿಗತವಾಗಿ ಒಬ್ಬ ರೋಗಿಗೆ ವಿಕಿರಣ ಚಿಕಿತ್ಸೆಯನ್ನು ಹೇಗೆ ಯೋಜಿಸುತ್ತಾರೆ?
ಚಿಕಿತ್ಸೆಯ ಯೋಜನಾ ಪ್ರಕ್ರಿಯೆಯ ಮೂಲಕ ಒಬ್ಬ ವಿಕಿರಣ ಆಂಕಾಲಜಿಸ್ಟ್‌ ರೋಗಿಯ ಚಿಕಿತ್ಸಾ ಯೋಜನೆಯನ್ನು ರೂಪಿಸುತ್ತಾರೆ. ಇದು ಸಿಮ್ಯುಲೇಶನ್‌ (sಜಿಞulಚಠಿಜಿಟn) ಮೂಲಕ ಆರಂಭವಾಗುತ್ತದೆ.
  
ಸಿಮ್ಯುಲೇಷನ್‌ ಸಂದರ್ಭದಲ್ಲಿ ಗೆಡ್ಡೆಯ ಬಿಂಬವನ್ನು (simulation) ತೆಗೆದುಕೊಳ್ಳುತ್ತಾರೆ. ಈ ಬಿಂಬದ ಸ್ಕ್ಯಾನ್‌ಗಳು ಗಡ್ಡೆ ಇರುವ ಜಾಗಗಳು ಮತ್ತು ಅದರ ಸುತ್ತಲಿನ ಸಹಜ ಜಾಗಗಳನ್ನು ತೋರಿಸುತ್ತವೆ.  ಇದರಲ್ಲಿ ಹೆಚ್ಚಾಗಿ ಕಂಪ್ಯೂಟೆಡ್‌ ಟೋಮೋಗ್ರಫಿ (CT) ಸ್ಕ್ಯಾನ್‌ಗಳು, ಮ್ಯಾಗ್ನೆಟೆಕ್‌ ರೆಸೊನೆನ್ಸ್‌ ಇಮೇಜಿಂಗ್‌ (ಎಂಆರ್‌ಐ), ಪೋಸಿಟ್ರಾನ್‌ ಎಮಿಷನ್‌ ಟೋಮೋಗ್ರಫಿ (PCU) ಮತ್ತು ಅಲ್ಟ್ರಾಸೌಂಡ್‌ ಸ್ಕ್ಯಾನ್‌ಗಳು ಇರುತ್ತವೆ. 

ವಿಕಿರಣ ಚಿಕಿತ್ಸೆಯ ಚಿಕಿತ್ಸಾ ಯೋಜನೆಯಲ್ಲಿ ಹೆಚ್ಚಾಗಿ CT ಸ್ಕ್ಯಾನ್‌ ಅನ್ನು ಉಪಯೋಗಿಸುತ್ತಾರೆ. CT ಸ್ಕ್ಯಾನ್‌ ಮಾಡುವಾಗ ಎಕ್ಸ್‌-ರೇ ಯಂತ್ರಕ್ಕೆ ಜೋಡಿಸಲಾದ ಒಂದು ಕಂಪ್ಯೂಟರ್‌ ದೇಹದ ಒಳಭಾಗದ ಚಿತ್ರಗಳನ್ನು ರಚಿಸುತ್ತದೆ.
ಸಿಮ್ಯೂಲೇಷನ್‌ ಹಂತದಲ್ಲಿ ಮತ್ತು ನಿತ್ಯದ ಚಿಕಿತ್ಸಾ ಹಂತದಲ್ಲಿ, ಪ್ರತಿ ದಿನ ರೋಗಿಯು, ಕಿರಣವನ್ನು ಬಿಡುಗಡೆ ಮಾಡುವ ಮತ್ತು ಪ್ರತಿಬಿಂಬವನ್ನು ತೆಗೆದುಕೊಳ್ಳುವ ಯಂತ್ರಕ್ಕೆ ಸಂಬಂಧಿಸಿದಂತೆ ನಿಖರವಾಗಿ ಒಂದೇ ಭಂಗಿಯಲ್ಲಿ ಇರುವುದನ್ನು ನಿಖರವಾಗಿ ಖಚಿತಪಡಿಸಿಕೊಳ್ಳುವುದು ಅತ್ಯಂತ ಆವಶ್ಯಕ. ರೋಗಿಯು ಬಳಸಬೇಕಾದ ದೇಹ ಕವಚಗಳು, ತಲೆಯ  ಮಾಸ್ಕ್ಗಳು ಅಥವಾ ಇತರ  ಸಾಧನಗಳನ್ನು ಪ್ರತಿ ರೋಗಿಯ ವೈಯ್ಯಕ್ತಿಕ ಧರಿಸುವಿಕೆಗೆ ಸುಲಭವಾಗುವಂತೆ ಪ್ರತ್ಯೇಕವಾಗಿ ರಚಿಸಬಹುದು. ರೋಗಿಯ ಭಂಗಿಯನ್ನು ನಿಖರವಾಗಿ ಗುರುತಿಸಲು ಸಾಧ್ಯವಾಗುವಂತೆ ಚರ್ಮದ ಮೇಲೆ ತಾತ್ಕಾಲಿಕ ಗುರುತುಗಳು ಅಥವಾ ಟ್ಯಾಟೂಗಳನ್ನು ಬಳಸಬಹುದು. 

ತಲೆಗೆ ಕಿರಣವನ್ನು ಪಡೆಯುವ ರೋಗಿಯು ಮಾಸ್ಕ್ ಅನ್ನು ಧರಿಸಬೇಕಾಗುವುದು. ರೋಗಿಯು ಧರಿಸುವ ಮಾಸ್ಕ್ ಆತನ ತಲೆಯು ವಿಕಿರಣ ಚಿಕಿತ್ಸೆಗೆ ಒಳಗಾಗುವಾಗ ಅತ್ತಿತ್ತ ಅಲುಗಾಡದಂತೆ ತಡೆಯುತ್ತದೆ ಮತ್ತು ಸರಿಯಾಗಿ ಒಂದೇ ಭಂಗಿಯಲ್ಲಿ ಇರಿಸುತ್ತದೆ.  

ಸಿಮ್ಯೂಲೇಷನ್‌ ಬಳಿಕ ಚಿಕಿತ್ಸೆ ನೀಡಬೇಕಾಗಿರುವ ನಿಖರವಾದ ಭಾಗ, ಗಡ್ಡೆಗೆ ಹಾಯಿಸಬೇಕಾದ ವಿಕಿರಣ ಪ್ರಮಾಣ, ಸುತ್ತಲಿನ  ಸಹಜ ಅಂಗಾಂಶಗಳಿಗೆ ಎಷ್ಟು ಪ್ರಮಾಣವನ್ನು ಬಿಡುಗಡೆ ಮಾಡಬಹುದು ಮತ್ತು ವಿಕಿರಣ ಬಿಡುಗಡೆಗೆ ಇರುವ ಸುರಕ್ಷತಾ ಕೋನಗಳು(ಹಾದಿಗಳು) ಇತ್ಯಾದಿಗಳನ್ನು ನಿರ್ಧರಿಸುತ್ತಾರೆ. 
 
