CONNECT WITH US  

ಸರ್ವರತ್ತ ನೋಟ

ಚುನಾವಣೆಗಳಲ್ಲಿ ಗೆಲ್ಲಲು ಕೃಷಿಕರನ್ನು ತೃಪ್ತಿ ಪಡಿಸುವುದೇ ಅಗತ್ಯ ಎಂದು ಈಗೀಗ ಎಲ್ಲ ರಾಜಕೀಯ ಪಕ್ಷಗಳು ಮನಗಂಡಂತಿವೆ. ಅದರಂತೆಯೇ ರೈತ ಪರ ಪಕ್ಷ ಎಂದು ಬಿಂಬಿಸಿಕೊಂಡಿರುವ ಜೆೆಡಿಎಸ್‌, ಸಮ್ಮಿಶ್ರ ಸರ್ಕಾರದಲ್ಲಿ ತಮ್ಮ ಛಾಯೆಯನ್ನು ಬಿಟ್ಟುಕೊಡದೆ ಬಜೆಟ್‌ನಲ್ಲಿ ರೈತಾಪಿ ವರ್ಗಕ್ಕೆ ಹೆಚ್ಚು ಒಲವು ತೋರಿದೆ. ಇದು ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು ಶುಕ್ರವಾರ ಮಂಡಿಸಿದ ಬಜೆಟ್‌ನಲ್ಲಿ ಸ್ಪಷ್ಟಗೊಂಡಿದೆ. ಜತೆಗೆ ತಮ್ಮಿಂದ ದೂರವಾಗಿದೆ ಎಂದು ಹೇಳಲಾದ ಅಹಿಂದ ವರ್ಗವನ್ನು ಓಲೈಸುವ, ಆ ಮೂಲಕ ತನ್ನ ದೋಸ್ತಿ ಪಕ್ಷ ಕಾಂಗ್ರೆಸ್ಸನ್ನೂ ಮೆಚ್ಚಿಸುವ ಪ್ರಯತ್ನ ಮಾಡಲಾಗಿದೆ. ಮೇಲ್ವರ್ಗವನ್ನೂ ಕಡೆಗಣಿಸದೆ ಜಾಣ್ಮೆ ತೋರಲಾಗಿದೆ. ಉಳಿದಂತೆ ಶಿಕ್ಷಣ, ಆರೋಗ್ಯ, ಮೂಲಸೌಕರ್ಯ ಆದ್ಯತೆ ನೀಡಲಾಗಿದೆ. ಪ್ರಮುಖವಾಗಿ ಆರ್ಥಿಕ ಆರೋಗ್ಯ ಕಾಪಾಡುವ ಪ್ರಯತ್ನ ಕಂಡುಬರುತ್ತಿದೆ.

ಇತ್ತೀಚೆಗೆ ಕೇಂದ್ರ ಮಂಡಿಸಿದ ಬಜೆಟ್‌ನಲ್ಲಿ ಪ್ರಕಟಿಸಿದ ನೇರ ಆದಾಯ ಯೋಜನೆ (ಪ್ರಧಾನ ಮಂತ್ರಿ ಕಿಸಾನ್‌ ಸಮ್ಮಾನ್‌)ಯಲ್ಲಿ ರೈತರಿಗೆ 6,000 ರೂಪಾಯಿ ಪ್ರೋತ್ಸಾಹ ಧನ ಪ್ರಕಟಿಸಿದ್ದರು. ಈ ಹಿಂದೆ ತೆಲಂಗಾಣದ ಮುಖ್ಯಮಂತ್ರಿ ಕೆ. ಚಂದ್ರಶೇಖರ ರಾವ್‌ ಅವರು 'ರೈತಬಂಧು' ಹೆಸರಿನಲ್ಲಿ ರೈತರಿಗೆ ಎಕರೆಗೆ 8,000 ರೂ. ಪ್ರೋತ್ಸಾಹಧನ ಪ್ರಕಟಿಸಿದ್ದರು. ಅದೇ ಮಾದರಿಯಲ್ಲಿ ನಿಕಟಪೂರ್ವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೂ ಹಿಂದೆ 'ರೈತ ಬೆಳಕು' ಎನ್ನುವ ಯೋಜನೆ ಮೂಲಕ ಹೆಕ್ಟೇರ್‌ಗೆ 10,000 ರೂ. ಪ್ರೋತ್ಸಾಹ ಧನ ಪ್ರಕಟಿಸಿದ್ದರು. ಆ ಯೋಜನೆಯನ್ನು ಕುಮಾರಸ್ವಾಮಿ ಮುಂದುವರೆಸಿರಲಿಲ್ಲ. ಈ ಬಜೆಟ್‌ನಲ್ಲೂ ಅದನ್ನು ಪ್ರಸ್ತಾಪಿಸಿಲ್ಲ. ಆದರೆ, ಮೋದಿ ಸರ್ಕಾರದ ಯೋಜನೆಯನ್ನು ಟೀಕಿಸಿದ್ದ, ಕುಮಾರಸ್ವಾಮಿಯವರೂ ಪರೋಕ್ಷವಾಗಿ ಅದೇ ದಾರಿಯನ್ನು ಹಿಡಿದಿದ್ದಾರೆ. ರೈತರು ಎಲ್ಲ ಜಾತಿ ವರ್ಗಗಳನ್ನೂ ಪ್ರತಿಧಿಸುತ್ತಿರುವುದರಂದ ಅವರು ತೃಪ್ತಿಯಾದರೆ ಮತ ಬ್ಯಾಂಕ್‌ ಭದ್ರ ಎನ್ನುವುದು ಎಲ್ಲರಿಗೆ ಅರಿವಾಗಿದೆ. ಸಿಎಂ ಕೂಡಾ 'ರೈತ ಸಿರಿ' ನೂತನ ಯೋಜನೆ ಪ್ರಕಟಿಸಿದ್ದು, ಸಿರಿಧಾನ್ಯ ಬೆಳೆಗಾರರಿಗೆ ಉತ್ತೇಜನ ನೀಡಲು ಪ್ರತಿ ಹೆಕ್ಟೇರ್‌ಗೆ 10,000 ರೂ. ಬೆಂಬಲ ನೀಡುವುದಾಗಿ ಪ್ರಕಟಿಸಿದ್ದಾರೆ. ಚುನಾವಣಾ ಬಜೆಟ್ ಎಂದು ನೇರವಾಗಿ ಉಲ್ಲೇಖೀಸಲು ಸಾಧ್ಯವಿಲ್ಲ ವಾದರೂ, ಪರೋಕ್ಷವಾಗಿ ರೈತರನ್ನು, ಬಡವರನ್ನು ಓಲೈಸಿ ಹತ್ತಿರದಲ್ಲೇ ಇರುವ ಲೋಕಸಭಾ ಚುನಾವಣೆಗೆ ಮತಬ್ಯಾಂಕ್‌ ಗಟ್ಟಿಗೊಳಿಸುವ ಸಿದ್ಧತೆ ನಡೆಸಿದಂತೆ ಭಾಸವಾಗುತ್ತದೆ. .

