ಆಟೋಗೆ ಬಂತು ಡಿಜಿಟಲ್‌ ಮೀಟರ್‌

Team Udayavani, Aug 4, 2018, 12:09 PM IST

ವಿಜಯಪುರ: ಐತಿಹಾಸಿಕ ವಿಜಯಪುರ ನಗರ ಮಹಾನಗರ ಪಾಲಿಕೆಯಾಗಿ ಮೇಲೆರ್ಜೆಗೆ ಏರಿದ ನಾಲ್ಕು ವರ್ಷಗಳ ಬಳಿಕ ನಗರದಲ್ಲಿ ಓಡಾಡುವ ಮೀಟರ್‌ ಅಳವಡಿಕೆ ಆಟೋಗಳು ಓಡಾಟ ಆರಂಭಿಸಿವೆ. ಅಚ್ಚರಿಯ ವಿಷಯ ಎಂದರೆ ಕಳೆದ ಎರಡು ತಿಂಗಳಿಂದ ನಗರದಲ್ಲಿ ಸಾವಿರಕ್ಕೂ ಮಿಕ್ಕ ಹೊಸ ಆಟೋಗಳಿಗೆ ಮೀಟರ್‌ ಅಳವಡಿಸಿದ್ದು, ಒಂದೇ ಒಂದು ಆಟೋ ಮೀಟರ್‌ ಬಳಸಿ ಪ್ರಯಾಣಿಕರು ಸಂಚಾರ ಮಾಡಿಲ್ಲ, ಬಾಡಿಗೆ ನೀಡಿಲ್ಲ. ಹಳೆಯ ಪದ್ಧತಿಯಲ್ಲೇ ಓಡಾಟ ಆರಂಭಿಸಿವೆ.

ವಿಜಯಪುರ ಮಹಾನಗರದಲ್ಲಿ ಈಗಾಗಲೇ ಹಳೆಯ ಆಟೋ ಹಾಗೂ ಟಂಟಂ ಸೇರಿ 4,468 ಆಟೋಗಳಿದ್ದು ಯಾವ ಆಟೋಕ್ಕೂ ಮೀಟರ್‌ ಅಳವಡಿಕೆ ಇಲ್ಲ. ಬದಲಾಗಿ ನಗರದ ಮಹಾತ್ಮ ಗಾಂಧೀಜಿ ವೃತ್ತವನ್ನು ಕೇಂದ್ರೀಕರಿಸಿಕೊಂಡು
ನಗರದ ಪ್ರಮುಖ ರಸ್ತೆಯಲ್ಲಿ ನಿಗದಿತ ಯಾವುದೇ ಸ್ಥಳಕ್ಕೆ ಪ್ರಯಾಣಿಸಿದರೂ ಕೇವಲ 10 ರೂ. ನಿಗದಿತ ನಿಖರ ಬಾಡಿಗೆ
ಇದೆ. ಪ್ರಮುಖ ರಸ್ತೆಯ ಸಂಚಾರಕ್ಕೆ 10 ರೂ. ನೀಡಿದರೂ, ಬಡಾವಣೆಯಲ್ಲಿ ಹೋಗಲು ಆಟೋ ಚಾಲಕರು ಕೇಳಿದಷ್ಟು
ಹೆಚ್ಚಿನ ಹಣ ನೀಡುವ ವ್ಯವಸ್ಥೆ ಇದೆ.

ಇದೀಗ ಮೇ ತಿಂಗಳಿಂದ ಮಹಾನಗರದಲ್ಲಿ ಹೊಸದಾಗಿ ಆಟೋ ನೋಂದಣಿಗೆ ಸರ್ಕಾರ ಡಿಜಿಟಲ್‌ ಮೀಟರ್‌ ಅಳವಡಿಕೆ ಕಡ್ಡಾಯ ಮಾಡಿದೆ. ಹೀಗಾಗಿ ಕಳೆದ ಎರಡು ತಿಂಗಳಿಂದ ಪ್ರಾದೇಶಿಕ ಸಾರಿಗೆ ಕಚೇರಿಯಲ್ಲಿ 1050 ಹೊಸ ಆಟೋಗಳು ನೋಂದಣಿ ಮಾಡಿ, ಡಿಜಿಟಲ್‌ ಮೀಟರ್‌ ಅಳವಡಿಸಿಕೊಂಡಿವೆ. ಜೂನ್‌ ಆರಂಭದಿಂದಲೇ ಡಿಜಿಟಲ್‌ ಮೀಟರ್‌ ಆಟೋ ಓಡಾಡುತ್ತಿದ್ದರೂ ಒಬ್ಬನೇ ಪ್ರಯಾಣಿಕ ಮೀಟರ್‌ ಶುಲ್ಕ ಭರಿಸಿ ಓಡಾಡಿಲ್ಲ.
 
