CONNECT WITH US  

ಮಂಜುಳಾಗೆ ಹುಡುಕಾಡುತ್ತಿದೆ ಹೆತ್ತ ಕರುಳು

ಮನೆಗೆ ಬರುವೆ ಎಂದವಳಿಗೆ ರಸ್ತೆ ಅಡ್ಡಿಯಾಯಿತು

ಸುಳ್ಯ: ಅಪ್ಪ-ಅಮ್ಮನ ಒಬ್ಬಳೇ ಮಗಳಾಕೆ, ಮೂವರು ಸಹೋದರರಿಗೆ ಮುದ್ದಿನ ತಂಗಿ. ಕೂಲಿ ಕೆಲಸ ಮಾಡಿ ಮಗಳಿಗೆ ಶಿಕ್ಷಣ ನೀಡಬೇಕೆಂಬ ಹಂಬಲವಿದ್ದ ಕುಟುಂಬ. ಈಗ ಅವಳೇ ಇಲ್ಲ. 12 ದಿನಗಳಿಂದ ಜೋಡುಪಾಲದ ಬೆಟ್ಟ, ನದಿ, ರಸ್ತೆಯಿಡೀ ಆಕೆಗಾಗಿ ಹುಡುಕಾಡುತ್ತಿದ್ದಾರೆ. ಇದು ಜೋಡುಪಾಲದ ದುರಂತದಲ್ಲಿ ಕಣ್ಮರೆಯಾಗಿ ಪತ್ತೆ ಆಗದಿರುವ ಮಂಜುಳಾ ಕುಟುಂಬದ ಕಣ್ಣೀರ ಕಥೆ. ಆ.17ರಂದು ಜೋಡುಪಾಲದ ಬಸಪ್ಪ ಕುಟುಂಬದ ಮೂವರೊಂದಿಗೆ ಈಕೆ ನಾಪತ್ತೆಯಾಗಿದ್ದಳು. ಮೂವರ ಶವ ಸಿಕ್ಕಿದೆ, ಈಕೆಯ ಸುಳಿವಿಲ್ಲ. ಕುಟುಂಬದ ಸಂಕಟ ಕೊನೆ ಆಗಿಲ್ಲ.

ಬರೋಕೆ ಆಗುತ್ತಿಲ್ಲ ಅಂದಿದ್ದಳು!
ಆ.13 ಅಥವಾ 14 ಇರಬೇಕು. ಮಂಜುಳಾ ಫೋನ್‌ ಮಾಡಿದ್ದಳು. ಮಳೆಯಿಂದ ಶಾಲೆಗೆ ಮೂರು ದಿನ ರಜೆ ಎಂದಿದ್ದಳು. ಸಂಪಾಜೆ-ಮಡಿಕೇರಿ ರಸ್ತೆಯ ಕರ್ತುಜದಲ್ಲಿ ಮಣ್ಣು ಬಿದ್ದು ಬ್ಲಾಕ್‌ ಆಗಿರುವುದರಿಂದ ಬಸ್‌ ಇಲ್ಲ, ಮನೆಗೆ ಬರಲು ಆಗುತ್ತಿಲ್ಲ ಎಂದಿದ್ದಳು ಎನ್ನುತ್ತ ಬಿಕ್ಕಳಿಸಿದರು ಸೋಮಯ್ಯ.


ಒಂದು ಬಸ್‌, 4 ಕಿ.ಮೀ. ನಡಿಗೆ!

ಮಂಜುಳಾ ಪ್ರಾಥಮಿಕ ಶಿಕ್ಷಣವನ್ನು ಭಾಗಮಂಡಲ ಸಮೀಪದ ಸಣ್ಣಪುರಿಕಟ್ಟ ಗ್ರಾಮದ ಮೇಲ್ಕಟ್ಟು ಶಾಲೆಯಲ್ಲಿ ಪೂರೈಸಿದ್ದಳು. ಅಜ್ಜಿ ಮನೆಯಿಂದ ಶಾಲೆಗೆ ಹೋಗಿದ್ದಳು. 8ನೇ ತರಗತಿಗೆ ಮದೆನಾಡಿನ ಮಹೇಶ್ವರ ಪ್ರೌಢಶಾಲೆಗೆ ಸೇರಿಸಿದ್ದೆವು, ಮನೆಯಿಂದಲೇ ಹೋಗುತ್ತಿದ್ದಳು. ಬೆಟ್ಟತ್ತೂರಿನಿಂದ ಮದೆನಾಡಿನ ಶಾಲೆಗೆ 14 ಕಿ.ಮೀ. ದೂರ. ಬೆಳಗ್ಗೆ ಮತ್ತು ಸಂಜೆ ಬಸ್‌ ಇತ್ತು. ಮನೆಯಿಂದ ಬಸ್‌ ನಿಲುಗಡೆ ಸ್ಥಳಕ್ಕೆ 4 ಕಿ.ಮೀ. ನಡೆಯಬೇಕು. ಆಕೆ ಬೆಳಗ್ಗೆ 7.30ಕ್ಕೆ ಹೊರಟರೆ, ಸಂಜೆ ಮನೆ ತಲುಪುವಾಗ 6.30 ದಾಟುತ್ತಿತ್ತು. ಎಸೆಸೆಲ್ಸಿ ಆದ ಕಾರಣ ಮಾವ, ಜೋಡುಪಾಲದ ಬಸಪ್ಪ ಮನೆಯಲ್ಲಿ ಉಳಿದುಕೊಂಡು ಅಲ್ಲಿನ ಹತ್ತಿರದ ಶಾಲೆಗೆ ಹೋಗುತ್ತಿದ್ದಳು ಎಂದು ತಂದೆ ಸೋಮಯ್ಯ, ತಾಯಿ ಜಯಂತಿ ಮಗಳ ಕಷ್ಟದ ಕಥೆಯನ್ನು ನೆನೆದು ದುಃಖೀಸಿದರು.

