ಬ್ರಝಿಲ್‌ಗೆ ನೇಯ್ಮರ್‌ ಬಲ

Team Udayavani, Jun 17, 2018, 6:00 AM IST

ರೊಸ್ತೋವ್‌: ವಿಶ್ವದ ಅತ್ಯಂತ ದುಬಾರಿ ಫ‌ುಟ್‌ಬಾಲ್‌ ಆಟಗಾರ ನೇಯ್ಮರ್‌ ಪಾದದ ಗಾಯದಿಂದ ಪೂರ್ಣವಾಗಿ ಚೇತರಿಸಿಕೊಂಡಿದ್ದಾರೆ. ಅವರ ಬಲದಿಂದ ಬ್ರಝಿಲ್‌ ತಂಡವು ವಿಶ್ವಕಪ್‌ನ ತನ್ನ ಆರಂಭಿಕ ಪಂದ್ಯದಲ್ಲಿ ರವಿವಾರ ಸ್ವಿಜರ್‌ಲ್ಯಾಂಡ್‌ ತಂಡವನ್ನು ಎದುರಿಸಲು ಸಿದ್ಧವಾಗಿದ್ದು ಗೆಲುವಿನ ಆತ್ಮವಿಶ್ವಾಸದಲ್ಲಿದೆ.

ಕಳೆದ ಮಾರ್ಚ್‌ನಲ್ಲಿ ಪಾದದ ಗಾಯಕ್ಕೆ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ನೇಯ್ಮರ್‌ ಮೂರು ತಿಂಗಳ ಬಳಿಕ ತನ್ನ ತಂಡದ ಸದಸ್ಯರ ಜತೆ ಕಣಕ್ಕೆ ಇಳಿಯಲಿದ್ದಾರೆ. ಕಳೆದ ಫೆಬ್ರವರಿಯಲ್ಲಿ ಮಾರ್ಸೆಲ್ಲೆಯಲ್ಲಿ ನಡೆದ ಪಂದ್ಯದ ವೇಳೆ ಅವರ ಕಾಲಿಗೆ ಗಾಯವಾಗಿತ್ತು. ಆಬಳಿಕ ಅವರು 129 ನಿಮಿಷ ಮಾತ್ರ ಅಂಗಣದಲ್ಲಿ ಆಡಿದ್ದಾರೆ. ಇದರಲ್ಲಿ ಹೆಚ್ಚಿನ ಸಮಯ ಬ್ರಝಿಲ್‌ನ ಅಭ್ಯಾಸ ಪಂದ್ಯಗಳಲ್ಲಿಯೇ ಆಡಿದ್ದರು. ಕ್ರೊವೇಶಿಯ ವಿರುದ್ಧ ಗೋಲು ಹೊಡೆದಿದ್ದ ಅವರು ಕಳೆದ ವಾರ ಆಸ್ಟ್ರೀಯ ವಿರುದ್ಧ ಸೊಗಸಾದ ಹೊಡೆತಯಿಂದ ಗಮನ ಸೆಳೆದಿದ್ದರು. 

ನಾಲ್ಕು ವರ್ಷಗಳ ಹಿಂದೆ ಸೆಮಿಫೈನಲ್‌ ಪಂದ್ಯದಲ್ಲಿ ಜರ್ಮನಿ ಕೈಯಲ್ಲಿ 1-7 ಗೋಲುಗಳ ಹೀನಾಯ ಸೋಲಿನ ಬಳಿಕ ಬ್ರಝಿಲ್‌ ಈಗ ವಿಶ್ವಕಪ್‌ನಲ್ಲಿ ಆಡುತ್ತಿದೆ. ಆ ಸೋಲನ್ನು ಮರೆತು ಈ ಬಾರಿ ಪ್ರಶಸ್ತಿ ಗೆಲುವಿನ ನಿರೀಕ್ಷೆÁ ೂಂದಿಗೆ ಬ್ರಝಿಲ್‌ ಕಣಕ್ಕೆ ಇಳಿದಿದೆ.

ಕಳೆದ ವಿಶ್ವಕಪ್‌ನಲ್ಲಿ ಆಡಿದ ತಂಡದಲ್ಲಿದ್ದ ಆರು ಮಂದಿ ಈ ಬಾರಿಯೂ ಬ್ರಝಿಲ್‌ ಪರ ಆಡುತ್ತಿದ್ದಾರೆ. ಅವರಲ್ಲಿ ನೇಯ್ಮರ್‌ ಕೂಡ ಒಬ್ಬರು. ಆರಂಭಿಕ ಲೈನ್‌ ಅಪ್‌ನಲ್ಲಿ ನೇಯ್ಮರ್‌ ಇರಲಿದ್ದಾರೆ. 

ನೇಯ್ಮರ್‌ ಶ್ರೇಷ್ಠ ಆಟಗಾರ. ದೇವರಿಗೆ ಅಭಿನಂದನೆ ಎಂದು ಗೋಲ್‌ಕೀಪರ್‌ ಅಲಿಸನ್‌ ಪ್ರತಿಕ್ರಿಯೆ ನೀಡಿದ್ದಾರೆ. ಒಲಿಂಪಿಕ್ಸ್‌ ವೇಳೆ ವೈಯಕ್ತಿಕವಾಗಿ ನೇಯ್ಮರ್‌ ಅವರ ಬಗ್ಗೆ ತಿಳಿಯಿತು. ಅವರು ನನ್ನನ್ನು ಚೆನ್ನಾಗಿ ನೋಡಿಕೊಂಡಿದ್ದಾರೆ. ಅವರು ನನ್ನ ಕುಟುಂಬದ ಸ್ನೇಹಿತರಾಗಿದ್ದಾರೆ ಎಂದು  ಜೇಸಸ್‌ ಹೇಳಿದ್ದಾರೆ. 

ಮೈದಾನದ ಹೊರಗೂ ಅವರು ಆತ್ಮೀಯವಾಗಿ ಇರುತ್ತಾರೆ ಮತ್ತು ಒಳ್ಳೆಯ ಸಲಹೆ ಸೂಚನೆ ನೀಡುತ್ತಾರೆ. ಇದು ಅತೀಮುಖ್ಯ. ಒಳ್ಳೆಯ ಸಂಬಂಧವಾಗಿ ನೋಡಿಕೊಂಡರೆ ಸ್ನೇಹಿತರಾಗಿ ಟ್ರೀಟ್‌ ಮಾಡಬಹುದು ಎಂದವರು ತಿಳಿಸಿದರು.