CONNECT WITH US  

ಥಾಲಸೇಮಿಯಾ

ಥಾಲಸೇಮಿಯಾ ಅನ್ನುವುದು ರಕ್ತವನ್ನು ಬಾಧಿಸುವ ಒಂದು ವಂಶವಾಹಿನಿ ರೋಗ ಸ್ಥಿತಿ.  ಥಾಲಸೇಮಿಯಾ ರೋಗ ಪರಿಸ್ಥಿತಿಯಲ್ಲಿ ಬೇರೆ ಬೇರೆ ವಿಧಗಳಿದ್ದು, ಸೌಮ್ಯ ಪರಿಸ್ಥಿತಿಯೊಂದಿಗೆ ರೋಗಲಕ್ಷಣಗಳೆ ಇಲ್ಲದಿರುವ ಸ್ಥಿತಿಯಿಂದ ಹಿಡಿದು, ತೀವ್ರವಾದ ಮಾರಣಾಂತಿಕ ರೋಗ ಪರಿಸ್ಥಿತಿಯೂ ಇರಬಹುದು.ತೀವ್ರ ರೂಪದ ಥಾಲಸೇಮಿಯಾಕ್ಕೆ  ಆಧುನಿಕ ಚಿಕಿತ್ಸಾ  ವಿಧಾನಗಳಿಂದ ಉತ್ತಮ ರೀತಿಯ  ಚಿಕಿತ್ಸೆಯನ್ನು ಪಡೆಯಬಹುದು. ಆದರೆ ಜೀವನಪರ್ಯಂತ ಚಿಕಿತ್ಸೆ ಮತ್ತು ನಿಗಾವಣೆ ವಹಿಸುವುದು ಅತ್ಯಾವಶ್ಯಕ.  

ಈ ರೋಗಪರಿಸ್ಥಿತಿಯ ಕಾರಣದಿಂದಾಗಿ ತೊಂದರೆಗಳು ಉಂಟಾಗುವುದನ್ನು ತಡೆಯಲು ಉತ್ತಮ ಚಿಕಿತ್ಸೆ ಅತ್ಯಾವಶ್ಯಕ.  ರಕ್ತಪರೀಕ್ಷೆಯ ಮೂಲಕ ಥಾಲಸೇಮಿಯಾವನ್ನು ಪತ್ತೆ ಮಾಡಬಹುದು. ಗರ್ಭಿಣಿ ಮಹಿಳೆಯರು ಮತ್ತು ಮಗುವನ್ನು ಪಡೆಯಬೇಕೆಂಬ ಯೋಜನೆಯಲ್ಲಿ ಇರುವ ದಂಪತಿಗಳು ಥಾಲಸೇಮಿಯಾ ಪರೀಕ್ಷೆ ಮಾಡಿಸಿಕೊಳ್ಳಬೇಕು ಎಂಬ ಸಲಹೆಯನ್ನು ನೀಡಲಾಗುತ್ತದೆ, ಬೇಗನೇ ಈ ರೋಗಸ್ಥಿತಿಯ ಪತ್ತೆ ಸಾಧ್ಯವಾದರೆ, ಬಹಳ ಉಪಯುಕ್ತ ಎನಿಸಬಹುದು.
 
ಜೆನೆಟಿಕ್‌ ವ್ಯತ್ಯಾಸದ ಕಾರಣದಿಂದಾಗಿ ಥಾಲಸೇಮಿಯಾ ಉಂಟಾಗುತ್ತದೆ.  ಒಂದು ಪ್ರಮುಖ ರಾಸಾಯನಿಕ ಎನಿಸಿರುವ ಹೆಮೊಗ್ಲೋಬಿನ್‌ ಅನ್ನು ಶರೀರವು ಹೇಗೆ ಉತ್ಪಾದಿಸಬೇಕು ಎನ್ನುವುದನ್ನು ಶರೀರಕ್ಕೆ ತಿಳಿಸುವ ಜೀನ್‌ನಲ್ಲಿ ಆಗುವ ವ್ಯತ್ಯಾಸವೇ ಥಾಲಸೇಮಿಯಾ ರೋಗ ಪರಿಸ್ಥಿತಿಗೆ ಕಾರಣ. ಹೆಮೊಗ್ಲೋಬಿನ್‌ ಎನ್ನುವುದು ರಕ್ತದಲ್ಲಿ ಆಮ್ಲಜನಕವನ್ನು ಸರಬರಾಜು ಮಾಡುವ ಮತ್ತು ರಕ್ತಕ್ಕೆ ಕೆಂಪು ಬಣ್ಣವನ್ನು ಕೊಡುವ ಒಂದು ರಾಸಾಯನಿಕ ಘಟಕ.