ವಿಕಿರಣ ಕ್ಯಾನ್ಸರ್‌ ತಜ್ಞರ ಜೊತೆಗೆ ಕೆಲಸ ಮಾಡುವ (ಫಿಸಿಸಿಸ್ಟ್‌ ಮತ್ತು ಡಾಸ್ಮಿಮೆಟ್ರಿಸಿಸ್ಟ್ಸ್ ಗಳೂ ಸೇರಿದಂತೆ) ಸಿಬಂದಿಗಳು, ನಿಖರವಾದ ಕಿರಣ ಯೋಜನೆಯ ಮಾಹಿತಿಗಳನ್ನು ಸರಿಯಾಗಿ ರೂಪಿಸಿಕೊಳ್ಳಲು ಸುಸಜ್ಜಿತವಾದ ಕಂಪ್ಯೂಟರ್‌ಗಳನ್ನು ಉಪಯೋಗಿಸುತ್ತಾರೆ.  ಯೋಜನೆಯು ಅನುಮೋದನೆಗೊಂಡ ಬಳಿಕ ವಿಕಿರಣ ಕ್ಯಾನ್ಸರ್‌ ತಜ್ಞರು ಚಿಕಿತ್ಸೆಯನ್ನು ಆರಂಭಿಸಲು ಅಧಿಕಾರವನ್ನು ಪಡೆಯುತ್ತಾರೆ. ಚಿಕಿತ್ಸೆಯ ಮೊದಲನೆಯ ದಿನ ಮತ್ತು ಕನಿಷ್ಠ ಅದರ ಒಂದು ವಾರದ ಬಳಿಕ ಚಿಕಿತ್ಸೆಯು ಸರಿಯಾಗಿ ಬಿಡುಗಡೆಗೊಂಡಿದೆ (ವಿಕಿರಣ) ಮತ್ತು ಯೋಜನೆಯ ಹಾದಿಯಲ್ಲಿಯೇ ಸಾಗುತ್ತಿದೆ ಎಂಬುದನ್ನು ಖಚಿತಪಡಿಸಿಕೊಳ್ಳುವುದಕ್ಕಾಗಿ ಅನೇಕ ಪರೀಕ್ಷೆಗಳನ್ನು ಮಾಡುತ್ತಾರೆ.

ಕ್ಯಾನ್ಸರ್‌ ಚಿಕಿತ್ಸೆಗೆ ಬಳಸಲಾಗುವ ಕಿರಣವನ್ನು ಗ್ರೇ ಎಂಬ ಏಕಮಾನದಿಂದ ಅಳೆಯುತ್ತಾರೆ.  ಇದು ಒಂದು ಕಿ.ಗ್ರಾಂ ಮಾನವ ಅಂಗಾಂಶವು ಹೀರಿಕೊಳ್ಳಬಹುದಾದ ವಿಕಿರಣ ಶಕ್ತಿಯ ಪರಿಮಾಣ. ಬೇರೆ ಬೇರೆ ವಿಧದ ಕ್ಯಾನ್ಸರ್‌ ಕೋಶಗಳನ್ನು ನಾಶಪಡಿಸಲು ಬೇರೆ ಬೇರೆ ಪ್ರಮಾಣದ ಕಿರಣಗಳನ್ನು ಉಪಯೋಗಿಸಬೇಕಾಗುವುದು. 

ಇತರ ವಿಧಾನಗಳಿಗಿಂತ ವಿಕಿರಣವು ಸಹಜ ಜೀವಕೋಶಗಳಿಗೆ ಹೆಚ್ಚು ಸುಲಭವಾಗಿ ಹಾನಿ ಮಾಡಬಹುದು. ಉದಾಹರಣೆಗೆ ಪ್ರಜನನಾಂಗಗಳು (ವೃಷಣಗಳು ಮತ್ತು ಅಂಡಾಶಯಗಳು) ವಿಕಿರಣಕ್ಕೆ  ಮೂಳೆಗಳಿಗಿಂತಲೂ ಹೆಚ್ಚು ಸಂವೇದನಾಶೀಲವಾಗಿರುತ್ತವೆ.  ಚಿಕಿತ್ಸಾ ಯೋಜನೆಯ ಹಂತದಲ್ಲಿ ವಿಕಿರಣ ಕ್ಯಾನ್ಸರ್‌ ತಜ್ಞರು ಈ ಎಲ್ಲಾ ಮಾಹಿತಿಗಳನ್ನು ಗಣನೆಗೆ ತೆಗೆದುಕೊಳ್ಳುತ್ತಾರೆ.  

ದೇಹದ ಒಂದು ಭಾಗವು ಈಗಾಗಲೇ ಒಂದು ಸಲ ವಿಕಿರಣಕ್ಕೆ ಒಳಗಾಗಿದ್ದರೆ, ಈ ಹಿಂದೆ ಎಷ್ಟು ಪ್ರಮಾಣದ ವಿಕಿರಣವನ್ನು ಕೊಡಲಾಗಿದೆ ಎಂಬುದನ್ನು ಹೊಂದಿಕೊಂಡು, ರೋಗಿಯು ಅದೇ ಜಾಗಕ್ಕೆ ಮತ್ತೂಮ್ಮೆ ಚಿಕಿತ್ಸೆಯನ್ನು ಪಡೆಯುವುದು ಅಸಾಧ್ಯವಾಗಬಹುದು. ಒಂದುವೇಳೆ ದೇಹದ ಒಂದು ಭಾಗವು ಈಗಾಗಲೇ ಜೀವಿತಾವಧಿಯ, ಗರಿಷ್ಠ ಪ್ರಮಾಣದ, ಸುರಕ್ಷಿತ ಪ್ರಮಾಣದ ವಿಕಿರಣವನ್ನು ಪಡೆದಿದ್ದರೆ, ಈಗ ದೇಹದ ಇನ್ನೊಂದು ಭಾಗಕ್ಕೆ ವಿಕಿರಣ ಚಿಕಿತ್ಸೆಯನ್ನು ಪಡೆಯಬೇಕಾಗಿದ್ದರೆ ಈ ಎರಡು ಭಾಗಗಳ ನಡುವೆ ಸಾಕಷ್ಟು ಅಂತರ ಇರಬೇಕು.  ಎರಡು ಮುಖ್ಯ ಅಂಶಗಳಿಗಾಗಿ ಸಹಜ ಅಂಗಾಂಶಗಳಿಗೆ ಚಿಕಿತ್ಸೆಯನ್ನು ನೀಡಲಾಗುತ್ತದೆ:

ಉಸಿರಾಟದಿಂದ ಆಗುವ ದೇಹದ ಚಲನೆ ಮತ್ತು ದೋಹದೊಳಗಿನ ಅಂಗಾಂಗಗಳಲ್ಲಿ ಆಗುವ ಸಹಜ ಚಲನೆಯಿಂದಾಗಿ, ಚಿಕಿತ್ಸೆಗಳ ನಡುವೆ ಗಡ್ಡೆಯ ಸ್ಥಾನವು  ಬದಲಾಗಬಹುದಾದ ಕಾರಣಕ್ಕಾಗಿ,

ಕ್ಯಾನ್ಸರ್‌ ಕೋಶಗಳಿಂದ, ಸುತ್ತ ಮುತ್ತಲಿನ ಜೀವಕೋಶಗಳಿಗೆ  ಕ್ಯಾನ್ಸರ್‌ ಹರಡಿ ಕ್ಯಾನ್ಸರ್‌ ಮತ್ತೆ ಮರುಕಳಿಸುವುದನ್ನು ತಡೆಯಲು (ಮೈಕ್ರೋಸ್ಕೋಪಿಕ್‌ ಲೋಕಲ್‌ ಸ್ಪ್ರೆಡ್‌)
  
6.  ಒಬ್ಬ ರೋಗಿಗೆ ವಿಕಿರಣ ಚಿಕಿತ್ಸೆಯನ್ನು ಹೇಗೆ ಕೊಡುತ್ತಾರೆ?
ವಿಕಿರಣ ಚಿಕಿತ್ಸೆಯಲ್ಲಿ ದೇಹದ ಹೊರಭಾಗದಿಂದ ಒಂದು ಸಾಧನವು ಕಿರಣಗಳನ್ನು ಬಿಡುಗಡೆ ಮಾಡಬಹುದು (ಎಕ್ಸ$rರ್ನಲ್‌ ಬೀಮ್‌ ರೇಡಿಯೇಷನ್‌ ತೆರಪಿ) ಅಥವಾ ಕ್ಯಾನ್ಸರ್‌ ಕೋಶದ ಪಕ್ಕದಲ್ಲಿ ಇರಿಸಿದ ಕಿರಣ ಶೀಲ ಸಾಧನದಿಂದ ಕಿರಣವು ಹೊರಹೊಮ್ಮಬಹುದು (ಇಂಟರ್ನಲ್‌ ರೇಡಿಯೇಷನ್‌ ತೆರಪಿ, ಇದನ್ನು ಬ್ರಾಕಿತೆರಪಿ (brachytherapy) ಎಂದೂ ಸಹ ಕರೆಯುತ್ತಾರೆ). ಸಿಸ್ಟೆಮಿಕ್‌ ರೇಡಿಯೇಷನ್‌ ತೆರಪಿಯಲ್ಲಿ ಬಾಯಿ ಅಥವಾ ರಕ್ತನಾಳದ ಮೂಲಕ ಕಿರಣಶೀಲ ಅಂಶವನ್ನು ದೇಹದೊಳಕ್ಕೆ ಸೇರಿಸುತ್ತಾರೆ, ಈ ವಿಕಿರಣಶೀಲ ಅಂಶವು ರಕ್ತವಾಹಿನಿಯ ಮೂಲಕ ದೇಹದಾದ್ಯಂತ ಇರುವ ಅಂಗಾಂಶಗಳನ್ನು ತಲುಪುತ್ತದೆ.  

