ಸಿದ್ದು ಮೈತ್ರಿ ಸರ್ಕಾರದ ರಕ್ಷಕ, ವಿಲನ್ ಯಾರು ಗೊತ್ತಾ? ಎಚ್ ಡಿಕೆ

Team Udayavani, Sep 17, 2018, 5:21 PM IST

ಕಲಬುರಗಿ: ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ರಕ್ಷಣೆಯಿಂದಲೇ ಈ ಸರ್ಕಾರ ಸುಭದ್ರವಾಗಿದೆ. ಸಮ್ಮಿಶ್ರ ಸರ್ಕಾರದಲ್ಲಿ ಯಾವುದೇ ಗೊಂದಲವಿಲ್ಲ. ವಿನಾಃ ಕಾರಣ ಸಿದ್ದರಾಮಯ್ಯನವರ ವಿರುದ್ಧ ಸುಳ್ಳು ಸುದ್ದಿ ಹಬ್ಬಿಸುತ್ತಿದ್ದಾರೆ. ಬಿಜೆಪಿಯೇ ಸಮ್ಮಿಶ್ರ ಸರ್ಕಾರದ ವಿಲನ್ ಎಂದು ಮುಖ್ಯಮಂತ್ರಿ ಎಚ್ ಡಿ ಕುಮಾರಸ್ವಾಮಿ ತಿಳಿಸಿದ್ದಾರೆ.

ಸೋಮವಾರ ಕಲಬುರಗಿಯಲ್ಲಿ ಸುದ್ದಿಗಾರರ ಜೊತೆ ಮಾತನಾಡಿದ ಅವರು, ಸಮ್ಮಿಶ್ರ ಸರ್ಕಾರದ ಬಗ್ಗೆ ದಿನಂಪ್ರತಿ ಒಂದೊಂದು ಸುದ್ದಿಯನ್ನು ಹರಿಯಬಿಡುತ್ತಿದ್ದಾರೆ. ನಾನು ಯಾವುದೇ ಕಿಂಗ್ ಪಿನ್ ಗಳ ಹೆಸರು ಹೇಳಿಲ್ಲ, ಆದರೂ ಬಿಜೆಪಿಯವರು ತೋಳ ಬಂತು ತೋಳ ಎಂಬಂತೆ ನಡೆದುಕೊಳ್ಳುತ್ತಿದ್ದಾರೆ ಎಂದು ವಾಗ್ದಾಳಿ ನಡೆಸಿದರು.

ಕಾಂಗ್ರೆಸ್, ಜೆಡಿಎಸ್ ಮೈತ್ರಿ ಸರ್ಕಾರಕ್ಕೆ ನಿಜವಾದ ವಿಲನ್ ಬಿಎಸ್ ಯಡಿಯೂರಪ್ಪ ಎಂದು ಈ ಸಂದರ್ಭದಲ್ಲಿ ಆರೋಪಿಸಿದರು. ಸಿದ್ದರಾಮಯ್ಯನವರ ರಕ್ಷಣೆಯಿಂದ ಈ ಮೈತ್ರಿ ಸರ್ಕಾರ 5 ವರ್ಷ ಪೂರೈಸಲಿದೆ ಎಂದು ವಿಶ್ವಾಸವ್ಯಕ್ತಪಡಿಸಿದರು.

ಭಿನ್ನಮತ ಇಲ್ಲ: ಡಿಸಿಎಂ ಪರಮೇಶ್ವರ್

ನಮ್ಮಲ್ಲಿ ಭಿನ್ನಮತವೇ ಇಲ್ಲ ಎಂದ ಮೇಲೆ ಶಮನ ಮಾಡುವುದು ಎಲ್ಲಿಂದ. ಸರ್ಕಾರ ಸುಭದ್ರವಾಗಿದೆ ಎಂದು ಗೃಹ ಸಚಿವ, ಉಪಮುಖ್ಯಮಂತ್ರಿ ಪರಮೇಶ್ವರ್ ಅವರು ಕೊರಟಗೆರೆಯಲ್ಲಿ ಸುದ್ದಿಗಾರರ ಪ್ರಶ್ನೆಯೊಂದಕ್ಕೆ ಈ ರೀತಿ ಪ್ರತಿಕ್ರಿಯೆ ನೀಡಿದ್ದಾರೆ.

ಜಾರಕಿಹೊಳಿ ಅವರಗಾಗಲಿ ಅಥವಾ ಬೇರೆಯವರು ಯಾರು ಏನೇ ಹೇಳಿಕೆ ನೀಡಲಿ. ಅದು ಅವರಿಗೆ ಬಿಟ್ಟ ವಿಚಾರ. ಸರ್ಕಾರ ಬೀಳುವಂತಹ, ಬೀಳಿಸುವಂತಹ ಪರಿಸ್ಥಿತಿ ಇಲ್ಲ ಎಂದು ಹೇಳಿದರು.