ಗಣೇಶ್ಗೆ ಜೋಡಿಯಾದ ಶಾನ್ವಿ ಶ್ರೀವಾತ್ಸವ್
Team Udayavani, Nov 12, 2018, 11:20 AM IST
ಶಂಕರ್ನಾಗ್ ಅಭಿನಯದ ಸಿನಿಮಾಗಳಲ್ಲಿ ದೊಡ್ಡ ಮಟ್ಟದಲ್ಲಿ ಯಶಸ್ವಿಯಾದ ಚಿತ್ರ “ಗೀತಾ’. ಇದೇ ಹೆಸರಿನ ಚಿತ್ರದಲ್ಲಿ ಗಣೇಶ್ ನಟಿಸುತ್ತಿದ್ದಾರೆ ಎಂಬುದು ಹೊಸ ಸುದ್ದಿಯೇನಲ್ಲ. ಈಗಾಗಲೇ ಈ ಚಿತ್ರದ ಚಿತ್ರೀಕರಣಕ್ಕೆ ತಯಾರಿ ನಡೆದಿದೆ. ಇತ್ತೀಚೆಗೆ ಮುಹೂರ್ತವೂ ನೆರವೇರಿದೆ. ಈ ಚಿತ್ರಕ್ಕೆ ಮೂವರು ನಾಯಕಿಯರು.
ಆ ಪೈಕಿ ಈಗಾಗಲೇ ಪ್ರಯಾಗ ಮಾರ್ಟಿನ್ ಮತ್ತು ಪಾರ್ವತಿ ಅರುಣ್ ಎಂಬ ಹುಡುಗಿಯರು ನಾಯಕಿಯರಾಗಿ ಆಯ್ಕೆಯಾಗಿದ್ದು ಎಲ್ಲರಿಗೂ ಗೊತ್ತು. ಆದರೆ, ಇನ್ನೊಬ್ಬ ನಾಯಕಿ ಯಾರು ಎಂಬ ಪ್ರಶ್ನೆ ಎಲ್ಲರಲ್ಲೂ ಇತ್ತು. ಆದಕ್ಕೆ ಉತ್ತರವಾಗಿ ಶಾನ್ವಿ ಶ್ರೀವಾತ್ಸವ್ ಕಾಣಿಸಿಕೊಳ್ಳುತ್ತಿದ್ದಾರೆ.
ಹೌದು, ಮಲಯಾಳಿ ಬೆಡಗಿಯರ ಜೊತೆಗೆ ಶಾನ್ವಿ ಕೂಡ ಕಾಣಿಸಿಕೊಳ್ಳುತ್ತಿದ್ದಾರೆ. ಅಲ್ಲಿಗೆ ಗಣೇಶ್ ಜೊತೆ ಈ ಮೂವರು ನಾಯಕಿಯರು ಹೆಜ್ಜೆ ಹಾಕುತ್ತಿರುವುದು ಪಕ್ಕಾ ಆಗಿದೆ. “ಗೀತಾ’ ಎಂಬ ಶೀರ್ಷಿಕೆ ಇಲ್ಲಿದ್ದರೂ, ಶಂಕರ್ನಾಗ್ ಅಭಿನಯದ ಯಶಸ್ವಿ “ಗೀತಾ’ ಚಿತ್ರಕ್ಕೂ ಈ ಚಿತ್ರಕ್ಕೂ ಯಾವುದೇ ಸಂಬಂಧವಿಲ್ಲ ಎನ್ನುವುದು ಚಿತ್ರತಂಡದ ಮಾತು.
“ಗೀತಾ’ ಚಿತ್ರದ ಕಥೆಯಲ್ಲಿ ಹೊಸ ಮುಖಗಳನ್ನೇ ಬಯಸಿದ್ದರಿಂದ ನಿರ್ದೇಶಕ ವಿಜಯ್ ನಾಗೇಂದ್ರ ಅವರು, ಮೊದಲ ಸಲ ಮಲಯಾಳಂ ಚಿತ್ರರಂಗದ ಇಬ್ಬರು ಬೆಡಗಿಯರನ್ನು ಪರಿಚಯಿಸುತ್ತಿದ್ದಾರೆ. ಅವರ ಜೊತೆ ಈಗ ಶಾನ್ವಿ ಕೂಡ ನಟಿಸುತ್ತಿದ್ದಾರೆ. ಇನ್ನು, ಇಲ್ಲಿ ಮೂವರು ನಾಯಕಿಯರಿಗೂ ಸರಿ ಸಮಾನವಾದ ಪಾತ್ರಗಳಿವೆ. ಪ್ರತಿಯೊಬ್ಬರೂ ಕಥೆಗೆ ತುಂಬ ಮುಖ್ಯವಾಗಿರುತ್ತಾರೆ. ಒಬ್ಬೊಬ್ಬ ನಾಯಕಿಯದ್ದೂ ಒಂದೊಂದು ಕಥೆ ಇಲ್ಲಿದೆ ಎಂಬುದು ನಿರ್ದೇಶಕರ ಮಾತು.