ವಿಕಿರಣ ಕ್ಯಾನ್ಸರ್‌ ತಜ್ಞರು ಅನೇಕ ಅಂಶಗಳನ್ನು ಆಧರಿಸಿಕೊಂಡು ರೇಡಿಯೇಷನ್‌ ತೆರಪಿಯ ಅಥವಾ ಕಿರಣ ಚಿಕಿತ್ಸೆಯ ವಿಧವನ್ನು ಸೂಚಿಸುತ್ತಾರೆ. ಅವುಗಳು ಎಂದರೆ;

ಕ್ಯಾನ್ಸರಿನ ವಿಧ.

ಕ್ಯಾನ್ಸರಿನ ಪ್ರಮಾಣ ಅಥವಾ ಗಾತ್ರ.

ದೇಹದಲ್ಲಿ ಕ್ಯಾನ್ಸರ್‌ ಆಗಿರುವ ಭಾಗ.

ವಿಕಿರಣಕ್ಕೆ ಸಂವೇದನಾಶೀಲವಾಗಿರುವ ದೇಹ ಭಾಗವು ಕ್ಯಾನ್ಸರ್‌ಗೆ ಎಷ್ಟು ಸಮೀಪದಲ್ಲಿದೆ.

ವಿಕಿರಣ ದೇಹದ ಎಷ್ಟು ದೂರ ಚಲಿಸಬೇಕು.

ರೋಗಿಯ ಸಾಮಾನ್ಯ ಆರೋಗ್ಯ ಮತ್ತು ವೈದ್ಯಕೀಯ ಹಿನ್ನೆಲೆ.

ರೋಗಿಯು ಬೇರೆ ವಿಧದ ಕ್ಯಾನ್ಸರ್‌ ಚಿಕಿತ್ಸೆಯನ್ನು ಪಡೆಯುತ್ತಿರುವನೆ.

ರೋಗಿಯ ವಯಸ್ಸು ಮತ್ತು ಇತರ ಆರೋಗ್ಯ ಸ್ಥಿತಿಗತಿಗಳೂ ಸೇರಿದಂತೆ ಇನ್ನಿತರ ಅಂಶಗಳು .

ಬಾಹ್ಯ - ಬೀಮ್‌ ವಿಕಿರಣ ಚಿಕಿತ್ಸೆ (External-beam radiation therapy)ಬಾಹ್ಯ -ಬೀಮ್‌ ವಿಕಿರಣ ಚಿಕಿತ್ಸೆಯಲ್ಲಿ  ವಿಕಿರಣವು ಹೆಚ್ಚಾಗಿ ಫೋಟಾನ್‌ ಬೀಮ್‌ ರೂಪದಲ್ಲಿ (ಒಂದೋ ಎಕ್ಸ್‌-ರೇ ಅಥವಾ ಗಾಮಾ ರೇ) ಬಿಡುಗಡೆಯಾಗುತ್ತದೆ. ಫೋಟಾನ್‌ ಎಂಬುದು ಬೆಳಕು ಮತ್ತು ಇತರ ರೂಪದ ವಿದ್ಯುತ್ಕಾಂತೀಯ ಕಿರಣದ ಮೂಲ ರೂಪ. ಇದನ್ನು ಶಕ್ತಿಯ ಭಂಡಾರ ಎಂದು ಪರಿಗಣಿಸಲಾಗುತ್ತದೆ. ಪೋಟಾನ್‌ನ ಶಕ್ತಿಯ ಪ್ರಮಾಣದಲ್ಲಿ ವ್ಯತ್ಯಾಸಗಳಾಗಬಹುದು. ಉದಾ: ಗಾಮಾ ಕಿರಣದ ಪೋಟಾನ್‌ಗಳು, ಎಕ್ಸ್‌-ಕಿರಣಗಳ ಫೋಟಾನ್‌ಗಳಿಗಿಂತ ಹೆಚ್ಚು ಶಕ್ತಿಶಾಲಿಯಾಗಿರಬಹುದು. 
 
ಅನೇಕ ರೀತಿಯ ಬಾಹ್ಯ-ಬೀಮ್‌ ಕಿರಣಗಳನ್ನು ಲೀನಿಯರ್‌ ಆಕ್ಸೆಲರೇಟರ್‌ (ಇದನ್ನು  LINAC ಎಂದು ಕರೆಯುತ್ತಾರೆ) ಎಂದು ಕರೆಯಲಾಗುವ ಯಂತ್ರದಿಂದ ಬಿಡುಗಡೆ ಮಾಡುತ್ತಾರೆ. ಒಂದು LINAC ವಿದ್ಯುತ್‌ ಅನ್ನು ಬಳಸಿಕೊಂಡು ವೇಗವಾಗಿ ಚಲಿಸುವ ಸಬ್‌-ಅಟಾಮಿಕ್‌ ಕಣಗಳ ಪ್ರವಾಹವನ್ನು ಉತ್ಪಾದಿಸುತ್ತದೆ. ಇದು ಅಧಿಕ ಶಕ್ತಿಶಾಲಿಯಾದ ವಿಕಿರಣವನ್ನು ಉತ್ಪಾದಿಸುತ್ತದೆ, ಇದನ್ನು ಕ್ಯಾನ್ಸರ್‌ ಚಿಕಿತ್ಸೆಗಾಗಿ ಬಳಸಲಾಗುತ್ತದೆ. 
 
ಕೆಲವು ವಾರಗಳ ಅವಧಿಯ ವಿಕಿರಣ ಚಿಕಿತ್ಸೆಯನ್ನು ಸಾಮಾನ್ಯವಾಗಿ ಪ್ರತಿನಿತ್ಯದಂತೆ ಅನೇಕ ಬಾರಿ ತೆಗೆದುಕೊಳ್ಳಬೇಕಾಗುವುದು. ಆದರೆ ಇದು ಎಷ್ಟು ಅವಧಿಗಳಲ್ಲಿ ತೆಗೆದುಕೊಳ್ಳಬೇಕಾಗುವುದು, ಒಟ್ಟು ಎಷ್ಟು ಪ್ರಮಾಣದ ವಿಕಿರಣವನ್ನು ನೀಡಲಾಯಿತು ಎಂಬುದನ್ನೂ ಸೇರಿಕೊಂಡು ಅನೇಕ ಅಂಶಗಳನ್ನು ಅವಲಂಬಿಸಿರುತ್ತದೆ.
   
3-ಡೈಮೆನÒನಲ್‌ ಕನಾ#ರ್ಮಲ್‌ ರೇಡಿಯೇಷನ್‌ ತೆರಪಿ 3-dimensional conformal radiation therapy (3D-CRT) ಎಂಬುದು ಬಹಳ ಸಾಮಾನ್ಯ ವಿಧದ ಬಾಹ್ಯ-ಬೀಮ್‌ ವಿಕಿರಣ ಚಿಕಿತ್ಸೆ.  ಇದರಲ್ಲಿ ಬಹಳ ಸುಸಜ್ಜಿತವಾದ ಕಂಪ್ಯೂಟರ್‌ ವ್ಯವಸ್ಥೆ ಮತ್ತು ಉದ್ದೇಶಿತ ಆವಶ್ಯಕ ಭಾಗಕ್ಕಷ್ಟೇ, ಆವಶ್ಯಕ ಪ್ರಮಾಣದ ವಿಕಿರಣವನ್ನು ಬಿಡುಗಡೆ ಮಾಡಲು ಅತ್ಯಾಧುನಿಕ ರೀತಿಯ ಚಿಕಿತ್ಸಾ ಯಂತ್ರಗಳು ಇವೆ. 

