ಇಂದಿನಿಂದ ಕರಾವಳಿಯಾದ್ಯಂತ ಉಮಿಲ್‌ ಸಿನೆಮಾ ತೆರೆಗೆ

Team Udayavani, Dec 7, 2018, 11:30 AM IST

ಮಂಗಳೂರು: ತುಳು ಚಿತ್ರರಂಗದಲ್ಲಿ ಗ್ರಾಫಿಕ್ಸ್‌ ಬಳಸಲಾದ ಮೊದಲ ಹಾಗೂ ಕೋಸ್ಟಲ್‌ವುಡ್‌ನ‌ 101ನೇ ಕಾಮಿಡಿ ಸಿನೆಮಾ “ಉಮಿಲ್‌’ ಡಿ.7ರಿಂದ ಕರಾವಳಿಯಾದ್ಯಂತ ತೆರೆ ಕಾಣಲಿದೆ. 

ಗುರುವಾರ ಮಂಗಳೂರಿನಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ನಿರ್ದೇಶಕ ರಂಜಿತ್‌ ಸುವರ್ಣ, ಪ್ರದರ್ಶನದ ಮೊದಲೇ ಹಿಂದಿಗೆ ಡಬ್‌ ಆದ ಮೊದಲ ಸಿನೆಮಾ “ಉಮಿಲ್‌’. ಪುನೀತ್‌ ರಾಜ್‌ಕುಮಾರ್‌ ಹಾಡಿರುವ ತುಳುವಿನ ಮೊದಲ ಸಿನೆಮಾ ಎಂಬ ಹೆಗ್ಗಳಿಕೆಯೂ ಇದಕ್ಕಿದೆ. ಇದರ ಟ್ರೇಲರ್‌ ಅನ್ನು ಲಕ್ಷಾಂತರ ಜನರು ವೀಕ್ಷಿಸಿದ್ದಾರೆ. ಸಂಪೂರ್ಣ ಹಾಸ್ಯಮಯವಾಗಿ ರುವ ಈ ಸಿನೆಮಾವನ್ನು ಕೋಟಿ ರೂ. ಖರ್ಚಿನಲ್ಲಿ ಸಿದ್ಧಪಡಿಸಲಾಗಿದೆ ಎಂದರು.
ಆ್ಯನಿಮೇಶನ್‌ ಕೆಲಸವನ್ನು ಕೆನಡಾದಲ್ಲಿ ಮಾಡಲಾಗಿದೆ.  ಎಫೆಕ್ಟ್‌ನು ಹೈದರಾಬಾದ್‌ ಹಾಗೂ ಮಾಡೆಲಿಂಗ್‌ನ್ನು ಮುಂಬಯಿಯಲ್ಲಿ ನಡೆಸಲಾಗಿದೆ ಎಂದರು.

ಉಮೇಶ್‌ ಮಿಜಾರ್‌, ನವೀನ್‌ ಡಿ. ಪಡೀಲ್‌, ಪೂಜಾ ಶೆಟ್ಟಿ, ಅರವಿಂದ ಬೋಳಾರ್‌, ಭೋಜರಾಜ್‌ ವಾಮಂಜೂರು, ಸತೀಶ್‌ ಬಂದಳೆ, ಚೇತನ್‌ ರೈ ಮಾಣಿ, ದೀಪಕ್‌ ರೈ ಪಾಣಾಜೆ, ಪ್ರಕಾಶ್‌ ತೂಮಿನಾಡ್‌, ರಮೇಶ್‌ ರೈ, ಅಮಿತ್‌ ರಾವ್‌, ಯಕ್ಷಗಾನ ಹಾಸ್ಯಗಾರ ಸೀತಾರಾಮ ಕಟೀಲ್‌ “ಉಮಿಲ್‌’ನಲ್ಲಿ ಬಣ್ಣ ಹಚ್ಚಿದ್ದಾರೆ. ಕರುಣಾಕರ ಶೆಟ್ಟಿ, ಪ್ರಜ್ಞೆಶ್ ಶೆಟ್ಟಿ ಹಾಗೂ ಪ್ರಜ್ವಲ್‌ ಶೆಟ್ಟಿ ನಿರ್ಮಿಸಿದ್ದಾರೆ. ಹೆಸರಾಂತ ಸಂಗೀತ ನಿರ್ದೇಶಕ ರವಿ ಬಸ್ರುರು ಸಂಗೀತ, ಪವನ್‌ ಕರ್ಕೇರ ಛಾಯಾಗ್ರಹಣ ಹಾಗೂ ಹರೀಶ್‌ ಕೊಡಾಡಿ ಸಂಕಲನ ನಡೆಸಿದ್ದಾರೆ ಎಂದರು.”