ಹೆಮೊಗ್ಲೋಬಿನ್‌ ಇರುವ ರಕ್ತದ ಜೀವಕೋಶಗಳಿಗೆ ಕೆಂಪು ರಕ್ತ ಕಣಗಳು' ಎಂದು ಹೆಸರು. ಹೆಮೊಗ್ಲೋಬಿನ್‌ ವಿವಿಧ ಘಟಕಗಳಿಂದ ನಿರ್ಮಾಣವಾಗುತ್ತದೆ. ಇದರಲ್ಲಿರುವ ಬಹುಮುಖ್ಯ ಭಾಗಗಳಿಗೆ ಆಲ್ಫಾ ಚೈನ್ಸ್‌ ಮತ್ತು ಬೀಟಾ ಚೈನ್ಸ್‌' ಎಂದು ಕರೆಯುತ್ತಾರೆ. ಹೆಮೊಗ್ಲೋಬಿನ್‌ ಮಾಲಿಕ್ಯೂಲ್‌ ನಿರ್ಮಾಣವಾಗಬೇಕಾದರೆ ಈ ಎರಡು ಘಟಕಗಳು ಒಂದುಗೂಡಬೇಕು. ಥಾಲಸೇಮಿಯಾ ಇರುವವರಲ್ಲಿ ಹೆಮೊಗ್ಲೋಬಿನ್‌ನ ಭಾಗವೊಂದು ದೋಷಪೂರಿತವಾಗಿರುತ್ತದೆ, ಅಂದರೆ ಆಲ್ಫಾ ಚೈನ್‌, ಅಥವಾ ಬೀಟಾ ಚೈನ್‌ಗಳಲ್ಲಿ ಯಾವುದೋ ಒಂದು ದೋಷಪೂರಿತವಾಗಿರುತ್ತದೆ.  

ಅಂದರೆ, ಇದರ ಅರ್ಥ ಕೆಲವು ಹೆಮೊಗ್ಲೋಬಿನ್‌ಗಳು ಸರಿಯಾಗಿ ಕೆಲಸ ಮಾಡುವುದಿಲ್ಲ. ಸಾಕಷ್ಟು ಸಹಜ ಹೆಮೊಗ್ಲೋಬಿನ್‌ಗಳ ಕೊರತೆ ಇರುವ ಕಾರಣ ಕೆಂಪು ರಕ್ತಕಣಗಳು ಸುಲಭವಾಗಿ ಒಡೆದು ಹೋಗುತ್ತವೆ. ಈ ಕಾರಣದಿಂದಾಗಿ ವ್ಯಕ್ತಿಯು ಅನಿಮಿಕ್‌ (ಹೆಮೊಗ್ಲೋಬಿನ್‌ ಕೊರತೆ) ಅಥವಾ ರಕ್ತಹೀನತೆಯಿಂದ ಬಳಲುತ್ತಾನೆ.  ಆತನಲ್ಲಿ ರಕ್ತಹೀನತೆಯ ವಿವಿಧ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ.  ಇದೇ ಸಮಯದಲ್ಲಿ, ದೇಹವು ಹೆಚ್ಚು ಹೆಮೊಗ್ಲೋಬಿನ್‌ ಮತ್ತು ಹೆಚ್ಚು ಕೆಂಪು ರಕ್ತಕಣಗಳನ್ನು ಉತ್ಪಾದಿಸಲು ಪ್ರಯತ್ನಿಸುತ್ತದೆ; ಆಗ ರಕ್ತಾಂಗವ್ಯವಸ್ಥೆಯಲ್ಲಿ ಅತಿ ಉತ್ಪಾದಕ ಸ್ಥಿತಿ ಉಂಟಾಗುತ್ತದೆ. ಇದರ ಪರಿಣಾಮವಾಗಿ ಹೆಚ್ಚು ಹೆಚ್ಚು ರೋಗಲಕ್ಷಣಗಳು ಮತ್ತು ತೊಂದರೆಗಳು ಕಾಣಿಸಿಕೊಳ್ಳುತ್ತವೆ.
 