ಅಣ್ಣನ ಜತೆಗೆ ಮನೆಗೆ 
ಅಣ್ಣ ಶರಣ್‌ ಮದೆನಾಡಿನ ಮಲೆಮಹೇಶ್ವರ ಕಾಲೇಜಿನ ದ್ವಿತೀಯ ಪಿಯು ವಿದ್ಯಾರ್ಥಿ. ರಜಾ ದಿನ ಮಂಜುಳಾ ಅವನ ಜತೆಗೆ ಮನೆಗೆ ಬರುತ್ತಿದ್ದಳು. ಶನಿವಾರ ಬಂದು ರವಿವಾರ ಮರಳುತ್ತಿದ್ದಳು. ದುರಂತ ನಡೆದ ಹಿಂದಿನ ಶನಿವಾರ ಮನೆಗೆ ಬಂದಿದ್ದಳು ಅನ್ನುತ್ತಾರೆ ಸಹೋದರ ರೋಶನ್‌ ಕೆ.ಎಸ್‌.

ಬಡ ಕುಟುಂಬ
ಜೋಡುಪಾಲದಿಂದ 18 ಕಿ.ಮೀ. ದೂರವಿರುವ ಮದೆನಾಡು ಗ್ರಾ.ಪಂ. ವ್ಯಾಪ್ತಿಯ ಬೆಟ್ಟತ್ತೂರು ಬಾಳೆಕಂಡಿಯಿಂದ ಕಾಂಕ್ರೀಟ್‌ ರಸ್ತೆ ಕೆಳಭಾಗದಲ್ಲಿ ಸೋಮಯ್ಯ ಅವರ ಮನೆ. ಅರಣ್ಯ ಹಕ್ಕು ಕಾಯ್ದೆ ಅಡಿ ಸಿಕ್ಕ ಒಂದಷ್ಟು ಭೂಮಿ ಇದೆ. ಸೋಮಯ್ಯ ಮತ್ತು ಜಯಂತಿ ಕೆ.ಎಸ್‌. ಕೂಲಿ ಕಾರ್ಮಿಕರು. ನಾಲ್ವರು ಮಕ್ಕಳು - ರೋಶನ್‌, ದರ್ಶನ್‌, ಶರಣ್‌, ಕೊನೆಯಾಕೆ ಮಂಜುಳಾ. ರೋಶನ್‌ ಬೆಂಗಳೂರಿನಲ್ಲಿ ಉದ್ಯೋಗ ಹುಡುಕಿ ಎರಡು ತಿಂಗಳು ಆಗಿದೆಯಷ್ಟೆ. ದರ್ಶನ್‌ ಮನೆಯಲ್ಲಿದ್ದಾನೆ. ಶರಣ್‌ ಕಾಲೇಜು ವಿದ್ಯಾರ್ಥಿ.

ಗುಡ್ಡ ದಾಟಿ ಹುಡುಕಾಟ
18 ಕಿ.ಮೀ. ದೂರದ ಬೆಟ್ಟತ್ತೂರಿನಿಂದ ಸೋಮಯ್ಯ ಅವರ ಮನೆಮಂದಿ, ಕುಟುಂಬಸ್ಥರು ಜೋಡುಪಾಲಕ್ಕೆ ಬಂದು ಮಂಜುಳಾಗಾಗಿ ಹುಡುಕಾಡುತ್ತಿದ್ದಾರೆ. ರಸ್ತೆ ಪ್ರವಾಹಕ್ಕೆ ಆಹುತಿ ಆಗಿದ್ದು, ಇವರೆಲ್ಲ ಗುಡ್ಡ ಸುತ್ತಿ ನಡೆದೇ ಜೋಡುಪಾಲಕ್ಕೆ ಬಂದಿದ್ದಾರೆ. ಅಧಿಕಾರಿಗಳು ಸ್ಥಳದಲ್ಲಿ ಸಿಕ್ಕಿ ವಿಚಾರಿಸಿದ್ದು ಉಂಟು, ಮನೆಗೆ ಇನ್ನೂ ಬಂದಿಲ್ಲ.

Trending videos

Back to Top