ತಮಿಳಿನಿಂದಾಗಿ ತುಳುವಿಗೆ ಟಾಕೀಸಿಲ್ಲ!
ತಮಿಳು ಸಿನೆಮಾ ಪ್ರದರ್ಶನ ಕಾರಣ ತುಳು ಸಿನೆಮಾಕ್ಕೆ ಮಂಗಳೂರಿನಲ್ಲಿ ಒಂದೂ ಥಿಯೇಟರ್‌ ಸಿಗಲಿಲ್ಲ  ಮಂಗಳೂರಿನ ಬಿಗ್‌ ಸಿನೆಮಾ, ಪಿವಿಆರ್‌, ಸಿನೆಪೊಲಿಸ್‌, ಸುರತ್ಕಲ್‌ನ ನಟರಾಜ್‌, ಪುತ್ತೂರಿನ ಅರುಣಾ, ಸುಳ್ಯದ ಸಂತೋಷ್‌, ಕಾರ್ಕಳದ ಪ್ಲಾನೆಟ್‌, ಮೂಡುಬಿದಿರೆಯ ಅಮರಶ್ರೀ, ಕಾಸರಗೋಡಿನ ಸಿನಿಕೃಷ್ಣ, ಉಡುಪಿಯ ಕಲ್ಪನಾ,ಮಣಿಪಾಲದ ಐನಾಕ್ಸ್‌, ಬಿಗ್‌ ಸಿನೆಮಾದಲ್ಲಿ “ಉಮಿಲ್‌’ ಪ್ರದರ್ಶನಗೊಳ್ಳಲಿದೆ ಎಂದರು. ನಿರ್ಮಾಪಕರಾದ ಕರುಣಾಕರ ಶೆಟ್ಟಿ, ನಟಿ ಪೂಜಾ ಶೆಟ್ಟಿ, ಕಲಾನಿರ್ದೇಶಕ ವಿಲ್‌ಫ್ರೆಡ್‌ ಪಿಂಟೋ ಉಪಸ್ಥಿತರಿದ್ದರು.

ಬೋಳಾರ್‌ ಗಾನ – ವಾಮಂಜೂರು ಸಪ್ತ ಕಲಾಶೈಲಿ !
“ಉಮಿಲ್‌’ ಪೂರ್ಣ ಮಟ್ಟದಲ್ಲಿ ಕಾಮಿಡಿ ಗೆಟಪ್‌ನಲ್ಲಿ ಮೂಡಿಬಂದಿದೆ. ಆ್ಯನಿಮೇಶನ್‌ ಮೂಲಕ ಸಿದ್ಧಗೊಳಿಸಲಾಗಿದೆ. ನವೀನ್‌ ಡಿ. ಪಡೀಲ್‌ ವಿಭಿನ್ನ ಪಾತ್ರದಲ್ಲಿದ್ದಾರೆ. ಅರವಿಂದ ಬೋಳಾರ್‌ ಒಂದು ಹಾಡನ್ನು ಹಾಡಿದ್ದಾರೆ. ಭೋಜರಾಜ್‌ ವಾಮಂಜೂರು ಏಳು ವಿಭಿನ್ನ ಪಾತ್ರಗಳ ಮೂಲಕ ಗಮನ ಸೆಳೆಯಲಿದ್ದಾರೆ. ಸಿನೆಮಾಕ್ಕಾಗಿ ಕಳೆದ ಎರಡು ವರ್ಷಗಳಿಂದ ಶ್ರಮವಹಿಸಿ ದುಡಿಯಲಾಗಿದೆ ಎಂದು ನಿರ್ದೇಶಕ ರಂಜಿತ್‌ ಸುವರ್ಣ ತಿಳಿಸಿದ್ದಾರೆ