ಯಾವ ವಿಧದ ಥಾಲಸೇಮಿಯಾ ಅನ್ನುವುದನ್ನು ಅವಲಂಬಿಸಿಕೊಂಡು, ಅಸಹಜ ಹೆಮೊಗ್ಲೋಬಿನ್‌ ಗಳ ಪ್ರಮಾಣದಲ್ಲಿಯೂ ಸಹ ವ್ಯತ್ಯಾಸವಾಗುತ್ತದೆ.  ಅದು ಶರೀರದ ಬಹುಅಂಶ ಹೆಮೊಗ್ಲೋಬಿನ್‌ ಅನ್ನು ಒಳಗೊಂಡಿರಬಹುದು ಅಥವಾ ಕೇವಲ ಅಲ್ಪಾಂಶ ಹೆಮೊಗ್ಲೋಬಿನ್‌ ಮಾತ್ರವೇ ಇದರಲ್ಲಿ ಒಳಗೊಂಡಿರಬಹುದು. ಇದು ಥಾಲಸೇಮಿಯಾ ಎಷ್ಟು ತೀವ್ರವಾಗಿದೆ ಎಂಬುದನ್ನು ನಿರ್ಧರಿಸುವ ಅಂಶವಾಗಿರುತ್ತದೆ.   ಇಲ್ಲಿ ಇನ್ನಿತರ ವೈಯಕ್ತಿಕ ವಿಚಾರಗಳೂ ಸಹ ಒಳಗೊಂಡಿರುತ್ತವೆ. ಹಾಗಾಗಿ ಒಂದೇ ವಿಧದ ಥಾಲಸೇಮಿಯಾವನ್ನು ಹೊಂದಿರುವ ಇಬ್ಬರು ವ್ಯಕ್ತಿಗಳಲ್ಲಿ, ಪರಿಸ್ಥಿತಿ ಒಂದೇ ಆಗಿದ್ದರೂ ಸಹ, ಅಸ್ವಸ್ಥತೆಯ ಲಕ್ಷಣಗಳು ಬೇರೆ ಬೇರೆ ಆಗಿರಬಹುದು. 

ಯಾರು ಬೇಕಾದರೂ ಥಾಲಸೇಮಿಯಾ ಜೀನ್‌ನ ವಾಹಕರಾಗಿರಬಹುದು.  ಇಡೀ ಜಗತ್ತಿನ ಜನಸಂಖ್ಯೆಯಲ್ಲಿ 100 ರಲ್ಲಿ 5 ಜನರು ಥಾಲಸೇಮಿಯಾ ಜೀನ್‌ ಅನ್ನು ಹೊಂದಿರಬಹುದು (ಆ ಕಾರಣದಿಂದಾಗಿ ಥಾಲಸೇಮಿಯಾ ಲಕ್ಷಣಗಳು ಇರಬಹುದು). ನಿಮ್ಮ ಕೌಟುಂಬಿಕ ಮೂಲವನ್ನು ಅವಲಂಬಿಸಿಕೊಂಡು, ಥಾಲಸೇಮಿಯಾ ಜೀನ್‌ ಅನ್ನು ಹೊಂದಿರುವ ಸಾಧ್ಯತೆಗಳು ಸಹ ಭಿನ್ನ ಭಿನ್ನವಾಗಿರುತ್ತವೆ.  

ಥಾಲಸೇಮಿಯಾ ತಪಾಸಣೆ

ರಕ್ತದ ಪರೀಕ್ಷೆಯ ಮೂಲಕ ಥಾಲಸೇಮಿಯಾ ತಪಾಸಣೆಯನ್ನು ನಡೆಸಲಾಗುವುದು. ಯಾವ ವಿಧದ ಹೆಮೊಗ್ಲೋಬಿನ್‌ ರಕ್ತದಲ್ಲಿ ಇದೆ ಎಂಬುದನ್ನು ನೋಡಲು, ರಕ್ತದ ಮಾದರಿಯನ್ನು ವಿಶ್ಲೇಷಿಸುತ್ತಾರೆ. ಕೆಲವು ಪ್ರಕರಣಗಳಲ್ಲಿ , ನಿಖರವಾಗಿ ಥಾಲಸೇಮಿಯಾ ವಿಧ ಯಾವುದು ಎಂಬುದನ್ನು ಪತ್ತೆ ಮಾಡಲು, ಕೆಲವು ಹೆಚ್ಚುವರಿ ಪರೀಕ್ಷೆಗಳಾದ ಜೆನೆಟಿಕ್‌ ಪರೀಕ್ಷೆಗಳೂ ಸಹ ಆವಶ್ಯಕವಾಗಿರುತ್ತವೆ. ಇದು ಇತರ ಕೌಟುಂಬಿಕ ಸದಸ್ಯರನ್ನೂ ಸಹ ಪರೀಕ್ಷೆ ಒಳಪಡಿಸುವ ಸಾಧ್ಯತೆಗೆ ಸಹಾಯ ಮಾಡುತ್ತದೆ.   ರಕ್ತದ ಘಟಕಗಳ ಸಂಪೂರ್ಣ ಪರೀಕ್ಷೆ ಎಂಬ ಸರಳವಾದ ಆ ರಕ್ತಪರೀಕ್ಷೆಯ ಫ‌ಲಿತಾಂಶದ ಮೂಲಕ ಥಾಲಸೇಮಿಯಾ  ಲಕ್ಷಣ  ಇರುವಿಕೆಯ ಸಂದೇಹ ಬರಬಹುದು.  ಫ‌ಲಿತಾಂಶದಲ್ಲಿ ಕೆಂಪು ರಕ್ತಕಣಗಳು ಸಣ್ಣದಾಗಿದ್ದು, ಸಹಜಕ್ಕಿಂತ ಪೇಲವ ಬಣ್ಣವನ್ನು ಹೊಂದಿದ್ದರೆ, ಅದು ಕಬ್ಬಿಣಾಂಶದ ಕೊರತೆ ಅಥವಾ ಥಾಲಸೇಮಿಯಾ  ಲಕ್ಷಣ ಆಗಿರಬಹುದು. 