ಆದರೆ, ದೀರ್ಘ‌ಕಾಲಿಕ ಹಾಗೂ ಶಾಶ್ವತವಾಗಿ ಜನರ ಮನಸ್ಸಿನಲ್ಲಿ ಉಳಿಯುವ ಯೋಜನೆಗಳನ್ನು ಪ್ರಕಟಿಸಿಲ್ಲ. ಇದ್ದುದರಲ್ಲೇ ಎಲ್ಲರಿಗೂ ಬಿಡಿಬಿಡಿಯಾಗಿ ಹಂಚುವ ನಿಲುವನ್ನು ಬಜೆಟ್ ಮೂಲಕ ವ್ಯಕ್ತಪಡಿಸಿದ್ದಾರೆ. ಇದು ಆರ್ಥಿಕ ಶಿಸ್ತನ್ನು ಕಾಪಾಡಲು ನಡೆಸಿದ ಯತ್ನವೇನೋ ಎಂದು ಭಾಸವಾಗುತ್ತದೆ. ಆದರೆ ಆರ್ಥಿಕ ಆರೋಗ್ಯದ ಸುಧಾರಣೆಗೆ ಯತ್ನ ನಡೆಸಿದ ಸ್ಪಷ್ಟತೆ ಇಲ್ಲ. ಈ ಹಿಂದೆ ಸಿದ್ದರಾಮಯ್ಯ ಸರ್ಕಾರ ಸಾಲ ಪಡೆದಿದ್ದನ್ನು ಟೀಕಿಸಿದ್ದ ಕುಮಾರಸ್ವಾಮಿ, ತಮ್ಮ ಬಜೆಟ್‌ನಲ್ಲಿ ಸುಮಾರು 48 ಸಾವಿರ ಕೋಟಿ ಸಾಲ ಪಡೆಯಲು ನಿರ್ಧರಿಸುವ ಮೂಲಕ ಸಾಲವಿಲ್ಲದೆ ಆರ್ಥಿಕ ನಿರ್ವಹಣೆ ಕಷ್ಟ ಎಂಬುದನ್ನು ಒಪ್ಪಿಕೊಂಡಿದ್ದಾರೆ. ಮದ್ಯದ ಮೇಲಿನ ಹೆಚ್ಚುವರಿ ಅಬಕಾರಿ ಸುಂಕವನ್ನು ತುಸು ಹೆಚ್ಚಿಸುವ ಮೂಲಕ ಆರ್ಥಿಕ ಹೊರೆ ತಗ್ಗಿಸಲು ಪ್ರಯತ್ನಿಸಲಾಗಿದೆ. ಜಿಎಸ್‌ಟಿ ಹೊರತು ಪಡಿಸಿ ರಾಜ್ಯ ಸರ್ಕಾರ ಬದಲಾಯಿಸಬಲ್ಲ ಮುದ್ರಾಂಕ ಶುಲ್ಕ, ಪೆಟ್ರೋಲ್‌-ಡೀಸೆಲ್‌ ತೆರಿಗೆ , ಮೋಟಾರು ವಾಹನಗಳ ಮೇಲಿನ ತೆರಿಗೆಯನ್ನು ಹೆಚ್ಚಿಸದಿರುವುದು ಕಂಡುಬರುತ್ತದೆ. ಲೋಕಸಭಾ ಚುನಾವಣೆ ನಂತರ ಕಾಲಕ್ಕೆ ತಕ್ಕಂತೆ ರಾಜ್ಯ ಸರ್ಕಾ ರವೇ ವಿಧಿಸಬಹುದಾದ ಸೆಸ್‌ಗಳ ಮೂಲಕ ಹೆಚ್ಚುವರಿ ತೆರಿಗೆ ಏಟುಜನರಿಗೆ ಬೀಳಬಹುದೇ ಎಂಬ ಅನುಮಾನವೂ ಇದೆ.


Trending videos

Back to Top