ಮಂಗಳಮುಖೀಯರಿಗೆ ಮತ ಜಾಗೃತಿ

Team Udayavani, Feb 21, 2018, 11:40 AM IST

ಮಂಡ್ಯ: ಮಂಗಳಮುಖೀಯರು ಮತಪಟ್ಟಿಗೆ ಹೆಸರು ದಾಖಲಿಸಿ ಚುನಾವಣೆಯಲ್ಲಿ ಹಕ್ಕು ಚಲಾಯಿಸುವಂತೆ ಜಾಗೃತಿ ಕಾರ್ಯಕ್ರಮ ನಡೆಯುತ್ತಿದೆ. ಮಂಡ್ಯದ ಬಾಲಭವನದಲ್ಲಿ ಜಿಲ್ಲಾ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಆಯೋಜಿಸಿದ್ದ ಇಂತಹ ಒಂದು ಕಾರ್ಯಕ್ರಮಕ್ಕೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಉಪನಿರ್ದೇಶಕ ಡಾ.ಕೆ.ದಿವಾಕರ್‌  ಚಾಲನೆ ನೀಡಿದರು.

ಸಂವಿಧಾನಾತ್ಮಕವಾಗಿ ಮತದಾನದ ಹಕ್ಕು ಎಲ್ಲರಿಗೂ ಸಮಾನವಾಗಿ ಸಿಗಬೇಕೆಂಬ ಕಾರಣಕ್ಕೆ ಎಲ್ಲರಿಗೂ ಸಮಾನ ಅವಕಾಶಗಳನ್ನು ಕಲ್ಪಿಸಲಾಗಿದೆ. ಮತದಾನ ಪ್ರಮುಖವಾದ ಹಕ್ಕಾಗಿದ್ದು, ಮಂಗಳ ಮುಖೀಯರೂ ಈ ಅವಕಾಶ ಪಡೆದು ಕೊಳ್ಳುವಂತೆ ಅವರು ಸಲಹೆ ನೀಡಿದರು. ತೃತೀಯ ಲಿಂಗಿಗಳಿಗೆ ವಾಸಸ್ಥಳ, ಆಧಾರ್‌ ಕಾರ್ಡ್‌, ಪಡಿತರ ಚೀಟಿಯಂತಹ ಸೌಲಭ್ಯ  ಇರುವುದಿಲ್ಲ.

ಅರಸು ನಿಗಮದಿಂದ ಮನೆಗಳನ್ನು ದೊರಕಿಸುವ ಪ್ರಯತ್ನ ಮಾಡಲಾಗುತ್ತಿದೆ. ಸರ್ಕಾರಿ ಸೌಲಭ್ಯ  ಇವರಿಗೂ ಸಿಗುವಂತಾಗಬೇಕು.ಆಶೋದಯ ಸಮಿತಿ, ಮಂಗಳಧಾಮ, ಅಮರ ಸಾಧಕರ ಸಂಘ ಸೇರಿದಂತೆ ವಿವಿಧ ಸಂಘಟನೆಗಳ ಮಂಗಳಮುಖೀಯರು ಕಾರ್ಯಾಗಾರದಲ್ಲಿ ಭಾಗವಹಿಸಿ ಅರ್ಜಿ ಸ್ವೀಕರಿಸಿದರು.