ಥಾಲಸೇಮಿಯಾಕ್ಕೆ ಚಿಕಿತ್ಸೆ

 ಥಾಲಸೇಮಿಯಾಕ್ಕೆ ನೀಡುವ ಬಹುಮುಖ್ಯ ಚಿಕಿತ್ಸೆ ಅಂದರೆ ನಿಯಮಿತ ರಕ್ತ ಪೂರಣ, ಹೆಮೊಗ್ಲೋಬಿನ್‌ ಮಟ್ಟವನ್ನು ಕನಿಷ್ಠ 9 ಜ/ಛl ದಲ್ಲಿ ಇರಿಸಿಕೊಳ್ಳಲು 3-4 ವಾರಗಳಿಗೊಮ್ಮೆ ರಕ್ತಪೂರಣ ಮಾಡಿಸಿಕೊಳ್ಳಬೇಕಾಗುವುದು. ರಕ್ತ ಪೂರಣವಾಗಲಿರುವ ರಕ್ತವು ಎಕ್ಸ್‌ ಟೆಂಡೆಡ್‌ ಕೆಂಪುಕಣಗಳ ಫಿನೋಟೈಪ್‌ ಹೊಂದಾಣಿಕೆ ಆಗಿರಬೇಕು. ನಿಯಮಿತ ರಕ್ತಪೂರಣದಿಂದ ಆಗಬಹುದಾದ ತೊಂದರೆಗಳು ಅಂದರೆ ಪ್ರಮುಖ ಅಂಗಾಂಶಗಳಲ್ಲಿ ಕಬ್ಬಿಣದ ಅಂಶದ ಹೆಚ್ಚಳದಿಂದಾಗಿ ಮಧುಮೇಹ, ಯಕೃತ್ತಿನ ಕಾಯಿಲೆ ಮತ್ತು ಹೃದಯವೈಫ‌ಲ್ಯವಾಗುವ ಅಪಾಯ ಒದಗುವುದು. ಕಬ್ಬಿಣಾಂಶದ ಮಟ್ಟವನ್ನು ತಗ್ಗಿಸುವ ಔಷಧಿಯನ್ನು ನಿಯಮಿತವಾಗಿ ತೆಗೆದುಕೊಳ್ಳುವ ಮೂಲಕ ಈ ಅಪಾಯವ‌ನ್ನು ನಿಯಂತ್ರಿಸಬಹುದು. ಈ ವಿಧಾನಕ್ಕೆ ಎಂದು ಹೆಸರು.  ಇದನ್ನು ಇಂಜೆಕ್ಷನ್‌ ಅಥವಾ ಬಾಯಿಯ ಮೂಲಕ ತೆಗೆದುಕೊಳ್ಳುವ ಔಷಧಿಯ(ಡೆಸ್‌ಫೆರಾಕ್ಸಮೈನ್‌, ಡಿಫೆರಿಪ್ರೋನ್‌ ಅಥವಾ ಡೆಫೆರಾಸಿರಾಕ್ಸ್‌)ರೂಪದಲ್ಲಿ ಸೇವಿಸಬಹುದು. ಡೆಫೆರಾಸಿರಾಕ್ಸ್‌ ಎನ್ನುವುದು ಬಾಯಿಯ ಮೂಲಕ ಸೇವಿಸುವ ಔಷಧಿಯಾಗಿದ್ದು, ಕಬ್ಬಿಣಾಂಶದ ತೊಂದರೆಯನ್ನು ಪರಿಹರಿಸಲು ಇದು ಬಹಳ ಉಪಯುಕ್ತ ಔಷಧಿ. ಇದನ್ನು ಬಹಳ ಬೇಗನೆ ಆರಂಭಿಸಬೇಕು ಮತ್ತು ಇದನ್ನು ತೆಗೆದುಕೊಳ್ಳುತ್ತಿರುವಾಗ ಯಕೃತ್ತು, ಮೂತ್ರಪಿಂಡಗಳ ಚಟುವಟಿಕೆಯನ್ನು ಪರೀಕ್ಷೆ ಮಾಡಿಸಿಕೊಳ್ಳುವ ಜೊತೆಗೆ ಔಷಧಿಯ ಪ್ರಮಾಣವನ್ನು ಹೊಂದಾಣಿಕೆ ಮಾಡಿಕೊಳ್ಳಲು ಆಗಾಗ ನಿಯಮಿತ ರೂಪದಲ್ಲಿ ರಕ್ತಪರೀಕ್ಷೆ (ಫೆರಿಟಿನ್‌)ಯನ್ನೂ ಸಹ ಮಾಡಿಸಿಕೊಳ್ಳಬೇಕು. ಒಂದು ವೇಳೆ ಅಂಗಾಂಗಗಳ ಕಾರ್ಯನ್ಯೂನತೆಯ ಸಂದೇಹ ಇದ್ದಾಗ ಕೆಲವು ಬಾರಿ ಯಕೃತ್ತು/ಹೃದಯಗಳ ಎಂಆರ್‌ ಐ ಯನ್ನೂ ಸಹ ಮಾಡಿಸಿಕೊಳ್ಳಬೇಕಾಗುವುದು. 