ಕ್ಯಾನ್ಸರ್‌ ಚಿಕಿತ್ಸೆಯಲ್ಲಿ ಉಪಯೋಗಿಸುವ ಇನ್ನಿತರ ಬಾಹ್ಯ-ಬೀಮ್‌ ವಿಕಿರಣ ತೆರಪಿಗಳು ಪ್ರಸ್ತುತ ಪರೀûಾ ಹಂತದಲ್ಲಿವೆ. ಆ ವಿಧಾನಗಳು ಅಂದರೆ: 
 
ಇಂಟೆನ್ಸಿಟಿ-ಮಾಡ್ಯುಲೇಟೇಡ್‌ ರೇಡಿಯೇಷನ್‌ ತೆರಪಿ (IMRT): ಇದರಲ್ಲಿ ಕಾಲಿಮೇಟರ್ಸ್‌ ಎಂದು ಕರೆಯಲಾಗುವ, ನೂರಾರು ಸಣ್ಣ ಸಣ್ಣ ಬೀಮ್‌-ಆಕೃತಿಯ ಸಾಧನಗಳು ಇರುತ್ತವೆ. ಇವು ಸಿಂಗಲ್‌ ಡೋಸ್‌ ವಿಕಿರಣವನ್ನು ಬಿಡುಗಡೆ ಮಾಡುತ್ತವೆ. ಕಾಲಿಮೇಟರ್ಸ್‌ಗಳು ಚಿಕಿತ್ಸಾ ಅವಧಿಯಲ್ಲಿ ಸ್ಥಿರವಾಗಿರಬಹುದು ಅಥವಾ ಅತ್ತಿತ್ತ ಚಲಿಸಬಹುದು. ಈ ರೀತಿಯ ಪ್ರಮಾಣ ಬದಲಾಯಿಸುವಿಕೆಯ (dose modulation) ಸೌಲಭ್ಯದಿಂದಾಗಿ, ಬೇರೆ ಬೇರೆ ಭಾಗಗಳಿಗೆ ಮತ್ತು ಗೆಡ್ಡೆಗಳಿಗೆ ಮತ್ತು ಸುತ್ತಮುತ್ತಲಿನ ಅಂಗಾಂಶಗಳಿಗೆ ಬೇರೆ ಬೇರೆ ಪ್ರಮಾಣದ ಕಿರಣವನ್ನು ಪಡೆಯಲು ಸಾಧ್ಯವಾಗುತ್ತದೆ. 

ಬೇರೆ ರೀತಿಯ ವಿಕಿರಣ ಚಿಕಿತ್ಸೆಗಳಂತೆ ಅಲ್ಲದೆ, IMRTವನ್ನು  ಹಿಮ್ಮುಖವಾಗಿ ಯೋಜಿಸಲಾಗಿದೆ (ಇದಕ್ಕೆ ವಿಲೋಮ ಚಿಕಿತ್ಸಾ ಯೋಜನೆ ಎಂಬ ಹೆಸರೂ ಸಹ ಇದೆ). ಈ ವಿಲೋಮ ಚಿಕಿತ್ಸಾ ಯೋಜನೆಯಲ್ಲಿ, ತಜ್ಞರು ಗಡ್ಡೆಯ ವಿವಿಧ ಭಾಗಗಳಿಗೆ ಮತ್ತು ಸುತ್ತಲಿನ ಭಾಗಗಳಿಗೆ ವಿಕಿರಣದ ಪ್ರಮಾಣವನ್ನು ಆರಿಸುತ್ತಾರೆ ಆಮೇಲೆ ಅಧಿಕ-ಶಕ್ತಿಶಾಲಿಯಾದ ಕಂಪ್ಯೂಟರ್‌ ಆವಶ್ಯಕ ಸಂಖ್ಯೆಯ ಬೀಮ್‌ಗಳನ್ನು ಮತ್ತು ವಿಕಿರಣವನ್ನು ಪಡೆಯಬೇಕಾದ ಕೋನವನ್ನು ಲೆಕ್ಕ ಹಾಕುತ್ತದೆ. ಇದಕ್ಕೆ ತದ್ವಿರುದ್ಧವಾಗಿ, ಪಾರಂಪರಿಕ ಚಿಕಿತ್ಸಾ ಯೋಜನೆಯಲ್ಲಿ, ವಿಕಿರಣ ಕ್ಯಾನ್ಸರ್‌ ತಜ್ಞರು ವಿಕಿರಣದ ಬೀಮ್‌ನ ಸಂಖ್ಯೆ ಮತ್ತು ಕೋನವನ್ನು ಮುಂದಾಗಿಯೇ ಆರಿಸಿರುತ್ತಾರೆ, ಪ್ರತಿಯೊಂದು ಯೋಜಿತ ಬೀಮ್‌ಗಳಿಂದ ಎಷ್ಟು ಪ್ರಮಾಣದ ವಿಕಿರಣ  ಬಿಡುಗಡೆ ಮಾಡಬೇಕು ಅನ್ನುವುದನ್ನು ಕಂಪ್ಯೂಟರ್‌ ಲೆಕ್ಕ ಹಾಕುತ್ತದೆ.
  
ಅಗತ್ಯ ಇರುವ ಭಾಗಳಿಗೆ ವಿಕಿರಣದ ಪ್ರಮಾಣವನ್ನು ಹೆಚ್ಚಿಸಿ ಅದರ ಸುತ್ತಲಿನ ಸಂವೇದನಾಶೀಲವಾದ ಸಹಜ ಅಂಗಾಂಶ ಭಾಗಗಳಿಗೆ ಕಿರಣವನ್ನು ತಗ್ಗಿಸಿ ಬಿಡುಗಡೆ ಮಾಡುವುದು IMRT  ಗುರಿಯಾಗಿರುತ್ತದೆ. ತಲೆ ಮತ್ತು ಕುತ್ತಿಗೆಗಳಿಗೆ ವಿಕಿರಣ ಚಿಕಿತ್ಸೆಯನ್ನು ನೀಡಿದಾಗ, 3D-CRT ಗೆ ಹೋಲಿಸಿದರೆ  IMRT ಯಲ್ಲಿ ಲಾಲಾರಸ ಗ್ರಂಥಿಗಳಿಗೆ ಹಾನಿಯಾಗುವ  (ಇದರಿಂದ ಬಾಯಿ ಒಣಗುವುದು ಅಥವಾ xerotomia  ಉಂಟಾಗುವುದು) ಅಪಾಯವು ಕಡಿಮೆ ಇರುತ್ತದೆ. ಹಾಗಿದ್ದರೂ ಸಹ IMRT ಯಲ್ಲಿ ಒಟ್ಟಾರೆಯಾಗಿ ದೊಡ್ಡ ಪ್ರಮಾಣದ ಸಹಜ ಅಂಗಾಂಶಗಳು ಬಹಳ ಸಮಯ ವಿಕಿರಣಕ್ಕೆ ಒಡ್ಡಿಕೊಂಡಿರಬೇಕಾಗುತ್ತದೆ. 3D-CRT  ಹೋಲಿಕೆಯಲ್ಲಿ ಗಡ್ಡೆಯ ಬೆಳವಣಿಗೆಯನ್ನು ನಿಯಂತ್ರಿಸುವುದರಲ್ಲಿ ಯಶಸ್ವಿಯೆನಿಸಿರುವ IMRT ಯು ರೋಗಿಯ ಜೀವಿತದ ದರವನ್ನು ಉತ್ತಮಪಡಿಸುವುದೇ ಎಂಬುದು ಇನ್ನಷ್ಟೇ ತಿಳಿದುಬರಬೇಕಿರುವ ವಿಚಾರ.
  
ವಿಕಿರಣ ಚಿಕಿತ್ಸೆಗಳಿಗೆ ಸಂಬಂಧಿಸಿದಂತೆ ಇತ್ತೀಚಿನ ಬೆಳವಣಿಗೆಗಳು ಅಂದರೆ, ಇಮೇಜ್‌ ಗೈಡೆಡ್‌ ರೇಡಿಯೋತೆರಪಿ, ರೇಡಿಯೋ ಸರ್ಜರಿ, ಪ್ರೋಟಾನ್‌ ತೆರಪಿ ಮತ್ತು ಸ್ಟೀರಿಯೋಟಾಕ್ಟಿಕ್‌ ರೇಡಿಯೇಷನ್‌.  

