ಡಿಮೆನ್ಶಿಯಾ ಬಗ್ಗೆ ಅರಿವು ವಿಸ್ತರಿಸಲಿ

Team Udayavani, Oct 14, 2018, 6:00 AM IST

ಹಿಂದಿನ ವಾರದಿಂದ- ಡಿಮೆನ್ಶಿಯಾ ಅಪಾಯ ಮತ್ತು ತಡೆವಯಸ್ಸು, ವಂಶವಾಹಿಗಳಂತಹ ಡಿಮೆನ್ಶಿಯಾದ ಅಪಾಯಾಂಶಗಳನ್ನು ತಡೆಯಲು ಅಥವಾ ಬದಲಾಯಿಸಲು ಸಾಧ್ಯವಿಲ್ಲ.

ಹೃದಯ, ರಕ್ತನಾಳ ಸಂಬಂಧಿ ಅಂಶಗಳು, ದೇಹದಾಡ್ಯì ಮತ್ತು ಆಹಾರಾಭ್ಯಾಸದಂತಹ ಕ್ಷೇತ್ರಗಳಲ್ಲಿ ಡಿಮೆನ್ಶಿಯಾ ಅಪಾಯ ಕಡಿಮೆ ಮಾಡುವುದು ಹಾಗೂ ತಡೆಗೆ ಸಂಬಂಧಿಸಿ ಸಂಶೋಧನೆ ಮುಂದುವರಿಯುತ್ತಿದೆ. 

ಹೃದಯ-ರಕ್ತನಾಳ ಸಂಬಂಧಿ ಅಪಾಯಾಂಶಗಳು: ನಿಮ್ಮ ಮಿದುಳು ನಮ್ಮ ದೇಹದ ಸಂಪದ್ಭರಿತ ರಕ್ತನಾಳ ಜಾಲದಿಂದ ಪಾಲನೆ-ಪೋಷಣೆ ಪಡೆಯುತ್ತದೆ. ನಿಮ್ಮ ಹೃದಯವನ್ನು ರಕ್ಷಿಸುವ ಅವೇ ಮುನ್ನೆಚ್ಚರಿಕೆಯ ಕ್ರಮಗಳ ಮೂಲಕ ನೀವು ನಿಮ್ಮ ಮಿದುಳನ್ನೂ ರಕ್ಷಿಸಬಹುದು- ಧೂಮಪಾನ ಮಾಡಬೇಡಿ, ರಕ್ತದೊತ್ತಡವನ್ನು ನಿಯಂತ್ರಿಸಲು ಕ್ರಮ ಕೈಗೊಳ್ಳಿ, ಕೊಲೆಸ್ಟರಾಲ್‌ ಮತ್ತು ರಕ್ತದ ಸಕ್ಕರೆಯ ಅಂಶ ಮಿತಿಯಲ್ಲಿರಲಿ, ಆರೋಗ್ಯಯುತ ದೇಹತೂಕವನ್ನು ಕಾಯ್ದುಕೊಳ್ಳಿ.

ದೈಹಿಕ ವ್ಯಾಯಾಮ: ನಿಯಮಿತವಾಗಿ ವ್ಯಾಯಾಮ ಮಾಡುವುದರಿಂದ ಕೆಲವು ವಿಧದ ಡಿಮೆನ್ಶಿಯಾಗಳ ಅಪಾಯವನ್ನು ಕಡಿಮೆ ಮಾಡಬಹುದು. ನಿಯಮಿತ ವ್ಯಾಯಾಮದಿಂದ ಮಿದುಳಿಗೆ ರಕ್ತಸಂಚಾರ ಮತ್ತು ಆಮ್ಲಜನಕ ಸರಬರಾಜು ಚೆನ್ನಾಗಿ ನಡೆದು ಪ್ರಯೋಜನ ಉಂಟಾಗುತ್ತದೆ ಎಂಬುದಾಗಿ ಕೆಲವು ನಿದರ್ಶನಗಳು ಶ್ರುತಪಡಿಸಿವೆ.

ಆಹಾರಾಭ್ಯಾಸ: ನೀವು ಏನನ್ನು ಸೇವಿಸುತ್ತೀರಿ ಎಂಬುದು ಹೃದಯಕ್ಕೆ ಸಂಬಂಧಿಸಿದ್ದಾದರೂ ಮಿದುಳಿನ ಮೇಲೆಯೂ ಅದು ಪರಿಣಾಮಗಳನ್ನು ಹೊಂದಿದೆ. 

ಆರೋಗ್ಯಯುತ ಹೃದಯಕ್ಕಾಗಿ ಅನುಸರಿಸುವ ಮಿಡಿಟರೇನಿಯನ್‌ ಆಹಾರಾಭ್ಯಾಸದಂಥವು ಮಿದುಳನ್ನೂ ರಕ್ಷಿಸುತ್ತವೆ ಎಂಬುದು ಅಧ್ಯಯನಗಳಿಂದ ದೃಢವಾಗಿದೆ. ಮೆಡಿಟರೇನಿಯನ್‌ ಆಹಾರಾಭ್ಯಾಸವು ಮಿತವಾದ ಕೆಂಪು ಮಾಂಸ ಒಳಗೊಂಡಿದ್ದು, ಹೆಚ್ಚು ಧಾನ್ಯಗಳು, ತರಕಾರಿ ಮತ್ತು ಹಣ್ಣುಗಳು, ಮೀನು ಹಾಗೂ ಚಿಪ್ಪು ಮೀನುಗಳನ್ನು ಹೆಚ್ಚು ಒಳಗೊಂಡಿರುತ್ತದೆ. ಜತೆಗೆ, ಬೀಜಗಳು, ಆಲಿವ್‌ ಎಣ್ಣೆ ಮತ್ತು ಇತರ ಆರೋಗ್ಯಯುತ ಕೊಬ್ಬುಗಳು ಇರುತ್ತವೆ.