HLA ಮ್ಯಾಚ್‌ ಆಗುವ ಒಡಹುಟ್ಟಿದವರ ಬೋನ್‌ ಮ್ಯಾರೋ ಟ್ರಾನ್ಸ್‌ ಪ್ಲಾಂಟ್‌ ಅಥವಾ ಬದಲಿ ಅಸ್ಥಿಮಜ್ಜೆ ಜೋಡಣೆ ಎನ್ನುವುದು ಥಾಲಸೇಮಿಯಾಕ್ಕೆ ಇರುವ ಒಂದೇ ಒಂದು ಪರಿಹಾರ ಚಿಕಿತ್ಸೆ. ಅಂದರೆ ಅಸ್ಥಿಮಜ್ಜೆ ಅಥವಾ ಕಾರ್ಡ್‌ಬ್ಲಿಡ್‌ ಟ್ರಾನ್ಸ್‌ ಪ್ಲಾಂಟ್‌ ಚಿಕಿತ್ಸೆ. ಈ ಚಿಕಿತ್ಸೆಯಲ್ಲಿ ಸಹಜ ರಕ್ತಕಣಗಳನ್ನು ಉತ್ಪಾದಿಸುವ ಕೋಶಗಳನ್ನು ದಾನಿಯಿಂದ ಪಡೆದು, ಅದನ್ನು ಥಾಲಸೇಮಿಯಾ  ಇರುವ ವ್ಯಕ್ತಿಗೆ  ನೀಡುತ್ತಾರೆ. ತೊಂದರೆಗಳು ಆರಂಭವಾಗುವ ಬಹಳ ಮೊದಲೆ ಈ ಚಿಕಿತ್ಸೆಯನ್ನು ಆರಂಭಿಸುವುದರಿಂದ 80-85% ರಷ್ಟು ಉತ್ತಮ ಪರಿಣಾಮವನ್ನು ಪಡೆಯಬಹುದು. ಒಂದುವೇಳೆ ಈ ಚಿಕಿತ್ಸೆ ಫ‌ಲಪ್ರದವಾದರೆ, ದಾನವಾಗಿ ಪಡೆದ ಕೋಶಗಳು ಜೀವನಪರ್ಯಂತ ಕೆಲಸ ಮಾಡುತ್ತವೆ ಮತ್ತು ಸಹಜ ಹೆಮೊಗ್ಲೋಬಿನ್‌ಗಳನ್ನು ಉತ್ಪಾದಿಸುತ್ತವೆ-ಇದೊಂದು ಜೀವನಪರ್ಯಂತದ ಪರಿಹಾರ.  ಆದರೆ ಕಾಂಡಕೋಶದ ಕಸಿ ಎನ್ನುವುದು ಎಲ್ಲರಿಗೂ ಹೊಂದಾಣಿಕೆ ಆಗದಂತಹ ಒಂದು ವಿಚಾರ. ಇಲ್ಲಿ ಒಬ್ಬ ಹೊಂದುವಂತಹ ದಾನಿಯ ಆವಶ್ಯಕತೆ ಇರುತ್ತದೆ ಮತ್ತು ಕೆಲವು ರೀತಿಯ ಗಂಭೀರ ಅಪಾಯಗಳನ್ನೂ ಸಹ ಇದು ಒಳಗೊಂಡಿರುತ್ತದೆ.  

