ಎದೆಯೊಳಗೆ ನೀನು ಬೆಚ್ಚಗೆ ಮಲಗಿದೀಯ!

Team Udayavani, Aug 14, 2018, 6:00 AM IST

ಕೋತಿ,
ನಿನ್ನನ್ನ ನೆನಪಿಸಿಕೊಳ್ಳೋಕೆ ಟೈಮೇ ಸಿಗ್ತಿಲ್ಲ ನೋಡು. ಮೊನ್ನೆ ಜನವರಿಯಲ್ಲಿ ಒಮ್ಮೆ ಮೆಸೇಜ್‌ ಮಾಡಿದ್ದು ಬಿಟ್ರೆ, ಈಗ ಆಗಸ್ಟ್‌ ಆಗ್ತಾ ಬಂತು. ಒಂದೂ ಮೆಸೇಜ್‌ ಇಲ್ಲ, ಇನ್ನು ಫೋನ್‌ ಮಾಡೋದಂತೂ ಕೇಳ್ಳೋದೇ ಬೇಡ. ನಿನ್‌ ಕಷ್ಟ ನನಗೂ ಅರ್ಥ ಆಗುತ್ತೆ. ಅದಕ್ಕೇ ನಂಬರ್‌ ಕೊಡು ಅಂತ ನಿಂಗೆ ಒತ್ತಾಯ ಮಾಡಿ ಕೇಳಲ್ಲ. ಆದರೆ, ಯಾವತ್ತೂ ನನ್ನನ್ನ ಮರೀಬೇಡ ಅಂತಷ್ಟೇ ನಿನ್ನನ್ನು ಕೇಳಿಕೊಳ್ಳೋದು. 

ಮೊನ್ನೆಯಷ್ಟೇ ನನ್ನ ಬರ್ತ್‌ಡೇ ಆಯ್ತು. ನೀನು ವಿಷ್‌ ಮಾಡ್ಲಿಲ್ಲ ಅನ್ನೋ ಬೇಜಾರು ಇದೆ. ಅದನ್ನು ಎದೆಯೊಳಗೆ ಇಟ್ಕೊಂಡೇ ನಿನ್ನ ಹುಟ್ಟಿದಹಬ್ಬಕ್ಕೆ ಎಲ್ಲರಿಗಿಂತ ಮೊದಲು ನಾನೇ ವಿಷ್‌ ಮಾಡ್ಬೇಕು ಅಂತ ಕಾಯ್ತಾ ಇದ್ದೀನಿ. ಯಾಕೆ ಗೊತ್ತಾ? ನೀನು ಎಲ್ರಿಗಿಂತ ಸ್ಪೆಷಲ್‌. ನಾನು ಯಾರನ್ನಾದ್ರೂ ಒಂದುಸಲ ಹಚ್ಚಿಕೊಂಡ್ರೆ ಮುಗೀತು. ಅವರು ಶತ್ರುಗಳೇ ಆದರೂ, ಕಡೆಯತನಕ ಮರೆಯೋ ಮಾತೇ ಇಲ್ಲ. 

ಇನ್ನು ನೀನು ಈ ಹೃದಯದಲ್ಲಿ ಬೆಚ್ಚಗೆ ಮಲಗಿದ್ದೀಯ. ನಿನ್ನನ್ನು ಹೇಗೆ ಮರೆಯೋದು ಹೇಳು? ಕೊನೆಯತನಕ ಈ ಸ್ನೇಹವನ್ನು ಉಳಿಸಿಕೊಂಡು ಹೋಗುವೆನೆಂದು ಒಮ್ಮೆ ಹೇಳಿಬಿಡು; ಅಷ್ಟೇ ಸಾಕು ನನಗೆ. ನಮ್ಮ ಸ್ನೇಹ ಬಾಂಧವ್ಯ ಉಕ್ಕಿ ಹರಿಯುವ ನದಿಯಂತೆ, ನಮ್ಮ ನಡುವೆ ಯಾರೇ ಬಂದರೂ ಕೊಚ್ಚಿ ಹೋಗುವುದು ನಿಜ ಎನ್ನುವುದು ಕೆಲವರಿಗಾದರೂ ಅರ್ಥವಾದರೆ ಸಾಕು. ನಾವು ಬರೀ ಲವರ್ ಮಾತ್ರವಲ್ಲ, ಫ್ರೆಂಡ್ಸ್‌ ಕೂಡ ಹೌದು ಅಂತ ನೀನೂ ಒಪ್ತಿಯ ಅಲ್ವ? ಅದೇ ನೆಪದಲ್ಲಿ, ಮೊನ್ನೆ ಸ್ನೇಹಿತರ ದಿನಾಚರಣೆ ಇತ್ತಲ್ಲ… ಆಗ ನೀನು ಕಾಲ್‌ ಮಾಡಬಹುದಿತ್ತು. ಇರಲಿ ಬಿಡು, ನಾವು ಎಷ್ಟೇ ದೂರದಲ್ಲಿದ್ರೂ, ಮಾತು ಆಡಿದ್ರೂ, ಆಡದೇ ಇದ್ರೂ ನಮ್ಮ ಸ್ನೇಹ ಶಾಶ್ವತವಾಗಿರುತ್ತೆ. 

ವೆಂಕಿ