ಮೀಟರ್‌ ಅಳವಡಿಕೆ ಮಾಡಿಕೊಂಡಿರುವ ಆಟೋ ಹತ್ತಿದ ಪ್ರಯಾಣಿಕರು ಮೊದಲ 1.5 ಕಿ.ಮೀ. 15 ರೂ. ಹಾಗೂ ಮೊದಲ 3 ಕಿ.ಮೀ. 25 ರೂ. ಬಾಡಿಗೆ ಭರಿಸುವ ಎರಡು ಹಂತದಲ್ಲಿ ನಂತರದ ಪ್ರತಿ ಕಿ.ಮೀ. ರಾತ್ರಿ 10ರಿಂದ ಬೆಳಗ್ಗೆ 6ರವರೆಗೆ ಈ ದರ ಒಂದೂವರೆ ಪಟ್ಟಾಗುತ್ತದೆ. ಅಂದರೆ ಕ್ರಮವಾಗಿ 22.50 ರೂ. ಹಾಗೂ 37.50 ರೂ. ಭರಿಸಬೇಕು ಎಂದು ನಿಗದಿ ಮಾಡಿವೆ.

ಹೊಸ ಆಟೋ ಕೊಂಡು ನೋಂದಣಿ ಮಾಡಿಸುವಾಗ ಡಿಜಿಟಲ್‌ ಮೀಟರ್‌ ಅಳವಡಿಕೆ ಕಡ್ಡಾಯವಾಗಿದೆ. ಈ ಕಾರಣಕ್ಕೆ ಮೀಟರ್‌ ಅಳವಡಿಕೆ ಅನಿವಾರ್ಯವಾಗಿದೆ. ಪ್ರಯಾಣಿಕರು ಈಗಿರುವ 10 ರೂ. ಚಾರ್ಜ್‌ ನೀಡುವುದೇಕ್ಕೇ ಜಗಳ ತೆಗೆಯುತ್ತಿದ್ದು, ಮೀಟರ್‌ ಚಾರ್ಜ್‌ ನೀಡಲು ಒಪ್ಪುತ್ತಿಲ್ಲ. ಹೀಗಾಗಿ ಮೀಟರ್‌ ಅಳವಡಿಕೆ ಸಾಂಕೇತಿಕವಾಗಿದ್ದು, ಪ್ರಯಾಣಿಕರಿಗೂ ಇದರಿಂದ ಒಳಿತಾಗಿಲ್ಲ, ನಮಗೂ ಇದರಿಂದ ಲಾಭವಾಗಿಲ್ಲ ಎಂಬುದು ಆಟೋ ಚಾಲಕರ ಗೊಣಗಾಟ. 

ವಿಜಯಪುರ ಒಟ್ಟು ನಗರದ ಒಳ ಓಡಾಟವೇ 7 ಕಿ.ಮೀ. ಇತಿಮಿತಿಯಲ್ಲಿದೆ. ಹೆಸರಿಗೆ ನಗರದಂತಿರುವ ವಿಜಯಪುರದ
ಬಡವರಿಗೆ ಅದರಲ್ಲೂ ನಿತ್ಯವೂ ಕೂಲಿಗೆ ಓಡಾಡುವ ಬಡ ಪ್ರಯಾಣಿಕರಿಗೆ ಕನಿಷ್ಠ 25 ರೂ. ಮೀಟರ್‌ ಚಾರ್ಜ್‌ ನೀಡುವಷ್ಟು ಶಕ್ತಿ ಖಂಡಿತಾ ಇಲ್ಲ. ಮಹಾನಗರ ಪಾಲಿಕೆ ಆಗಿದ್ದರೂ ವಿಜಯಪುರ ಮಹಾನಗರ ಮಾತ್ರವಲ್ಲ ಇಡಿ
ಜಿಲ್ಲೆಯೇ ಬಡವರಿಂದ ಕೂಡಿದೆ. ಈಗಿರುವ 10 ರೂ. ಬಾಡಿಗೆ ನೀಡುವುದಕ್ಕೆ ಗೊಣಗುತ್ತಿದ್ದು ಮೀಟರ್‌ ಅಳವಡಿಕೆ ಬಾಡಿಕೆ ನೀಡಲು ಸಾಧ್ಯವಿಲ್ಲ ಎಂಬುದು ಪ್ರಯಾಣಿಕರ ದೂರು.