7.  ಕೆಲವು ವಿಧದ ವಿಕಿರಣ ಚಿಕಿತ್ಸೆಯನ್ನು ಅತ್ಯಂತ ಕಡಿಮೆ ಪ್ರಮಾಣದಲ್ಲಿ ಕೊಡಬೇಕಾಗುತ್ತದೆ ಯಾಕೆ?
ಬಾಹ್ಯ-ಬೀಮ್‌ ರೇಡಿಯೇಷನ್‌ ತೆರಪಿಯನ್ನು ಪಡೆಯುವ ಹೆಚ್ಚಿನ ರೋಗಿಗಳು ಹೆಚ್ಚಾಗಿ ಆಸ್ಪತ್ರೆಗೆ ಪ್ರಯಾಣಿಸಬೇಕಾಗುತ್ತದೆ ಅಥವಾ ವಾರದಲ್ಲಿ 5 ದಿನ ಹೊರರೋಗಿಯ ನೆಲೆಯಲ್ಲಿ  ವಿಕಿರಣ ಚಿಕಿತ್ಸೆಯನ್ನು ಪಡೆಯಬೇಕಾಗುತ್ತದೆ. ಒಟ್ಟು ಯೋಜನೆಯ ಒಂದು ಡೋಸ್‌ (ಸಿಂಗಲ್‌ ಫ್ರಾಕ್ಷನ್‌) ಅನ್ನು ಪ್ರತಿ ದಿನ ಕೊಡಬೇಕಾಗುವುದು. ಸಾಂದರ್ಭಿಕವಾಗಿ ಕೆಲವು ಸಲ ದಿನದಲ್ಲಿ  ಎರಡು ಡೋಸ್‌ ಅನ್ನು ಕೊಡಬೇಕಾಗುವುದು.  

ಹೆಚ್ಚಿನ ವಿಧದ ಬಾಹ್ಯ-ಬೀಮ್‌ ರೇಡಿಯೇಷನ್‌ ತೆರಪಿಗಳನ್ನು ದಿನಕ್ಕೆ ಒಂದು ಸಲದಂತೆ ಕೊಡುತ್ತಾರೆ.  ಪ್ರತಿ ದಿನ ಒಂದು ಬಾರಿ ತೆಗೆದುಕೊಳ್ಳುವುದದಕ್ಕೆ ಎರಡು ಮುಖ್ಯ ಕಾರಣಗಳಿವೆ. 

ಸಹಜ ಅಂಗಾಂಶಗಳಿಗೆ ಆಗುವ ಹಾನಿಯನ್ನು ಕಡಿಮೆಗೊಳಿಸಲು

ಜೀವಕೋಶಗಳ ಜೀವಿತದ ಆವರ್ತಕ್ಕೆ ಅನುಸಾರವಾಗಿ, ಕ್ಯಾನ್ಸರ್‌ ಕೋಶಗಳನ್ನು ನಾಶಪಡಿಸುವ ಉದ್ದೇಶಕ್ಕಾಗಿ, ಅಂದರೆ ಅವುಗಳ ಹೆಚ್ಚು ಹಾನಿಗೊಳ್ಳುವಂತೆ ಮಾಡಲು. 

ಇತ್ತೀಚೆಗೆ ದಶಕಗಳಲ್ಲಿ ಫ್ರಾಕ್ಷನೇಶನ್‌ ಅವಧಿಗಳು  ಎಂಬುದು ಎಷ್ಟು ಉಪಯುಕ್ತ ಎಂಬ ಬಗ್ಗೆ ವೈದ್ಯರುಗಳು ಪರೀಕ್ಷೆಯನ್ನು ಮಾಡಿದ್ದಾರೆ, ಅವುಗಳೆಂದರೆ,

ಆಕ್ಸಲರೇಷನ್‌ ಫ್ರಾಕ್ಷನೇಶನ್‌ - ಚಿಕಿತ್ಸೆ ಪಡೆಯಬೇಕಾಗಿರುವ ವಾರಗಳನ್ನು ಕಡಿಮೆ ಮಾಡಲು ದೈನಿಕ ಅಥವಾ ವಾರದ ಡೋಸ್‌ಗಳನ್ನು ಹೆಚ್ಚಿಸುವುದು.

ಹೈಪಫ್ರಾìಕ್ಷನೇಶ‌ನ್‌ - ದಿನದಲ್ಲಿ ಒಂದಕಿಂತ ಹೆಚ್ಚು ಸಲ ಸಣ್ಣ ಸಣ್ಣ ಡೋಸ್‌ ಕಿರಣವನ್ನು ಕೊಡುವುದು.

ಹೈಪೋಫ್ರಾìಕ್ಷನೇಶ‌ನ್‌ - ಚಿಕಿತ್ಸೆಯ ಸಂಖ್ಯೆಯನ್ನು ಕಡಿಮೆ ಮಾಡಲು, ಒಂದು ದಿನದಲ್ಲಿ ಒಂದು ಸಲ ದೊಡ್ಡ ಡೋಸ್‌ಗಳನ್ನು ಕೊಡುವುದು. 

ಬೇರೆ ಬೇರೆ ರೀತಿಯ ಚಿಕಿತ್ಸಾ ಫ್ರಾ$Âಕ್ಷನೇಷನ್‌ಗಳು ಇತರ  ಪಾರಂಪರಿಕ ಪ್ರಾಕ್ಷನೇಶ‌ನ್‌ಗಳಿಗಿಂತ ಹೆಚ್ಚು ಪ್ರಭಾವಶಾಲಿಯಾಗಿರುತ್ತವೆ ಅಥವಾ ಅಷ್ಟೇ ಪ್ರಭಾವಶಲಿಯಾಗಿದ್ದು ಹೆಚ್ಚು ಅನುಕೂಲಕರವಾಗಿರುತ್ತವೆ ಎಂಬುದು ಸಂಶೋಧಕರ ಅಭಿಪ್ರಾಯವಾಗಿದೆ. 

8.  ರೋಗಿಯು ಯಾವಾಗ ವಿಕಿರಣ ಚಿಕಿತ್ಸೆಯನ್ನು ಪಡೆಯಬಹುದು?
ಶಸ್ತ್ರ ಚಿಕಿತ್ಸೆಯ ಸಂದರ್ಭದಲ್ಲಿ, ಶಸ್ತ್ರಚಿಕಿತ್ಸೆಯ ನಂತರ ಮತ್ತು ಶಸ್ತ್ರ ಚಿಕಿತ್ಸೆಗೆ ಮೊದಲು ರೋಗಿಯು ವಿಕಿರಣ ಚಿಕಿತ್ಸೆಯನ್ನು ಪಡೆಯಬಹುದು. ಕೆಲವು ರೋಗಿಗಳು ಶಸ್ತ್ರಚಿಕಿತ್ಸೆ ಅಥವಾ ಇತರ ಚಿಕಿತ್ಸೆಗಳು ಇಲ್ಲದೆಯೂ ಸಹ ಒಂಟಿಯಾಗಿ ಕಿರಣ ಚಿಕಿತ್ಸೆಯನ್ನು ಪಡೆಯಬಹುದು. ಕೆಲವು ರೋಗಿಗಳಿಗೆ ಕಿರಣ ಚಿಕಿತ್ಸೆ ಮತ್ತು ಕೀಮೋತೆರಪಿಯನ್ನು ಒಟ್ಟೊಟ್ಟಿಗೆ ಕೊಡುತ್ತಾರೆ. ರೇಡಿಯೇಷನ್‌ ಚಿಕಿತ್ಸೆಯ ವಿಧವು, ಚಿಕಿತ್ಸೆ ನೀಡಬೇಕಾಗಿರುವ ಕ್ಯಾನ್ಸರಿನ ವಿಧ ಮತ್ತು ಚಿಕಿತ್ಸೆಯ ಉದ್ದೇಶವನ್ನು ಅವಲಂಬಿಸಿದೆ (ಗುಣಪಡಿಸುವುದು ಅಥವಾ ಶಾಮಕ)ಶಸ್ತ್ರಚಿಕಿತ್ಸೆಗೆ ಮೊದಲು ಕೊಡುವ ವಿಕಿರಣ ಚಿಕಿತ್ಸೆಗೆ ಪ್ರಿ-ಆಪರೇಟಿವ್‌ ಅಥವಾ ಶಸ್ತ್ರಚಿಕಿತ್ಸಾ-ಪೂರ್ವ ಅಥವಾ ನಿಯೋಅಡ್ಯುಜುಯೆಂಟ್‌ ವಿಕಿರಣ ಎಂದು ಹೆಸರು. ಈ ಸಂದರ್ಭದಲ್ಲಿ ಗಡ್ಡೆಯನ್ನು ಕುಗ್ಗಿಸಲು ವಿಕಿರಣವನ್ನು ಕೊಡುತ್ತಾರೆ ಮತ್ತು ಆಮೇಲೆ ಶಸ್ತ್ರಚಿಕಿತ್ಸೆಯ ಮೂಲಕ ಗಡ್ಡೆಯನ್ನು ತೆಗೆದು ಹಾಕುತ್ತಾರೆ,  ಆದರೆ ಶಸ್ತ್ರ ಚಿಕಿತ್ಸೆಯ ಬಳಿಕ ಆ ಗಡ್ಡೆ ಮರುಕಳಿಸುವ ಸಾಧ್ಯತೆ ಕಡಿಮೆ ಇರುತ್ತದೆ. 