ಥಾಲಸೇಮಿಯಾ ತಡೆಗಟ್ಟುವಿಕೆ

ಈ ಹಿಂದೆ ಹೇಳಿದಂತೆ, ಥಾಲಸೇಮಿಯಾಎನ್ನುವುದು ಒಂದು ಆನುವಂಶಿಕ ರೋಗ ಪರಿಸ್ಥಿತಿ.  ಅಂದರೆ ಇದರ ಅರ್ಥ, ಇಬ್ಬರು ವಾಹಕರು ಒಂದು ಮಗುವನ್ನು ಪಡೆದಾಗ, ಜನ್ಮದಾತರಾದ ಪ್ರತೀ ವಾಹಕರು (ರೋಗ ಲಕ್ಷಣ ಇರುವವರು) ನ್ಯೂನತೆ ಇರುವ ಜೀನ್‌ ಒಂದನ್ನು ತಮ್ಮ ಮಗುವಿಗೆ ದಾಟಿಸಬಹುದು. ಒಂದುವೇಳೆ ದಂಪತಿಗಳಿಬ್ಬರೂ ವಾಹಕರಾಗಿದ್ದಲ್ಲಿ, ಅವರು ಥಾಲಸೇಮಿಯಾ ಬಾಧಿತ ಮಗುವಿಗೆ ಜನ್ಮ ನೀಡುವ ಸಾಧ್ಯತೆ ನಾಲ್ಕರಲ್ಲಿ ಒಂದು.  ಒಂದುವೇಳೆ ದಂಪತಿಗಳಲ್ಲಿ ಒಬ್ಬರಿಗೆ ಕಾಯಿಲೆ ಇದ್ದು, ಇನ್ನೊಬ್ಬರು ವಾಹಕರಾಗಿದ್ದಲ್ಲಿ, ಅಪಾಯ ಇನ್ನೂ ಹೆಚ್ಚಾಗುತ್ತದೆ, ಅಂದರೆ ಇವರಿಗೆ ಜನಿಸಿದ ಇಬ್ಬರು ಮಕ್ಕಳಲ್ಲಿ ಒಬ್ಬರಿಗೆ ಥಾಲಸೇಮಿಯಾದ ಅಪಾಯ ಇರುತ್ತದೆ. ಥಾಲಸೇಮಿಯಾ  ಜೀನ್‌ ಒಂದು ಸಿಕ್ಕೆಲ್‌ ಜೀನ್‌ ಜೊತೆ ಸಂಯೋಜನೆ ಹೊಂದಿದರೆ, ಇದರ ಪರಿಣಾಮವಾಗಿ ಸಿಕ್ಕೆಲ್‌ ಕೋಶದ ಕಾಯಿಲೆ ಬರುವ ಸಾಧ್ಯತೆ ಇದೆ.

ಥಾಲಸೇಮಿಯಾಕ್ಕೆ ಸಂಬಂಧಿಸಿದ ಜೆನೆಟಿಕ್ಸ್‌ ಬಹಳ ಸಂಕೀರ್ಣವಾದುದು, ನೀವು ಈ ಬಗ್ಗೆ ವೈದ್ಯರು ಅಥವಾ ಜೆನೆಟಿಕ್‌ ತಜ್ಞರ ಜತೆಗೆ ಮಾತನಾಡಬಹುದು. ನೀವು ಗರ್ಭಿಣಿ ಆಗಿದ್ದರೆ, ನಿಮ್ಮ ಗರ್ಭಕ್ಕೆ 10 ವಾರದೊಳಗೆ ಥಾಲಸೇಮಿಯಾ  ರಕ್ತ ಪರೀಕ್ಷೆ ಮಾಡಿಸಿಕೊಳ್ಳಲು ಅತ್ಯುತ್ತಮ ಸಮಯ.  ಒಂದು ವೇಳೆ ಅಗತ್ಯ ಬಿದ್ದರೆ, ನಿಮ್ಮ ಮಗು ಮತ್ತು ನಿಮ್ಮ ಸಂಗಾತಿಯ ಹೆಚ್ಚುವರಿ ಪರೀಕ್ಷೆಗಳನ್ನು ನಡೆಸಲು ಇಲ್ಲಿ ಹೆಚ್ಚು ಸಮಯಾವಕಾಶ ಸಿಗುತ್ತದೆ. ಗರ್ಭಧಾರಣೆಯ ಆರಂಭಿಕ ಹಂತದಲ್ಲಿಯೇ ಥಾಲಸೇಮಿಯಾ ರಕ್ತಪರೀಕ್ಷೆ ಮಾಡಿಸಿಕೊಳ್ಳುವ ಬಗ್ಗೆ ನೀವು ನಿಮ್ಮ ವೈದ್ಯರನ್ನು ಕೇಳಬಹುದು. ಆದರೆ ಈ ಪರೀಕ್ಷೆಯನ್ನು ಅನಂತರವೂ ಮಾಡಿಸಿಕೊಳ್ಳಬಹುದು. ಪರೀಕ್ಷೆಯ ವಿಧವನ್ನು ಅವಲಂಬಿಸಿಕೊಂಡು, ತಾಯಿಯ ಪರೀಕ್ಷೆಯನ್ನು (ಜನಿಸಲಿರುವ ಶಿಶುವಿನ ಜತೆಗೆ) ಗರ್ಭಧಾರಣೆಯಾದ 10ನೆಯ ವಾರದಿಂದ ಮಾಡಿಸಿಕೊಳ್ಳಬಹುದು. 

