CONNECT WITH US  

ಜೋಡುಪಾಲ Follow up: ರಸ್ತೆ, ಹಾನಿ ಸರಿಪಡಿಸಲು ಡ್ರೋನ್‌ ಸಮೀಕ್ಷೆ

ಎರಡು ಕೇಂದ್ರಗಳ ಸಂತ್ರಸ್ತ ಕುಟುಂಬ ಸ್ಥಳಾಂತರ ಪೂರ್ಣ

ಸುಳ್ಯ: ಜೋಡುಪಾಲ ಮತ್ತು ಸುತ್ತಲಿನ ಸ್ಥಳಗಳಲ್ಲಿ ರಸ್ತೆ ಹಾಗೂ ಇತರ ಹಾನಿ ಕುರಿತಂತೆ ಡ್ರೋನ್‌ ಸಮೀಕ್ಷೆ ನಡೆಸಲಾಗುತ್ತಿದೆ. ಭಾರತೀಯ ಸೇನೆಯ ಸಲಹೆ ಮೇರೆಗೆ ಮುಂಬಯಿ ಮೂಲದ ಕಂಪೆನಿ ಡ್ರೋನ್‌ ಕೆಮರಾ ಮೂಲಕ ಸಮೀಕ್ಷೆ ನಡೆಸುತ್ತಿದ್ದು, ಅದರ ವರದಿ ಆಧಾರದಲ್ಲಿ ದುರಸ್ತಿ ನಡೆಸಲು ಜಿಲ್ಲಾಡಳಿತ ಮುಂದಾಗಿದೆ. ಎರಡು ದಿನಗಳಲ್ಲಿ ಸಮಗ್ರ ಮಾಹಿತಿ ಜಿಲ್ಲಾಡಳಿತ ಹಾಗೂ ಸೇನೆಯ ಕೈ ಸೇರಲಿದೆ. ಪ್ರವಾಹ ಪೀಡಿತ ಪ್ರದೇಶಗಳಿಗೆ ಸಂಪರ್ಕ ಸಾಧ್ಯವಿಲ್ಲದ ಕಾರಣ, 400 ಮೀ. ಎತ್ತರದಲ್ಲಿ 2 ಅತ್ಯಾಧುನಿಕ ಕೆಮರಾಗಳು ಸಮೀಕ್ಷೆ ನಡೆಸುತ್ತಿವೆ. ಸಂಪಾಜೆ-ಮಡಿಕೇರಿ ಹೆದ್ದಾರಿಯ ಸ್ಥಿತಿಗತಿ, ಜೋಡುಪಾಲದ ಹಾನಿ ಬಗ್ಗೆಯ ಚಿತ್ರಣ ದೊರೆಯಲಿದೆ.

ಸಂತ್ರಸ್ತರ ಸ್ಥಳಾಂತರ
ಅರಂತೋಡು ತೆಕ್ಕಿಲ ಸಭಾಭವನ ಮತ್ತು ಕೊಡಗು ಸಂಪಾಜೆ ಶಾಲಾ ಕಟ್ಟಡ ಪರಿಹಾರ ಕೇಂದ್ರಗಳ 32 ಕುಟುಂಬಗಳ 118 ಮಂದಿಯನ್ನು ಕೊಡಗು ಆರೋಗ್ಯ ಕೇಂದ್ರದ ಹಳೆ ಕಟ್ಟಡಕ್ಕೆ ಮಂಗಳವಾರ ಸ್ಥಳಾಂತರಿಸಲಾಗಿದೆ. ತೆಕ್ಕಿಲದ 17 ಕುಟುಂಬಗಳ ಪೈಕಿ ಕೆಲವು ಕುಟುಂಬಗಳು ಮಡಿಕೇರಿಗೆ ತೆರಳಿದರೆ, ಕೆಲವರು ಮನೆಗೆ ವಾಪಸಾಗಿದ್ದಾರೆ. 8 ಕುಟುಂಬಗಳ 31 ಮಂದಿ ಹಾಗೂ ಕೊಡಗು ಸಂಪಾಜೆ ಶಾಲೆಯ 24 ಕುಟುಂಬಗಳ 87 ಮಂದಿ ಆರೋಗ್ಯ ಕೇಂದ್ರದ ಹಳೆ ಕಟ್ಟಡದಲ್ಲಿ ವಾಸ್ತವ್ಯ ಹೂಡಿದ್ದಾರೆ. ಕಲ್ಲುಗುಂಡಿ ಕೇಂದ್ರದ ಸಂತ್ರಸ್ತರು ಅಲ್ಲೇ ಉಳಿದುಕೊಂಡಿದ್ದಾರೆ.