ಶಸ್ತ್ರಚಿಕಿತ್ಸಾ ಅವಧಿಯಲ್ಲಿ ಕೊಡಲಾಗುವ ವಿಕಿರಣ ಚಿಕಿತ್ಸೆಗೆ ಇಂಟ್ರೋಆಪರೇಟಿವ್‌ ರೇಡಿಯೇಷನ್‌ ತೆರಪಿ (intraoperative radiation therapy (IORT) ಎಂದು ಹೆಸರು.  ಇದು ಬಾಹ್ಯ-ಬೀಮ್‌ ವಿಕಿರಣ ಚಿಕಿತ್ಸೆಯ ರೂಪದಲ್ಲಿ ಇರಬಹುದು ( ಫೋಟಾನ್‌ ಅಥವಾ ಎಲೆಕ್ಟ್ರಾನ್‌ ಜೊತೆ) ಅಥವಾ ಬ್ರಾಕಿತೆರಪಿ ಆಗಿರಬಹುದು. ಶಸ್ತ್ರಚಿಕಿತ್ಸಾ ಅವಧಿಯಲ್ಲಿ ಕಿರಣ ನೀಡುವುದಾದರೆ ಆಗ ಸಮೀಪದ ಅಂಗಾಂಶಗಳಿಗೆ ವಿಕಿರಣ ಹಾಯುವುದನ್ನು ತಪ್ಪಿಸಲು ಭೌತಿಕವಾಗಿ ಪ್ರತ್ಯೇಕಿಸುತ್ತಾರೆ ಅಥವಾ ಆ ಭಾಗಗಳನ್ನು ಮುಚ್ಚುತ್ತಾರೆ. ಒಂದು ವೇಳೆ ಸಹಜ ರಚನೆಗಳು ಗಡ್ಡೆಗೆ ಅತ್ಯಂತ ಸಮೀಪದಲ್ಲಿದ್ದರೆ ಶಸ್ತ್ರಚಿಕಿತ್ಸಾ ಹಂತದಲ್ಲಿ ಬಾಹ್ಯ-ಬೀಮ್‌ ಕಿರಣ ಚಿಕಿತ್ಸೆಯನ್ನು ಉಪಯೋಗಿಸುತ್ತಾರೆ. 

ಶಸ್ತ್ರಚಿಕಿತ್ಸೆಯ ಬಳಿಕ ವಿಕಿರಣ ಚಿಕಿತ್ಸೆಯನ್ನು ನೀಡುವುದನ್ನು ಅಡುj$Âವೆಂಟ್‌ ತೆರಪಿ ಅಥವಾ ಶಸ್ತ್ರಚಿಕಿತ್ಸಾ ನಂತರದ ಚಿಕಿತ್ಸೆ ಎಂದು ಕರೆಯುತ್ತಾರೆ. 
 
ಕೆಲವು ವಿಧದ ಸಂಕೀರ್ಣ ಶಸ್ತ್ರ ಚಿಕಿತ್ಸೆಗಳ ಬಳಿಕ ವಿಕಿರಣ ಚಿಕಿತ್ಸೆಯನ್ನು ನೀಡುತ್ತಾರೆ ( ಹೆಚ್ಚಾಗಿ ಕಿಬ್ಬೊಟ್ಟೆ ಮತ್ತು ಪೆಲ್ವಿಸ್‌ ಶಸ್ತ್ರಚಿಕಿತ್ಸೆಯ ಬಳಿಕ) ಆದರೆ ಇದರಿಂದ ಅನೇಕ ಅಡ್ಡ ಪರಿಣಾಮಗಳು ಉಂಟಾಗಬಹುದಾದ ಸಾಧ್ಯತೆಗಳು ಇವೆ.  ಹಾಗಾಗಿ ಇಂತಹ ಸಂದರ್ಭಗಳಲ್ಲಿ ಶಸ್ತ್ರಚಿಕಿತ್ಸೆಗೆ ಮೊದಲೇ ವಿಕಿರಣ ಚಿಕಿತ್ಸೆಯನ್ನು ಪಡೆದರೆ ಒಳ್ಳೆಯದು. 

ಕೀಮೋತೆರಪಿ ಮತ್ತು ವಿಕಿರಣ ಚಿಕಿತ್ಸೆಯನ್ನು ಒಟ್ಟಾಗಿ ಕೊಡುವುದನ್ನು ಕೀಮೋರೇಡಿಯೇಷನ್‌ ಅಥವಾ ರೇಡಿಯೋಕೀಮೋತೆರಪಿ ಎಂಬ ಹೆಸರಿನಿಂದ ಕರೆಯುತ್ತಾರೆ. ಕೆಲವು ವಿಧದ ಕ್ಯಾನ್ಸರ್‌ಗಳಲ್ಲಿ ಈ ಎರಡೂ ಚಿಕಿತ್ಸೆಗಳನ್ನು ಒಟ್ಟಾಗಿ ಕೊಡುವ ಮೂಲಕ ಹೆಚ್ಚು ಕ್ಯಾನ್ಸರ್‌ ಕೋಶಗಳನ್ನು ನಾಶಪಡಿಸಲು ಸಾಧ್ಯವಾಗುತ್ತದೆ ಆದರೆ ಇದರಲ್ಲಿ ಅಡ್ಡ ಪರಿಣಾಮಗಳೂ ಸಹ ಅಷ್ಟೇ ಪ್ರಮಾಣದಲ್ಲಿ ಇರುತ್ತವೆ.   

ಕ್ಯಾನ್ಸರ್‌ ಚಿಕಿತ್ಸೆಯ ಬಳಿಕ, ರೋಗಿಯ ಆರೋಗ್ಯ ಮತ್ತು ಕ್ಯಾನ್ಸರ್‌ ಮರುಕಳಿಕೆಯ  ಸಾಧ್ಯತೆಗಳು ಇವೆಯೇ ಎಂಬುದರ ನಿಗಾವಣೆಗಾಗಿ ರೋಗಿಯು  ಕ್ಯಾನ್ಸರ್‌ ತಜ್ಞರ  ನಿಯುತ ಫಾಲೋ-ಅಪ್‌ ನಲ್ಲಿ ಇರಬೇಕಾಗುತ್ತದೆ. 

ವಿಕಿರಣ ಚಿಕಿತ್ಸೆಯಿಂದ ಒಬ್ಬ ವ್ಯಕ್ತಿ ವಿಕಿರಣಶೀಲನಾಗುತ್ತಾನೆಯೇ?

ಬಾಹ್ಯ - ಬೀಮ್‌ ವಿಕಿರಣವು ರೋಗಿಯನ್ನು ವಿಕಿರಣಶೀಲನನ್ನಾಗಿಸುವುದಿಲ್ಲ.  

