CONNECT WITH US  

ಸೆಬಿ ಶಾಕ್‌; ಸುಸ್ತಿದಾರರಿಗೆ ಸಿಗಲೇಬೇಕಿದ್ದ ಶಿಕ್ಷೆ

ಸಾಲಗಾರರನ್ನು ಉದ್ದೇಶಪೂರ್ವಕ ಸುಸ್ತಿದಾರ ಎಂದು ಘೋಷಿಸುವ ಅಧಿಕಾರವಿರುವುದು ಆರ್‌ಬಿಐ ಅಥವಾ ಬ್ಯಾಂಕುಗಳಿಗೆ. ಹಾಗಾಗಿ ಹಣಕಾಸಿನ ಅವ್ಯವಹಾರಕ್ಕೆ ಕೈಹಾಕುವ ಮುನ್ನ ಉದ್ಯಮಿಗಳು ಇನ್ನುಮುಂದೆ ಬ್ಯಾಂಕುಗಳ ಬಗ್ಗೆ ಹತ್ತು ಸಲ ಯೋಚನೆ ಮಾಡುತ್ತಾರೆ.

ಉದ್ದೇಶಪೂರ್ವಕ ಸುಸ್ತಿದಾರರಿಗೆ ಹೊಸತಾಗಿ ಸಾರ್ವಜನಿಕ ಸಾಲ ಎತ್ತುವುದಕ್ಕೆ ಹಾಗೂ ಷೇರು ಮಾರುಕಟ್ಟೆಯಲ್ಲಿರುವ ಕಂಪೆನಿಗಳ ಆಡಳಿತ ಮಂಡಳಿಯಲ್ಲಿ ಕುಳಿತುಕೊಳ್ಳುವುದಕ್ಕೆ ನಿಷೇಧ ಹೇರುವ ಷೇರು ಮಾರು ಕಟ್ಟೆ ನಿಯಂತ್ರಣ ಮಂಡಳಿ (ಸೆಬಿ)ಯ ನಿರ್ಧಾರ ಈಗಾಗಲೇ ಸುಸ್ತಿಸಾಲದ ಹೊರೆಯಿಂದ ಕಂಗೆಟ್ಟಿರುವ ಸಾರ್ವಜನಿಕ ವಲಯದ ಬ್ಯಾಂಕುಗಳಿಗೆ ವರದಾನವಾಗಿ ಪರಿಣಮಿಸುವುದರಲ್ಲಿ ಅನುಮಾನವೇ ಇಲ್ಲ. ಬ್ಯಾಂಕುಗಳಿಂದ ದೊಡ್ಡ ಪ್ರಮಾಣದಲ್ಲಿ ಸಾಲ ಪಡೆದು, ಅದನ್ನು ವಾಪಸ್‌ ಕಟ್ಟುವ ಶಕ್ತಿಯಿದ್ದರೂ ಕಟ್ಟದೆ, ನಿಯಮಾವಳಿಗಳನ್ನು ಉಲ್ಲಂ ಸಿ ಅನ್ಯ ಮಾರ್ಗದಲ್ಲಿ ಬಳಕೆ ಮಾಡುವ ವಿಜಯ್‌ ಮಲ್ಯರಂತಹ ನೂರಾರು ಉದ್ಯಮಿಗಳಿಗೆ ಇದು ಬಿಗಿ ಮೂಗುದಾ ರವನ್ನೂ ಹಾಕಲಿದೆ.

