myPersonality app:40ಲಕ್ಷ ಜನರ ವೈಯಕ್ತಿಕ ಮಾಹಿತಿ ದುರುಪಯೋಗ!
Team Udayavani, Aug 23, 2018, 12:14 PM IST
ಹೊಸದಿಲ್ಲಿ: ಮೈ ಪರ್ಸನಾಲಿಟಿ ಎಂಬ ಆ್ಯಪ್ ಬರೋಬ್ಬರಿ 40 ಲಕ್ಷ ಜನರ ವೈಯಕ್ತಿಕ ಮಾಹಿತಿಯನ್ನು ದುರುಪಯೋಗ ಪಡಿಸಿಕೊಂಡಿದೆ ಎನ್ನುವುದನ್ನು ಫೇಸ್ಬುಕ್ ನಡೆಸಿದ ತನಿಖೆ ಬಹಿರಂಗ ಪಡಿಸಿದೆ.
ಇಂದು 2012 ರಿಂದ ಸಕ್ರಿಯವಾಗಿದ್ದ ಮೈ ಪರ್ಸನಾಲಿಟಿ ಆ್ಯಪನ್ನು ನಿಷೇಧಿಸಿರುವುದಾಗಿ ಫೇಸ್ಬುಕ್ ಹೇಳಿದೆ.
ಮಾರ್ಚ್ನಲ್ಲಿ ಕೆಂಬ್ರಿಡ್ಜ್ ಅನಾಲಿಟಿಕಾ ಹಗರಣ ಬಯಲಾದ ಬಳಿಕ ಥರ್ಡ್ ಪಾರ್ಟಿ ಆ್ಯಪ್ಗಳ ಪತ್ತೆಗೆ ಫೇಸ್ಬುಕ್ ತನಿಖೆಯನ್ನು ಕೈಗೊಂಡಿತ್ತು. ಮೈ ಪರ್ಸನಾಲಿಟಿ ಸುಮಾರು 40 ಲಕ್ಷ ಜನರ ವಯಕ್ತಿಕ ಮಾಹಿತಿಯನ್ನು ದುರುಪಯೋಗ ಪಡಿಸಿಕೊಂಡಿದೆ ಎಂದು ತನಿಖೆಯಲ್ಲಿ ಕಂಡು ಕೊಂಡಿದೆ.
ನಾವು ಇಂತಹ ಆ್ಯಪ್ಗಳಿಗೆ ಕಡಿವಾಣ ಹಾಕಲು ಎಲ್ಲಾ ರೀತಿಯಲ್ಲಿ ಕೆಲಸ ಮಾಡುತ್ತಿದ್ದು, ಜನರ ವೈಯಕ್ತಿಕ ಮಾಹಿತಿಗಳು ಸುರಕ್ಷಿತವಾಗಿರುವಂತೆ ನೋಡಿಕೊಳ್ಳುವುದಾಗಿ ಫೇಸ್ಬುಕ್ ಹೇಳಿಕೊಂಡಿದೆ.