ಸಾಮಾನ್ಯವಾಗಿ ಬಳಕೆಯಾಗುವ ಪರೀûಾ ವಿಧಗಳು ಅಂದರೆ, ಕೋರಿಯಾನಿಕ್‌ ವಿಲ್ಲಸ್‌ ಸ್ಯಾಂಪ್ಲಿಂಗ್‌ ಅಥವಾ ಆಮ್ನಿಯೋಸೆಂಟೆಸಿಸ್‌.  ಕುಟುಂಬದಲ್ಲಿ ಥಾಲಸೇಮಿಯಾ  ಹಿನ್ನೆಲೆ ಇದ್ದಲ್ಲಿ, ಮಹಿಳೆ ಅಥವಾ ದಂಪತಿಗಳು ತಾವು ಮಗುವನ್ನು ಪಡೆಯುವ ಮೊದಲೇ ಈ ಪರೀಕ್ಷೆಯನ್ನು ಮಾಡಿಸಿಕೊಳ್ಳಬಹುದು. ಇಂಡಿಯನ್‌ ಥಾಲಸೇಮಿಯಾ ಸೊಸೈಟಿ ಮತ್ತು ಇತರ ಆರೋಗ್ಯ ಕಾರ್ಯಕರ್ತರು ಥಾಲಸೇಮಿಯಾ ಜಾಗೃತಿಯ ಬಗ್ಗೆ ಬೆಂಬಲ ನೀಡುತ್ತಿದ್ದಾರೆ. ಪರೀಕ್ಷೆಯನ್ನು ನಿಮ್ಮ ವೈದ್ಯರು ಯೋಜಿಸಬಹುದು.  ಈ ಪರೀಕ್ಷೆಯನ್ನು ನೀವು ಗರ್ಭಧರಿಸುವ ಮೊದಲೇ ಮಾಡಿಸಿಕೊಳ್ಳುವುದರಿಂದ, ಹುಟ್ಟಲಿರುವ ಮಗುವಿಗೆ ತೀವ್ರರೂಪದ ಆನುವಂಶಿಕ ಥಾಲಸೇಮಿಯಾ ಬರುವ ಅಪಾಯ ಇದೆಯೇ ಅಥವಾ ಅಂತಹ ಸಾಧ್ಯತೆಗಳು ಇವೆಯೇ ಎಂಬುದನ್ನು ಮೊದಲೇ ತಿಳಿದುಕೊಳ್ಳಬಹುದು.

ಗರ್ಭಧಾರಣೆಯ ಬಗ್ಗೆ ಬಹುಮುಖ್ಯ ನಿರ್ಧಾರವನ್ನು ತೆಗೆದುಕೊಳ್ಳಲು ಈ ಅಂಶವು ಬಹಳ ಪ್ರಯೋಜನಕಾರಿ. ನಿಮಗೆ ಈಗಾಗಲೇ ಥಾಲಸೇಮಿಯಾ ಹೊಂದಿರುವ ಮಗು ಇದ್ದಲ್ಲಿ, ನೀವು ಥಾಲಸೇಮಿಯಾ  ವಾಹಕರಾಗಿರುತ್ತೀರಿ. ಅಂದರೆ ಇದರ ಅರ್ಥ ನಿಮ್ಮ ತಂದೆ ತಾಯಿಯರಲ್ಲಿ ಯಾರೋ ಒಬ್ಬರು ವಾಹಕರಾಗಿದ್ದರು ಮತ್ತು ನಿಮ್ಮ ಸಹೋದರ, ಸಹೋದರಿ ಅಥವಾ ಸೋದರ ಸಂಬಂಧಿಗಳೂ ಸಹ ಥಾಲಸೇಮಿಯಾ  ವಾಹಕರಾಗಿರುತ್ತಾರೆ. ನಿಮ್ಮ ಕುಟುಂಬವರ್ಗದವರು ಈಗಾಗಲೆ ಥಾಲಸೇಮಿಯಾ  ಪರೀಕ್ಷೆ ಮಾಡಿಸಿಕೊಂಡಿಲ್ಲದಿದ್ದರೆ, ಅವರು ಮಗುವನ್ನು ಪಡೆಯವುದಕ್ಕೆ ಮೊದಲೇ ಈ ಪರೀಕ್ಷೆಯನ್ನು ಮಾಡಿಸಿಕೊಳ್ಳುವಂತೆ ದಯವಿಟ್ಟು ಅವರಿಗೆ ಬೆಂಬಲ ನೀಡಿ. 