ಸೆಬಿ ಇಂತಹದ್ದೊಂದು ನಿರ್ಧಾರವನ್ನು ಬಹಳ ವರ್ಷಗಳ ಹಿಂದೆಯೇ ಕೈಗೊಳ್ಳಬೇಕಿತ್ತು. ಹಾಗೆ ಮಾಡಿದ್ದರೆ ಇಂದು ರಾಷ್ಟ್ರೀಕೃತ ಬ್ಯಾಂಕುಗಳು 2 ಲಕ್ಷ ಕೋಟಿ ರೂ.ಗಳಷ್ಟು ಬೃಹತ್‌ ಮೊತ್ತದ ಸುಸ್ತಿಸಾಲದ ಸಮಸ್ಯೆ ಎದುರಿಸುವ ಪ್ರಮೇಯ ಬರುತ್ತಿರಲಿಲ್ಲ. ಹಾಗೆಯೇ, ಬ್ಯಾಂಕಿಂಗ್‌ ವ್ಯವಸ್ಥೆಯ ಜತೆ ಹಾಗೂ ಸಾರ್ವಜನಿಕರ ಜತೆ ಆಟವಾಡುವ ಉದ್ಯಮಿಗಳ ಸಂಖ್ಯೆಯೂ ಈ ಪರಿ ಬೆಳೆಯುತ್ತಿರಲಿಲ್ಲ. ಸೆಬಿ ಈ ನಿರ್ಧಾರ ಕೈಗೊಳ್ಳಲು ದೇಶದ ನಂ. 1 ಸುಸ್ತಿದಾರ ವಿಜಯ್‌ ಮಲ್ಯರ ಪ್ರಕರಣವೇ  ಕಾರಣವಾಗಬೇಕಾಯಿತು ಎಂಬುದು ವಿಪರ್ಯಾಸ. ಆದರೆ, ತಡವಾಗಿಯಾದರೂ ಬ್ಯಾಂಕುಗಳ ಆರ್ಥಿಕ ಆರೋಗ್ಯ
ವನ್ನು ಕಾಪಾಡುವ ನಿಟ್ಟಿನಲ್ಲಿ ಹಾಗೂ ಹಣದ ದುರ್ಬಳಕೆ ಮಾಡಿಕೊಳ್ಳುವ ಉದ್ಯಮಿಗಳ ಅಟಾಟೋಪಕ್ಕೆ ನಿಯಂತ್ರಣ ಹೇರುವ ನಿಟ್ಟಿನಲ್ಲಿ ಸೆಬಿ ಕಠಿಣ ನಿರ್ಧಾರಕ್ಕೆ ಬಂದಿದೆ ಎಂಬುದು ಸಮಾಧಾನಕರ ಸಂಗತಿ.

ಅಚ್ಚರಿಯ ವಿಷಯವೇನೆಂದರೆ ದೇಶದಲ್ಲಿ ಸದ್ಯ 7,000ಕ್ಕೂ ಹೆಚ್ಚು ಉದ್ದೇಶಪೂರ್ವಕ ಸುಸ್ತಿದಾರರಿದ್ದಾರೆ. ಇವರಿಂದ ಬ್ಯಾಂಕುಗಳಿಗೆ ಬರಬೇಕಾದ ಸಾಲದ ಬಾಕಿ 2.7 ಲಕ್ಷ ಕೋಟಿ ರೂಪಾಯಿ. ಇವರಲ್ಲಿ 400ಕ್ಕೂ ಹೆಚ್ಚು ಸುಸ್ತಿದಾರರು ಷೇರು ಮಾರುಕಟ್ಟೆಯಲ್ಲಿ ನೋಂದಣಿಯಾದ ಕಂಪೆನಿಗಳಾಗಿವೆ ಅಥವಾ ಆ ಕಂಪೆನಿಗಳ ಆಡಳಿತ ಮಂಡಳಿಯಲ್ಲಿರುವವರಾಗಿದ್ದಾರೆ. ಇವರು ಬ್ಯಾಂಕುಗಳಿಗೆ ಪಾವತಿಸಬೇಕಿರುವ ಒಟ್ಟು ಹಣ 70 ಸಾವಿರ ಕೋಟಿ ರೂ.ಗೂ ಹೆಚ್ಚಿದೆ. ಸೆಬಿ ಜಾರಿಗೆ ತರುತ್ತಿರುವ ನಿಯಮ ಈ 400ಕ್ಕೂ ಹೆಚ್ಚು ಸುಸ್ತಿದಾರರಿಗೆ ಅನ್ವಯಿಸುತ್ತದೆ. ಇವರ ಕಂಪೆ‌ನಿಗಳು ಷೇರು ಮಾರುಕಟ್ಟೆಯಲ್ಲಿ ಇನ್ನುಮುಂದೆ ಹೊಸ ಷೇರು ಬಿಡುಗಡೆ ಮಾಡಿ ಜನರಿಂದ ಸಾಲ ಎತ್ತುವಂತಿಲ್ಲ ಅಥವಾ ಮ್ಯೂಚುವಲ್‌ ಫ‌ಂಡ್‌ ಸೇರಿದಂತೆ ಇನ್ನಾವುದೇ ರೀತಿಯಲ್ಲಿ ಜನರಿಂದ ಹಣ ಸಂಗ್ರಹಿಸುವಂತಿಲ್ಲ. ಹಾಗೆಯೇ, ಷೇರು ಮಾರುಕಟ್ಟೆಯಲ್ಲಿರುವ ಯಾವುದೇ ಕಂಪೆನಿಯನ್ನು ಹೊಸತಾಗಿ ಖರೀದಿಸುವಂತಿಲ್ಲ ಅಥವಾ ಅದಕ್ಕೆ ನಿರ್ದೇಶಕರಾಗುವಂತಿಲ್ಲ. ಎಲ್ಲಕ್ಕಿಂತ ಮುಖ್ಯವಾಗಿ ಉದ್ದೇಶಪೂರ್ವಕ ಸುಸ್ತಿದಾರರು ಷೇರು ಮಾರುಕಟ್ಟೆಯಲ್ಲಿ ನೋಂದಣಿಯಾದ ಯಾವ್ಯಾವ ಕಂಪೆನಿಗಳ ಆಡಳಿತ ಮಂಡಳಿಯಲ್ಲಿ ಸ್ಥಾನ ಹೊಂದಿದ್ದಾರೋ ಅವೆಲ್ಲ ರದ್ದಾಗುತ್ತವೆ. ಇವೆಲ್ಲವೂ ಉದ್ದೇಶಪೂರ್ವ ಸುಸ್ತಿದಾರರಿಗೆ ಆರಂಭದಲ್ಲೇ ವಿಧಿಸುವ ಶಿಕ್ಷೆಯೂ ಆಗುತ್ತವೆ, ಜತೆಗೆ ಅವರು ಇನ್ನಷ್ಟು ಅವ್ಯವಹಾರ ನಡೆಸದಂತೆ ತಡೆಯುತ್ತವೆ.