ಸರಕಾರದಿಂದ ದೊರೆತ ಸಾಮಗ್ರಿ ವಿತರಣೆ
ಸಂತ್ರಸ್ತ ಕೇಂದ್ರಗಳಿಗೆ ಸರಕಾರದ ವತಿಯಿಂದ ನೀಡಲಾದ ಅಕ್ಕಿ, ಇತರ ಸಾಮಗ್ರಿಗಳನ್ನು ಸಂತ್ರಸ್ತ ಪ್ರದೇಶದ ಕುಟುಂಬಗಳಿಗೆ ಕೊಡಗು ಸಂಪಾಜೆ ಗ್ರಾ.ಪಂ. ಮೂಲಕ ವಿತರಿಸಲಾಯಿತು. ಮಂಗಳವಾರ 155 ಕುಟುಂಬಗಳಿಗೆ ವಿತರಿಸಲಾಗಿದ್ದು, ಉಳಿದ ಕುಟುಂಬಗಳಿಗೆ ಬುಧವಾರ ಹಾಗೂ ಗುರುವಾರ ವಿತರಿಸಲಾಗುವುದು ಎಂದು ಪಿಡಿಒ 'ಉದಯವಾಣಿ'ಗೆ ಮಾಹಿತಿ ನೀಡಿದ್ದಾರೆ. ದಲಿತ ಕಾಲನಿ ಕುಟುಂಬಗಳಿಗೆ ಪ್ರಥಮ ಹಂತದಲ್ಲಿ ಒತ್ತು ನೀಡಿದ್ದು, ಅಕ್ಕಿ ಜತೆಗೆ ಇತರ ವಸ್ತುಗಳನ್ನು ನೀಡಲಾಗಿದೆ.

ಮಳೆ ಹೆಚ್ಚಳ
ಸುಳ್ಯ, ಸಂಪಾಜೆ, ಜೋಡುಪಾಲದಲ್ಲಿ ದಿನದ ಬಹುಪಾಲು ಮಳೆಯಾಗಿದೆ. ಸೋಮವಾರಕ್ಕೆ ಹೋಲಿಸಿದರೆ ಮಳೆಯ ಪ್ರಮಾಣ ಹೆಚ್ಚಾಗಿತ್ತು. 

ಕರಿಕೆ ಸ್ಥಳಾಂತರಕ್ಕೆ ತಯಾರಿ?
ಮಡಿಕೇರಿ ತಾಲೂಕಿನ ಕರಿಕೆಯಲ್ಲಿ ಮನೆಯೊಂದರ ಬಳಿ ಭೂಮಿಯೊಳಗೆ ನೀರು ಹರಿಯುವ ಸದ್ದು ಕೇಳಿ ಬಂದಿದ್ದು, ಅಲ್ಲಿನ ಕೆಲವು ಮನೆಗಳನ್ನು ಸ್ಥಳಾಂತರಿಸುವ ಬಗ್ಗೆ ಚಿಂತನೆ ನಡೆಸಲಾಗಿದೆ. ಈ ಕುರಿತು ಖಚಿತ ಮಾಹಿತಿ ಲಭಿಸಿಲ್ಲ.

Trending videos

Back to Top