ಅಕ್ರಮ ಆಹಾರ ಘಟಕ ಮೇಲೆ ದಾಳಿ

Team Udayavani, Jun 5, 2018, 11:06 AM IST

ಬೀದರ: ತಾಲೂಕಿನ ಗುನ್ನಳ್ಳಿ ರಸ್ತೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಅಕ್ರಮ ಆಹಾರ ತಯಾರಿಕಾ ಘಟಕದ ಮೇಲೆ ದಾಳಿ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದ ಅಧಿಕಾರಿಗಳು ದಾಳಿನಡೆಸಿ, ನಿಯಮಗಳನ್ನು ಪಾಲಿಸದ ಹಿನ್ನೆಲೆಯಲ್ಲಿ ಘಟಕವನ್ನು ಸೀಲ್‌ ಮಾಡಿದ್ದಾರೆ.

ಜಿಲ್ಲಾ ಅಂಕಿತ ಅಧಿಕಾರಿ ಡಾ| ಶಿವಶಂಕರ ಬಿ. ನೇತೃತ್ವದಲ್ಲಿ ದಾಳಿ ನಡೆಸಲಾಯಿತು. ಘಟಕದಲ್ಲಿ ಆಕಾಶ ಹೆಸರಿನ ಸೋನ್‌ ಪಾಪಡಿ ತಯಾರಿಸಲಾಗುತ್ತಿದೆ. ಆದರೆ, ಪ್ಯಾಕೇಜ್‌ ಗಳ ಮೇಲೆ ಹೈದ್ರಾಬಾದ್‌ನ ವಿಳಾಸ ನಮೂದಿಸಿರುವುದು ಕಂಡುಬಂದಿದೆ. ಇದು ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ 2006ರ 52 ನೇ ವಿಧಿಪ್ರಕಾರ ಮಿಸ್‌ ಬ್ರಾಂಡ್‌ ಎಂದು ಪರಿಗಣಿಸಬಹುದು ಮತ್ತು 3 ಲಕ್ಷ ರೂ. ವರೆಗೆ ದಂಡ ವಿಧಿಸಬಹುದಾಗಿದೆ.

ಘಟಕದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಯಾವುದೇ ಸಿಬ್ಬಂದಿಯ ವೈದ್ಯಕೀಯ ತಪಾಸಣೆ ಮಾಡಿಸದಿರುವುದು ದಾಳಿ ವೇಳೆ ಕಂಡುಬಂದಿದೆ. ಆದ್ದರಿಂದ ಘಟಕದವರಿಗೆ ನೋಟಿಸ್‌ ನೀಡಿ ಘಟಕಕ್ಕೆ ಬೀಗ ಹಾಕಲಾಗಿದೆ.
 
ಕಾರ್ಯಾಚರಣೆಯಲ್ಲಿ ತಾಲೂಕು ಆಹಾರ ಸುರಕ್ಷತಾ  ಅಧಿಕಾರಿಗಳಾದ ಡಾ| ಪ್ರವೀಣ ಹೂಗಾರ, ರಮೇಶ ಬಿಕ್ಲೆ, ಪ್ರವೀಣಕುಮಾರ ಡಿ.ಎಂ., ಅಜಯ ಪಾಟೀಲ, ಇಸಾಕ್‌ ಭಾಗವಹಿಸಿದ್ದರು.