“ಡಿ 55′ ಚಿತ್ರಕ್ಕೆ ತೆರೆಮರೆಯಲ್ಲಿ ಸಿದ್ಧತೆ
Team Udayavani, Feb 15, 2019, 5:49 AM IST
ಸದ್ಯ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ “ಯಜಮಾನ’ ಮತ್ತು “ಕುರುಕ್ಷೇತ್ರ’ ಚಿತ್ರಗಳು ತೆರೆಗೆ ಬರುವ ಸಿದ್ಧತೆಯಲ್ಲಿವೆ. ಇದರ ನಡುವೆಯೇ “ಒಡೆಯ’ ಚಿತ್ರದ ಚಿತ್ರೀಕರಣ ಕೂಡ ಭರದಿಂದ ನಡೆಯುತ್ತಿದೆ. ಅದಾದ ಬಳಿಕ “ರಾಬರ್ಟ್’ ಮತ್ತು “ಗಂಡುಗಲಿ ಮದಕರಿ ನಾಯಕ’ ಚಿತ್ರಗಳು ಚಿತ್ರೀಕರಣಕ್ಕೆ ತಯಾರಿ ಮಾಡಿಕೊಳ್ಳುತ್ತಿವೆ.
ಇದರ ನಡುವೆಯೇ ನಿರ್ಮಾಪಕ ಎಂ.ಜಿ ರಾಮಮೂರ್ತಿ ದರ್ಶನ್ ಅಭಿನಯದ 55ನೇ ಚಿತ್ರಕ್ಕೆ ತಯಾರಿಯನ್ನು ಆರಂಭಿಸಿದ್ದಾರೆ. ಹೌದು, ದರ್ಶನ್ ಅಭಿನಯದ 55ನೇ ಚಿತ್ರವನ್ನು ನಿರ್ಮಾಪಕ ಎಂ.ಜಿ ರಾಮಮೂರ್ತಿ ನಿರ್ಮಿಸುತ್ತಿದ್ದು, ಯುಗಾದಿ ವೇಳೆಗೆ ಈ ಚಿತ್ರದ ಕುರಿತಾದ ಒಂದಷ್ಟು ಅಂಶಗಳು ಹೊರಬೀಳಲಿದೆ.
ಈ ಬಗ್ಗೆ ಮಾತನಾಡುವ ನಿರ್ಮಾಪಕ ಎಂ.ಜಿ ರಾಮಮೂರ್ತಿ, ದರ್ಶನ್ ಅವರಿಗಾಗಿ ಈಗಾಗಲೇ ಒಂದಷ್ಟು ಸಬ್ಜೆಕ್ಟ್ಗಳು ರೆಡಿಯಾಗಿದ್ದು, ಈ ಚಿತ್ರವನ್ನು ಯಾರು ನಿರ್ದೇಶಿಸಬೇಕು, ಕಲಾವಿದರು ಮತ್ತು ತಂತ್ರಜ್ಞರ ಬಗ್ಗೆ ಚರ್ಚೆಗಳು ಅಂತಿಮ ಹಂತದಲ್ಲಿವೆ. ಮುಂಬರುವ ಯುಗಾದಿ ವೇಳೆಗೆ ಎಲ್ಲವೂ ಅಂತಿಮವಾಗಲಿದ್ದು, ಇದೇ ಸೆಪ್ಟೆಂಬರ್ ವೇಳೆಗೆ ಈ ಹೊಸಚಿತ್ರ ಆರಂಭವಾಗಲಿದೆ ಎನ್ನುತ್ತಾರೆ.