ಜಿಯೋಗೆ ಸೆಡ್ಡು! ಈ ಕಂಪನಿಯೂ ಉಚಿತ ಇಂಟರ್ನೆಟ್, ವೈಫೈ ಕೊಡುತ್ತಂತೆ
Team Udayavani, Feb 9, 2017, 3:48 PM IST
ನವದೆಹಲಿ:ದೇಶಾದ್ಯಂತ 4ಜಿ ಇಂಟರ್ನೆಟ್ ಅನ್ನು ಉಚಿತವಾಗಿ ನೀಡುವ ಮೂಲಕ ಜಿಯೋ ಬರ್ಜರಿ ಸದ್ದು ಮಾಡಿದೆ. ಆದರೆ ಏಪ್ರಿಲ್ ನಿಂದ ಇಂಟರ್ನೆಟ್ ಗೆ ದರ ನಿಗದಿಪಡಿಸಲಿದೆ. ಸಾರ್ವಜನಿಕರಿಗೆ ಉಚಿತವಾಗಿ ಇಂಟರ್ನೆಟ್ ನೀಡುವ ಸಮರ ಮುಂದುವರಿದಿರುವ ನಡುವೆಯೇ ಚೀನಾದ ಇ ಉದ್ಯಮ ಕಂಪನಿಯೊಂದು ಜಿಯೋ ಹಾದಿಯಲ್ಲಿ ಸಾಗುವ ಸಿದ್ಧತೆಯಲ್ಲಿದೆ ಎಂದು ವರದಿ ತಿಳಿಸಿದೆ.
ಭಾರತದಲ್ಲಿ ಗ್ರಾಹಕರಿಗೆ ಉಚಿತ ಇಂಟರ್ನೆಟ್ ಹಾಗೂ ವೈಫೈ ನೀಡುವ ಬಗ್ಗೆ ಚೀನಾದ ಪ್ರತಿಷ್ಠಿತ ಅಲಿಬಾಬಾ ಕಂಪನಿ ಚಿಂತನೆ ನಡೆಸಿದೆ ಎಂದು ವರದಿ ವಿವರಿಸಿದೆ. ಅಲಿಬಾಬಾ ಕಂಪನಿ ಈಗಾಗಲೇ ಚೀನಾದಲ್ಲಿ ಯುಸಿ ವೆಬ್ ಹೆಸರಿನಲ್ಲಿ ಇಂಟರ್’ನೆಟ್ ಸಾಫ್ಟ್ ವೇರ್ ಹಾಗೂ ಸರ್ವಿಸ್ ಪ್ರೊವೈಡ್ ಮಾಡುತ್ತಿದೆ.
ಫೇಸ್’ಬುಕ್, internet.org ಹಾಗೂ ಫ್ರೀ ವೆಬ್ ಸೈಟ್ ಪ್ರಾಜೆಕ್ಟ್ ಮಾಧ್ಯಮಗಳಲ್ಲಿ ಇಂತಹುದೇ ಒಂದು ಉಚಿತ ಯೋಜನೆಯನ್ನು ಭಾರತದಲ್ಲಿ ಪರಿಚಯಿಸುತ್ತೇವೆ ಎಂದು ತಿಳಿಸಿದ್ದವು. ಆದರೆ ಭಾರತದ ಟ್ರಾಯ್ ಸಂಸ್ಥೆ ಈ ಕಂಪನಿಗೆ ಅಗತ್ಯವಿರುವ ಕ್ಲಿಯರೆನ್ಸ್ ನೀಡದ ಕಾರಣ ಫೇಸ್ ಬುಕ್ ಭರವಸೆ ಈಡೇರಿಕೆ ಆಗಿಲ್ಲ. ಹಾಗಾಗಿ ಚೀನಾದ ಅಲಿಬಾಬಾ ಕನಸು ಭಾರತದಲ್ಲಿ ನನಸಾಗಲಿದೆಯೇ ಎಂಬುದು ಕುತೂಹಲಕ್ಕೆ ಎಡೆಮಾಡಿಕೊಟ್ಟಿದೆ.