ಥಾಲಸೇಮಿಯಾ ವಿಧಗಳು

ಬಹಳ ಮುಖ್ಯ ವಿಧದ ಥಾಲಸೇಮಿಯಾ ವಿಧಗಳು ಅಂದರೆ  ಆಲ್ಫಾ  ಥಾಲಸೇಮಿಯಾ ಮತ್ತು ಬೀಟಾ  ಥಾಲಸೇಮಿಯಾ.

( ಆಲ್ಫಾ ಮತ್ತು ಬೀಟಾಗಳು ಯಾವ ಹೆಮೊಗ್ಲೋಬಿನ್‌ ಬಾಧಿತವಾಗಿದೆ ಮತ್ತು ಯಾವ ಹೆಮೊಗ್ಲೋಬಿನ್‌ ಸರಪಣಿಯು ದೋಷವಿದೆ ಎಂಬುದನ್ನು ಸೂಚಿಸುತ್ತವೆ). ಇದರಲ್ಲಿ ಕೆಲವು ಅಪರೂಪದ ವಿಧಗಳು ಸಹ ಇವೆ. ಅನಂತರದಲ್ಲಿ ಪರಿಸ್ಥಿತಿಯ ತೀವ್ರತೆಯನ್ನು ಅವಲಂಬಿಸಿಕೊಂಡು, ಪ್ರತಿಯೊಂದು ವಿಧದ  ಥಾಲಸೇಮಿಯಾವೂ ಸಹ ಇನ್ನಷ್ಟು ವಿಧಗಳಾಗಿ ವಿಂಗಡಣೆಯಾಗುತ್ತವೆ. ಇದು ಪ್ರಮುಖವಾಗಿ ಎಷ್ಟು   ಥಾಲಸೇಮಿಯಾ ಜೀನ್‌ಗಳು ರೋಗ ಪರಿಸ್ಥಿತಿಯಲ್ಲಿ ಒಳಗೊಂಡಿವೆ ಎಂಬ ಅಂಶವನ್ನು ಅವಲಂಬಿಸಿರುತ್ತದೆ. 
ಬಹಳ ಸೌಮ್ಯರೂಪದ್ದ‌ಕ್ಕೆ ಥಾಲಸೇಮಿಯಾ ಲಕ್ಷಣ (ಟ್ರೆ„ಟ್‌) (ಅಥವಾ ಥಾಲಸೇಮಿಯಾ ಮೈನರ್‌) ಎಂದು ಹೆಸರು.  ಬಹಳ ತೀವ್ರ ರೂಪದ ಬೀಟಾ ವಿಧಗಳಿಗೆ ಬೀಟಾ  ಥಾಲಸೇಮಿಯಾ ಮೇಜರ್‌  ಮತ್ತು ಬೀಟಾ  ಥಾಲಸೇಮಿಯಾ ಇಂಟರ್‌ಮೀಡಿಯಾ ಎಂದು ಹೆಸರು.ಬಹಳ ತೀವ್ರ ರೂಪದ ಆಲ್ಫಾದ್ದಕ್ಕೆ  ಬಾರ್ಟ್ಸ್ (ತೀವ್ರ ರೂಪ) ಮತ್ತು  HbH ಕಾಯಿಲೆ ಎಂದು ಹೆಸರು (ಸಾಧಾರಣ). ಕೆಲವು ಅಪರೂಪದ ವಿಧದ ಥಾಲಸೇಮಿಯಾಗಳು ಅಂದರೆ ಡೆಲ್ಟಾ ಬೀಟಾ  ಥಾಲಸೇಮಿಯಾ ಅಥವಾ ಬೀಟಾ ಥಾಲಸೇಮಿಯಾ ಜೀನ್‌ ಮತ್ತು HBE ಯಂತಹ ಇನ್ನೊಂದು ಅಸಹಜ ಹೆಮೊಗ್ಲೋಬಿನ್‌ ಜೀನ್‌ ನ ಸಂಯೋಜನೆ. 

ಡಾ| ಹರ್ಷಪ್ರಸಾದ ಎಲ್‌., 
ಮಕ್ಕಳ ರಕ್ತ ಮತ್ತು ಕ್ಯಾನ್ಸರ್‌ ತಜ್ಞರು,
ಕೆಎಂಸಿ, ಮಂಗಳೂರು. 

ಡಾ| ಪ್ರಶಾಂತ್‌ ಬಿ.
ಮಕ್ಕಳ ರಕ್ತ ತಜ್ಞರು, ಕೆಎಂಸಿ, 
ಅಂಬೇಡ್ಕರ್‌ ವೃತ್ತ, ಮಂಗಳೂರು.

Trending videos

Back to Top