CONNECT WITH US  

ಥ್ರಿಲ್ಲರ್‌ ಕತೆಗಳು

ಈ ಕಥೆಗಳನ್ನು ಓದುತ್ತಿದ್ದಂತೆಯೇ ನಿಮಗೆ ಭಯವಾದರೆ, ಮೈ ಜುಂ ಅಂದರೆ ನಾವದಕ್ಕೆ ಜವಾಬ್ದಾರರಲ್ಲ!

ಆತ ಆಫೀಸು ಬಿಡುವಾಗ ರಾತ್ರಿ ಹತ್ತಾಗಿತ್ತು. ಜಿಟಿ ಜಿಟಿ ಮಳೆ. ಆ ನಗರದಲ್ಲಿ ಕರೆಂಟ್‌ ಕೈಕೊಟ್ಟಿತು. ರೂಮ್‌ಮೇಟ್‌ಗೆ ಫೋನು ಮಾಡಿದ. "ವರ್ಕ್‌ಲೋಡ್‌ ಜಾಸ್ತಿ ಇದೆ. ರೂಮ್‌ಗೆ ಬರೋದು ಮಧ್ಯರಾತ್ರಿ ಆಗುತ್ತೆ' ಅಂದ. ಸರಿ ಎಂದು ಈತ ಹೋಟೆಲ್‌ನಿಂದ ಪಾರ್ಸೆಲ್‌ ತೆಗೆದುಕೊಂಡು, ರೂಮ್‌ ಕಡೆಗೆ ಹೊರಟ. ಈ ಬ್ಯಾಚುಲರ್‌ ಪಾಡು ಯಾರಿಗೂ ಬೇಡ ಎಂಬ ಭಾವ ಆತನ ಮನಸ್ಸಿನಲ್ಲಿತ್ತು. ಕೊನೆಗೂ ಮನೆ ತಲುಪಿದಾಗ ರಾತ್ರಿ 11 ಆಗಿತ್ತು. 3ನೇ ಮಹಡಿಯಲ್ಲಿರುವ ರೂಮ್‌ನತ್ತ ಹೋಗಿ, ಅಲ್ಲಿದ್ದ ಚಪ್ಪಲಿಯ ಗೂಡಿನಲ್ಲಿ ನೋಡಿದರೆ, ಕೀ ಇದ್ದಿರಲಿಲ್ಲ. ಇಬ್ಬರೂ ಬಳಸುತ್ತಿದ್ದುದ್ದು ಒಂದೇ ಕೀ. ಇನ್ನೊಬ್ಬ ಆಫೀಸಿನಲ್ಲಿದ್ದಾನೆ. ಈಚೆ ಬಂದು ನೋಡಿದರೆ, ಬಾಗಿಲು ತೆರೆದಿದೆ. ಬಲುºಗಳು ಹೊತ್ತಿಕೊಂಡಿವೆ. ಯಾವುದಕ್ಕೂ ರೂಮ್‌ಮೇಟ್‌ಗೆ ಫೋನು ಮಾಡೋಣವೆಂದು, ಮೊಬೈಲ್‌ ಕೈಗೆತ್ತಿಕೊಂಡಾಗ ಅಲ್ಲಿ ಗೆಳೆಯ "ರವಿ'ಯ ಮಿಸ್ಡ್ ಕಾಲ್‌ ಇತ್ತು. ಈತ ಬೆಚ್ಚಿಬಿದ್ದ. ಈ ಹಿಂದೆ ರೂಮ್‌ಮೇಟ್‌ ಆಗಿದ್ದ ರವಿ, ಕಳೆದ ತಿಂಗಳಷ್ಟೇ ತೀರಿಕೊಂಡಿದ್ದ!

ಅದೊಂದು ಮಧ್ಯರಾತ್ರಿ. ವಿಪರೀತವಾದ ಚಳಿ ಜ್ವರ. ಮೈ ಕೈ ನೋವಿನಿಂದಾಗಿ ಮೇಲೇಳಲು ಆಗ್ತಾ ಇಲ್ಲ. ಸ್ನೇಹಿತರೆಲ್ಲ ಊರಿಗೆ ಹೋಗಿದ್ದಾರೆ. ಆಸ್ಪತ್ರೆಗೆ ಹೋಗೋಣವೆಂದರೆ, ಗಂಟೆ 12! ಇಷ್ಟೊತ್ತಿನಲ್ಲಿ ಏನು ಮಾಡೋದು ಅಂತಾ ಯೋಚಿಸುವಷ್ಟರಲ್ಲಿ ಪೋನ್‌ ಕೈಗೆತ್ತಿಕೊಂಡು ತನ್ನ ಸ್ನೇಹಿತನಿಗೆ ವಿಷಯ ತಿಳಿಸಿದ. ಸುಮಾರು ಅರ್ಧ ಗಂಟೆ ಕಳೆದಿತ್ತು. ಯಾರಧ್ದೋ ಕಾರು ಮನೆಯ ಮುಂದೆ ಬಂದು ನಿಂತಿತು. ಮೆಲ್ಲಗೆ ಎದ್ದು ಹೋಗಿ ಬಾಗಿಲು ತೆಗೆದು ನೋಡಿದಾಗ ಲೇಡಿ ಡಾಕ್ಟರ್‌. ಒಳಗೆ ಬಂದವರೇ ಇಂಜೆಕ್ಷನ್‌ ಕೊಟ್ಟು ಅರ್ಧ ಗಂಟೆ ಅಲ್ಲಿಯೇ ಕುಳಿತರು, ಈಗ ಸ್ವಲ್ಪ ಅರಾಮ ಅನ್ನಿಸಿತು. "ಏನೂ ಪ್ರಾಬ್ಲಿಂ ಇಲ್ಲ. ಮಲಗಿ ರೆಸ್ಟ್‌ ತಗೊಳ್ಳಿ' ಎಂದು ಹೇಳಿ, ಲೇಡಿಡಾಕ್ಟರ್‌ ಹೊರಟೇಬಿಟ್ಟರು. ಥ್ಯಾಂಕ್ಸ್‌ ಹೇಳ್ಳೋಣವೆಂದು ಗೆಳೆಯನಿಗೆ ಫೋನು ಮಾಡಿದ. ಅದಕ್ಕೆ ಆತ "ಅಯ್ಯೋ ನಾನು ಯಾವ ಡಾಕ್ಟ್ರಿಗೂ ಫೋನ್‌ ಮಾಡಿಲ್ಲ. ನಾವಿರೋ ಮನೆಯಲ್ಲಿ 2 ವರ್ಷದ ಕೆಳಗೆ ಒಬ್ಬರು ಲೇಡಿ ಡಾಕ್ಟ್ರು ಸತ್ತು ಹೋಗಿದ್ದಾರೆಂದು ಕೇಳಿದ್ದೆ. ಅವರು ಮಧ್ಯರಾತ್ರಿ ಕಾರಿನಲ್ಲಿ ಸುತ್ತಾಡ್ತಾರಂತೆ' ಎಂದ. ಈತನಿಗೆ ಕಡಿಮೆಯಾಗಿದ್ದ ಜ್ವರ, ಮತ್ತೆ ಜೋರಾಯಿತು.

ವೀರೇಶ್‌ ಮಾಡ್ಲಾಕನಹಳ್ಳಿ
 

Trending videos

Back to Top