ತಾತ್ಕಾಲಿಕ ಬ್ರಾಕಿತೆರಪಿಯಲ್ಲಿ, ವಿಕಿರಣಶೀಲ ವಸ್ತುಗಳು ದೇಹದ ಒಳಭಾಗದಲ್ಲಿ ಇರುವ ಕಾರಣ ರೋಗಿಯು ವಿಕಿರಣಶೀಲನಾಗಿರುತ್ತಾನೆ, ವಿಕಿರಣಶೀಲ ವಸ್ತುವನ್ನು ಹೊರತೆಗೆದ ಕೂಡಲೇ, ರೋಗಿಯಲ್ಲಿ ವಿಕಿರಣಶೀಲತೆ ಇರುವುದಿಲ್ಲ.  ತಾತ್ಕಾಲಿಕ ಬ್ರಾಕಿತೆರಪಿ ತೆಗೆದುಕೊಳ್ಳುವ ರೋಗಿಯು ಸಾಮಾನ್ಯವಗಿ ಆಸ್ಪತ್ರೆಯಲ್ಲಿ, ಇತರ ರೋಗಿಗಳಿಂದ ಪ್ರತ್ಯೇಕವಾಗಿ, ಒಂದು ವಿಶೇಷ ಕೊಠಡಿಯಲ್ಲಿ ಇರಬೇಕಾಗುತ್ತದೆ. 

ಶಾಶ್ವತ ಬ್ರಾಕಿತೆರಪಿಯ (permanent brachytherapy)  ಅವಧಿಯಲ್ಲಿ, ರೋಗಿಯ ದೇಹದ ಒಳಭಾಗದಲ್ಲಿ ಅಳವಡಿಸಿದ ವಸ್ತುವಿನಲ್ಲಿ, ವಿಕಿರಣಶೀಲ ಮೂಲ-ಅಂಶವನ್ನು ಇರಿಸಿದ ಕೆಲವು ದಿನಗಳ, ವಾರಗಳ ಅಥವಾ ತಿಂಗಳುಗಳವರೆಗೆ, ಅವರ ದೇಹವು  ವಿಕಿರಣಶೀಲವಾಗಿರುತ್ತದೆ.  ಈ ಹಂತದಲ್ಲಿ ರೋಗಿಯು ವಿಕಿರಣಶೀಲನಾಗಿರುತ್ತಾನೆ.  ಹಾಗಿದ್ದರೂ ಸಹ ಚರ್ಮದ ಮೇಲ್‌ ಪದರವನ್ನು ತಲುಪುವ ವಿಕಿರಣವು ಸಾಮಾನ್ಯವಾಗಿ ಬಹಳ ಕಡಿಮೆ ಪ್ರಮಾಣದ್ದಾಗಿರುತ್ತದೆ. ಹಾಗಿದ್ದರೂ ಸಹ ಈ ವಿಕಿರಣವನ್ನು ವಿಕಿರಣ ಮಾನಿಟರ್‌ಗಳಿಂದ ಪತ್ತೆ ಮಾಡುವುದು ಸಾಧ್ಯವಿದೆ ಹಾಗಾಗಿ ಇಂತಹ ರೋಗಿಗಳಿಂದ ಗರ್ಭಿಣಿಯರನ್ನು ಮತ್ತು ಎಳೆಯ ಮಕ್ಕಳನ್ನು ಕೆಲವು ದಿನಗಳು ಅಥವಾ ವಾರಗಳವರೆಗೆ ದೂರ ಇರಿಸಬೇಕಾಗಿಸುತ್ತದೆ. 

ಕೆಲವು ವಿಧದ ಸಿಸ್ಟೆಮಿಕ್‌ ವಿಕಿರಣ ತೆರಪಿಯನ್ನು ಪಡೆಯುತ್ತಿರುವ ರೋಗಿಗಳ ವಿಸರ್ಜನೆಗಳ (ಲಾಲಾರಸ, ಮೂತ್ರ, ಮಲ, ಬೆವರು ಇತ್ಯಾದಿ) ಮೂಲಕ ತಾತ್ಕಾಲಿಕವಾಗಿ, ಅಲ್ಪ$ಪ್ರಮಾಣದ ವಿಕಿರಣವು ಹೊರಬೀಳುತ್ತಿರುತ್ತದೆ.  ಹಾಗಾಗಿ ಈ ರೀತಿಯ ಸಿಸ್ಟಮಿಕ್‌ ವಿಕಿರಣ ಚಿಕಿತ್ಸೆಯನ್ನು ಪಡೆಯುತ್ತಿರುವ ರೋಗಿಗಳು ತಾವು ಚಿಕಿತ್ಸೆ ಪಡೆಯುತ್ತಿರುವ ಈ ಅವಧಿಯಲ್ಲಿ ಇತರ ಜನಗಳಿಂದ,  ಅದರಲ್ಲೂ  ವಿಶೇಷವಾಗಿ 18 ವರ್ಷಕ್ಕಿಂತ ಕೆಳಗಿನ ಮಕ್ಕಳಿಂದ ಮತ್ತು ಗರ್ಭಿಣಿ ಮಹಿಳೆಯರ ಸಂಪರ್ಕದಿಂದ ದೂರ ಇರಬೇಕಾಗುತ್ತದೆ.

9.  ವಿಕಿರಣ ಚಿಕಿತ್ಸೆಯ ಸಂಭಾವ್ಯ ಅಡ್ಡ ಪರಿಣಾಮಗಳು ಯಾವುವು?
ವಿಕಿರಣ ಚಿಕಿತ್ಸೆಯು ಆರಂಭಿಕ (ತೀವ್ರ) ಮತ್ತು ನಂತರದ (ದೀರ್ಘ‌ಕಾಲಿಕ) ಎನ್ನುವ ಎರಡು ರೀತಿಯ ಅಡ್ಡ ಪರಿಣಾಮಗಳನ್ನು ಉಂಟು ಮಾಡಬಹುದು. ಆರಂಭಿಕ ಅಡ್ಡ ಪರಿಣಾಮಗಳು ಚಿಕಿತ್ಸೆಯ ಅವಧಿಯಲ್ಲಿಯೇ ಕಾಣಿಸಿಕೊಂಡರೆ, ದೀರ್ಘ‌ಕಾಲಿಕ ಅಡ್ಡ ಪರಿಣಾಮಗಳು ಚಿಕಿತ್ಸೆ ಪಡೆದ ನಂತರದ ಕೆಲವು ತಿಂಗಳಲ್ಲಿ ಅಥವಾ ವರ್ಷಗಳ ನಂತರ ಕಾಣಿಸಿಕೊಳ್ಳಬಹುದು. ಚಿಕಿತ್ಸೆಯನ್ನು ಪಡೆದ ದೇಹಭಾಗ, ಪ್ರತಿ ದಿನ ಪಡೆದ ವಿಕಿರಣದ ಪ್ರಮಾಣ, ಕೊಡಲಾದ ಒಟ್ಟು  ವಿಕಿರಣದ ಪ್ರಮಾಣ, ರೋಗಿಯ ಒಟ್ಟಾರೆ ಆರೋಗ್ಯ ಸ್ಥಿತಿಗತಿ ಮತ್ತು ಅದೇ ಸಂದರ್ಭದಲ್ಲಿ ಕೊಡಲಾದ ಇತರ ಚಿಕಿತ್ಸೆಗಳು ಇತ್ಯಾದಿ ಅಂಶಗಳನ್ನು ಅವಲಂಬಿಸಿಕೊಂಡು ಅಡ್ಡ ಪರಿಣಾಮಗಳು ಕಾಣಿಸಿಕೊಳ್ಳಬಹುದು.

