ಮದುವೆ ವಿಧಿ ಬದಲು ರದ್ದತಿ ಪತ್ರ ಓದಿದ ವಧು
Team Udayavani, Nov 18, 2018, 4:45 AM IST
ವಿದೇಶಿ ಮದುವೆಗಳಲ್ಲಿ ಮದುವೆಯ ಶಪಥ ಪತ್ರವನ್ನು ನೆರೆದವರ ಮುಂದೆ ಓದುವುದು ಸಂಪ್ರದಾಯ. ಕ್ಯಾಸಿ ಎಂಬ ಆಸ್ಟ್ರೇಲಿಯಾದ ವಧು ತನ್ನ ಭಾವೀ ಪತಿ ಜೊತೆ ಮದುವೆಯ ಪ್ರತಿಜ್ಞಾ ವಿಧಿಯನ್ನು ಓದುವ ಬದಲು ತನ್ನ 6 ವರ್ಷಗಳ ಪ್ರೇಮಿ, ಭಾವೀ ಗಂಡ ತನಗೆ ಮಾಡಿದ ಮೋಸದ ವಿಷಯ ಮತ್ತು ತಾನು ಮದುವೆ ರದ್ದು ಪಡಿಸಿರುವ ವಿಷಯ ವನ್ನು ಓದಿ ಹೇಳುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ. ಮದುವೆಯ ಹಿಂದಿನ ರಾತ್ರಿ ಸ್ನೇಹಿತೆಯರೊಂದಿಗೆ ಸಂತೋಷ ದಿಂದಿದ್ದ ವೇಳೆ ತಮ್ಮ ಫೋನಿಗೆ ಮೇಲಿಂದ ಮೇಲೆ ಬಂದ ಮೆಸೇಜುಗಳ ಕಡೆ ಅವರು ಗಮನ ಹರಿಸಿದರು.
ಅವರಿಗೆ ಆಶ್ಚರ್ಯ ಕಾದಿತ್ತು, ಅವುಗಳು ಮಹಿಳೆಯೊಬ್ಬರು ಕ್ಯಾಸಿಯ ಭಾವೀ ಪತಿ ಜೊತೆ ನಡೆಸಿದ ಪ್ರೇಮ ಸಂಭಾಷಣೆಗಳು ಮತ್ತು ತೆಗೆಸಿಕೊಂಡ ಫೋಟೊಗಳ ಸ್ಕ್ರೀನ್ಶಾಟ್ ಗಳದ್ದಾಗಿತ್ತು. ಸ್ಕ್ರೀನ್ಶಾಟ್ಗಳನ್ನು ಕೂಲಂಕಶವಾಗಿ ಪರಿಶೀಲಿಸಿದ ಅವರು, ಆ ರಾತ್ರಿಯೇ ಮದುವೆ ರದ್ದುಪಡಿಸಲು ನಿರ್ಧರಿಸಿದರು. ಏಕಾಏಕಿ ಮದುವೆ ರದ್ದುಪಡಿಸಿದರೆ ಮರುದಿನ ಬರಲಿರುವ ನೆಂಟರಿಗೆ ನಿರಾಶೆ ಮಾಡಿದಂತಾಗುತ್ತದೆ ಎಂದು ಭಾವಿಸಿ. ಎಲ್ಲರೆದುರೇ ಆ ಸಂದೇಶಗಳನ್ನು ಬಹಿರಂಗಪಡಿಸಿ, ಮದುವೆ ರದ್ದತಿಯನ್ನು ಘೋಷಿಸಿದರು.