ಉದ್ಯಮಿಗಳು ದೊಡ್ಡ ಪ್ರಮಾಣದಲ್ಲಿ ಸಾಲ ಬಾಕಿ ಇರಿಸಿಕೊಂಡೂ ಕಾನೂನಿನ ರಕ್ಷಣೆಯಲ್ಲಿ ಬ್ಯಾಂಕುಗಳಿಂತ ತಪ್ಪಿಸಿಕೊಂಡು ಓಡಾಡಲು ಇಷ್ಟು ದಿನ ಸಾಧ್ಯವಿತ್ತು. ಸೆಬಿಯ ಹೊಸ ನಿಯಮದಿಂದಾಗಿ ಸಾಲ ನೀಡಿದ ಬ್ಯಾಂಕುಗಳಿಗೆ ಇಂತಹ ಉದ್ಯಮಿಗಳ ಮೇಲೆ ಹಿಡಿತ ಲಭಿಸುತ್ತದೆ. ಏಕೆಂದರೆ ಸಾಲಗಾರರನ್ನು ಉದ್ದೇಶಪೂರ್ವಕ ಸುಸ್ತಿದಾರ ಎಂದು ಘೋಷಿಸುವ ಅಧಿಕಾರವಿರುವುದು ಆರ್‌ಬಿಐ ಅಥವಾ ಬ್ಯಾಂಕುಗಳಿಗೇ. ಹಾಗಾಗಿ ಹಣಕಾಸಿನ ಅವ್ಯವಹಾರಕ್ಕೆ ಕೈಹಾಕುವ ಮುನ್ನ ಉದ್ಯಮಿ 
ಗಳು ಇನ್ನುಮುಂದೆ ಬ್ಯಾಂಕುಗಳ ಬಗ್ಗೆ ಹತ್ತು ಸಲ ಯೋಚನೆ ಮಾಡುತ್ತಾರೆ.  ಆದರೆ, ಇಷ್ಟೆಲ್ಲ ಮಾಡಿದ ಮೇಲೂ ಸುಸ್ತಿದಾರರಿಂದ ಸಾಲ ವಸೂಲಿ ಮಾಡಲು ಬ್ಯಾಂಕುಗಳಿಗೆ ಸುಲಭದ ಮಾರ್ಗ ಇನ್ನೂ ಗೋಚರಿಸಿಲ್ಲ. ಆ ದಾರಿಯನ್ನು ಸರಕಾರ ತೋರಿಸಿಕೊಟ್ಟರೆ ಬ್ಯಾಂಕುಗಳೂ ಉಳಿಯುತ್ತವೆ, ಜತೆಗೆ ಸುಸ್ತಿದಾರ ಕಂಪೆನಿಗಳಲ್ಲಿ ಹಾಗೂ ಬ್ಯಾಂಕುಗಳಲ್ಲಿ ಹಣ ತೊಡಗಿಸಿದ ಹೂಡಿಕೆದಾರರ ಹಿತವೂ ರಕ್ಷಣೆಯಾಗುತ್ತದೆ.

Trending videos

Back to Top