ವಿಕಿರಣದ ಆರಂಭಿಕ ಅಡ್ಡ ಪರಿಣಾಮಗಳ ಪರಿಣಾಮವಾಗಿ, ಚಿಕಿತ್ಸೆಯನ್ನು ಪಡೆದ ಭಾಗದ ಸುತ್ತಲಿನ ಸಹಜ ಕೋಶಗಳು ಕ್ಷಿಪ್ರವಾಗಿ ವಿಭಜನೆಗೊಳ್ಳುವ ಮೂಲಕ ಹಾನಿಗೊಳ್ಳಬಹುದು. ಚರ್ಮದ ಕಿರಿಕಿರಿಯ ರೂಪದಲ್ಲಿ ಇದು ಕಾಣಿಸಿಕೊಳ್ಳಬಹುದು ಅಥವಾ ವಿಕಿರಣ ಬೀಮ್‌ ಗಳಿಗೆ ಒಡ್ಡಿಕೊಂಡ ಭಾಗಗಳಿಗೆ ಆಗುವ ಹಾನಿಯ ರೂಪದಲ್ಲಿ ಅಡ್ಡ ಪರಿಣಾಮಗಳು ಕಾಣಿಸಿಕೊಳ್ಳಬಹುದು. 

ಉದಾಹರಣೆಗೆ ತಲೆ ಅಥವಾ ಕುತ್ತಿಗೆಯ ಭಾಗಗಳಿಗೆ ಕಿರಣವನ್ನು ಪಡೆದಾಗ, ಲಾಲಾರಸ ಗ್ರಂಥಿಗಳಿಗೆ ಆಗುವ ಹಾನಿ ಅಥವಾ ತಲೆಕೂದಲು ಉದುರುವುದು   ಅಥವಾ ಕೆಳ ಕಿಬ್ಬೊಟ್ಟೆಯ ಭಾಗಕ್ಕೆ ಚಿಕಿತ್ಸೆಯನ್ನು ಪಡೆದರೆ ಮೂತ್ರವಿಸರ್ಜನೆಯ ತೊಂದರೆಗಳಾಗುವುದು ಇತ್ಯಾದಿ.
 
ಹೆಚ್ಚಿನ ಆರಂಭಿಕ ಅಡ್ಡ ಪರಿಣಾಮಗಳು ಚಿಕಿತ್ಸೆ ಕೊನೆಗೊಂಡ ಬಳಿಕ ಮರೆಯಾಗುತ್ತವೆ,  ಆದರೆ ಕೆಲವು ( ಲಾಲಾರಸ ಗ್ರಂಥಿಗಾಗುವ ಹಾನಿ ಇತ್ಯಾದಿ) ರೀತಿಯ ಅಡ್ಡ ಪರಿಣಾಮಗಳು ಶಾಶ್ವತವಾಗಿರಬಹುದು. ಯಾವುದೇ ಭಾಗಕ್ಕೆ ವಿಕಿರಣ ಚಿಕಿತ್ಸೆಯನ್ನು ಪಡೆದರೂ ಸಹ ಅದರಲ್ಲಿ ಆಯಾಸ ಎಂಬುದು  ಬಹಳ ಸಾಮಾನ್ಯವಾಗಿ ಬಾಧಿಸುವ ಅಡ್ಡ ಪರಿಣಾಮವಾಗಿರುತ್ತದೆ. ಕಿಬ್ಬೊಟ್ಟೆ ಅಥವಾ ಮೆದುಳಿಗೆ ಚಿಕಿತ್ಸೆಯನ್ನು ಪಡೆದರೆ ವಾಕರಿಕೆ ಅಥವಾ ವಾಂತಿಯು ಬಹಳ ಸಾಮಾನ್ಯವಾಗಿ ಬಾಧಿಸುತ್ತದೆ.  ಚಿಕಿತ್ಸಾ ಅವಧಿಯಲ್ಲಿ ಬಾಧಿಸುವ ವಾಕರಿಕೆ ಅಥವಾ ವಾಂತಿಯಿಂದ ಉಪಶಮನವನ್ನು ಪಡೆಯಲು ಔಷಧಿಗಳು ಲಭ್ಯ ಇವೆ. 

ವಿಕಿರಣ ಚಿಕಿತ್ಸೆಯ ಅನಂತರ ಅಡ್ಡಪರಿಣಾಮಗಳು ಇರಬಹುದು ಅಥವಾ ಇಲ್ಲದಿರಬಹುದು. ದೇಹದ ಯಾವ ಭಾಗಕ್ಕೆ ವಿಕಿರಣ ಚಿಕಿತ್ಸೆಯನ್ನು ಕೊಡಲಾಗಿದೆ ಎಂಬುದನ್ನು  ಅವಲಂಬಿಸಿಕೊಂಡು ನಂತರ ಉಂಟಾಗಬಹುದಾದ ಅಡ್ಡ ಪರಿಣಾಮಗಳು ಅಂದರೆ(1).
 
ಫೈಬ್ರೋಸಿಸ್‌ (ಸಹಜ ಅಂಗಾಂಶಕ್ಕೆ  ಹಾನಿಯಾಗುವುದು ಮತ್ತು ಬಾಧಿತ ಭಾಗದ ಚಲನವಲನ ಕಷ್ಟವಾಗುವುದು.) 

ಮಲವಿಸರ್ಜನೆಗೆ ತೊಂದರೆಯಾಗುವುದು, ಭೇದಿ ಅಥವಾ ರಕ್ತಸ್ರಾವ ಉಂಟಾಗುವುದು. 

ನೆನಪಿನ ಶಕ್ತಿ ಕುಂದುವುದು

ನಪುಂಸಕತ್ವ (ಸಂತಾನ ಹೀನತೆ) 

ಅಪರೂಪಕ್ಕೆ ಕ್ಯಾನ್ಸರ್‌ ಮರುಕಳಿಸುವುದು ( ಕಿರಣಕ್ಕೆ ಒಡ್ಡಿಕೊಂಡ ಕಾರಣದಿಂದ)

ವಿಕಿರಣ ಚಿಕಿತ್ಸೆಯಲ್ಲಿ ತಲೆಗೆ ಧರಿಸುವ ಮಾಸ್ಕ್.  ತಲೆಗೆ ವಿಕಿರಣ ಚಿಕಿತ್ಸೆಯನ್ನು ಪಡೆಯುವ ರೋಗಿಗೆ ಈ ಮಾಸ್ಕ್ ಆವಶ್ಯಕ. ಈ ಮಾಸ್ಕ್ ತಲೆಯು ಅತ್ತಿತ್ತ ಅಲುಗಾಡುವುದನ್ನು ತಡೆಯುತ್ತದೆ ಹಾಗಾಗಿ ರೋಗಿಯು, ಪ್ರತೀ ಚಿಕಿತ್ಸೆಯ ಸಂದರ್ಭದಲ್ಲಿಯೂ ಒಂದೇ ಭಂಗಿಯಲ್ಲಿ ಇರಲು ಸಾಧ್ಯವಾಗುತ್ತದೆ. 

ಕಂಪ್ಯೂಟೆಡ್‌ ಟೋಮೋಗ್ರಫಿ ಸ್ಕ್ಯಾನರ್‌ . ವಿಕಿರಣ ಚಿಕಿತ್ಸೆಯ ಯೋಜನೆಗಳಲ್ಲಿ ಹೆಚ್ಚಾಗಿ ಇಖ ಸ್ಕ್ಯಾನ್‌ಗಳನ್ನು ಉಪಯೋಗಿಸುತ್ತಾರೆ.  ಇಖ ಸ್ಕ್ಯಾನ್‌ ಸಂದರ್ಭದಲ್ಲಿ, ದೇಹದ ಒಳಗಿನ ಭಾಗಗಳ ಚಿತ್ರಗಳು, ಕಂಪ್ಯೂಟರ್‌ಗೆ ಜೋಡಣೆಯಾದ ಎಕ್ಸ್‌-ರೇ ಯಂತ್ರದಲ್ಲಿ ರಚನೆಯಾಗುತ್ತವೆ. 

ಮುಂದಿನ  ವಾರಕ್ಕೆ
 
ಡಾ| ಎಂ. ಎಸ್‌. ವಿದ್ಯಾಸಾಗರ್‌,  
ಪ್ರೊಫೆಸರ್‌,  ರೆಡಿಯೋ ತೆರಪಿ ಮತ್ತು ಆಂಕಾಲಜಿ ವಿಭಾಗ, ಕೆ.ಎಂ.ಸಿ., ಮಣಿಪಾಲ.

 

Trending videos

Back to Top