CONNECT WITH US  

ಕಣ್‌ ತೆರೆದು ನೋಡಿ!

ಈ ಏಡಿಗೆ ಮೈಯೆಲ್ಲಾ ಕಣ್ಣು!: ಕೆಲವರಿಗೆ ಮೈಯೆಲ್ಲಾ ಕಣ್ಣು ಎಂದು ಹೇಳುವುದನ್ನು ನೀವು ಕೇಳಿರಬಹುದು. ಸುತ್ತಮುತ್ತ ಏನು ನಡೆದರೂ ಅವರಿಗೆ ತಿಳಿದುಹೋಗುತ್ತದೆ. ಈ ಕಾರಣಕ್ಕೆ ಅಂಥ ಸೂಕ್ಷ್ಮ, ಚಾಣಾಕ್ಷ ವ್ಯಕ್ತಿಗಳನ್ನು ಮೈಯೆಲ್ಲಾ ಕಣ್ಣಾಗಿರುವ ವ್ಯಕ್ತಿ ಎಂದು ಹೇಳುವುದು. ಅದರರ್ಥ ನಿಜಕ್ಕೂ ಅವರಿಗೆ ಮೈಯೆಲ್ಲಾ ಕಣ್ಣುಗಳಿವೆ ಎಂದರ್ಥ ಖಂಡಿತಾ ಅಲ್ಲ. ಮನುಷ್ಯರಿಗೆ ಸೃಷ್ಟಿ ದಯಪಾಲಿಸಿರುವುದು ಎರಡೇ ಕಣ್ಣುಗಳು.

ಹೀಗಾಗಿ "ಮೈಯೆಲ್ಲಾ ಕಣ್ಣು' ಎಂಬ ನಾಣ್ಣುಡಿ ನಮಗೆ ಚೆನ್ನಾಗಿ ಹೊಂದಿಕೆಯಾಗುವುದಿಲ್ಲ. ಹೊಂದಿಕೆಯಾಗುವ ಜೀವಿ ಇಲ್ಲಿದೆ ನೋಡಿ. ಅದರ ಹೆಸರು ಹಾರ್ಸ್‌ ಶೂ ಏಡಿ. ಕುದುರೆಯ ಗೊರಸಿನ ಆಕೃತಿಯನ್ನು ಹೋಲುವುದರಿಂದ ಇವುಗಳಿಗೆ ಹಾರ್ಸ್‌ ಶೂ ಏಡಿ ಎಂಬ ಹೆಸರು ಬಂದಿದೆ. ಇವುಗಳ ವೈಶಿಷ್ಟವೆಂದರೆ ಇವುಗಳಿಗೆ ನಿಜಕ್ಕೂ ಮೈಯೆಲ್ಲಾ ಕಣ್ಣುಗಳಿವೆ. ಸುಮಾರು 10 ಕಣ್ಣುಗಳನ್ನು ಇವು ಹೊಂದಿರುತ್ತವೆ. 

ಸೌಂದರ್ಯವನ್ನು ವಿವರಿಸುವಾಗ ನೋಡಲು ಎರಡು ಕಣ್ಣುಗಳೂ ಸಾಲುವುದಿಲ್ಲ ಎನ್ನುತ್ತೇವಲ್ಲ, ಆ ಲೆಕ್ಕದಲ್ಲಿ ಹಾರ್ಸ್‌ ಶೂ ಏಡಿಗಳಿಗೆ ಆ ತಾಪತ್ರಯವೇ ಇಲ್ಲ. ಏಕೆಂದರೆ ಅವುಗಳ ಬಳಿ ನೋಡಲು ಬರೀ ಎರಡಲ್ಲ, ಹತ್ತು ಕಣ್ಣುಗಳಿವೆ! ಚಿಪ್ಪಿನಂಥ ಅದರ ದೇಹದಲ್ಲಿ ಒಂದು ಪುಟ್ಟ ಬಾಲದ ರಚನೆಯೂ ಇದೆ.

ಗಣಿತ ಶಿಕ್ಷಕರಿಂದ ಹೊಗಳಿಸಿಕೊಳ್ಳುವ ಪ್ರಾಣಿ ಯಾವುದು?: ಕಾಡಿನಲ್ಲೊಂದು ಶಾಲೆ ಇದ್ದಿದ್ದರೆ, ಕಾಡು ಪ್ರಾಣಿಗಳೆಲ್ಲವೂ ತಪ್ಪದೇ ಶಾಲೆಗೆ ಹೋಗುವಂತಿದ್ದರೆ ಚೆನ್ನಾಗಿತ್ತು ಅಂತ ಎಷ್ಟೋ ಸಲ ಅನ್ನಿಸಿರಬಹುದು. ಕಾಟೂìನ್‌ ನೆಟ್‌ವರ್ಕ್‌ನಲ್ಲಿ ತೋರಿಸುವ ಕಾಟೂìನುಗಳಲ್ಲಿ ಮಾತ್ರವೇ ಅದು ನಡೆಯುವುದು ಎಂದಿರಾ. ಅದೂ ನಿಜವೇ. ಕಾಟೂìನು ಸರಣಿಗಳನ್ನು ನೋಡಿ ಅಂಥದ್ದೊಂದು ಆಲೋಚನೆ ಬಂದಿದ್ದರಲ್ಲಿ ಆಶ್ಚರ್ಯವಿಲ್ಲ.

ಈಗ ಒಂದು ಕ್ಷಣ ಅದು ನಿಜವೇ ಅಂತ ಅಂದುಕೊಳ್ಳೋಣ. ನಾವು ನೀವು ತರಗತಿಯಲ್ಲಿ ಕಲಿತ ವಿಷಯಗಳನ್ನೇ ಅವುಗಳೂ ಕಲಿಯುತ್ತಿವೆ ಅಂತಿಟ್ಟುಕೊಳ್ಳೋಣ. ಈ ಸಂದರ್ಭದಲ್ಲಿ "ಜಾಣ ಮರಿ' ಎಂದು ಗಣಿತ ಶಿಕ್ಷಕರಿಂದ ಹೊಗಳಿಕೆ ಬರುತ್ತದೆ. ಕಬ್ಬಿಣದ ಕಡಲೆ ಎಂದೇ ನಾವು ಪರಿಗಣಿಸುವ ಗಣಿತದಲ್ಲಿ ರ್‍ಯಾಂಕ್‌ ಪಡೆಯುವ ಸಾಮರ್ಥ್ಯ ಇರೋದು ಎರಡು ಜೀವಿಗಳಿಗೆ. ಒಂದು ನಮ್ಮದೇ ವಂಶಜ ವಾನರ, ಇನ್ನೊಂದು ಪಾರಿವಾಳ.

ಇವೆರಡೂ ಪ್ರಾಣಿಗಳಿಗೆ ಸರಳ ಗಣಿತ ಗೊತ್ತಿರುತ್ತದಂತೆ. ಸರಳ ಗಣಿತ ಎಂದರೆ ಕೂಡುವುದು, ಕಳೆಯುವುದು. "ಅಯ್ಯೋ ಅಷ್ಟೇನಾ?' ಎಂದು ಮಾತ್ರ ತಿಳಿಯಬೇಡಿ. ಪ್ರಾಣಿಗಳ ಮಟ್ಟಿಗೆ ಅದು ದೊಡ್ಡ ಸಾಧನೆ ಎಂಬುದನ್ನು ಮರೆಯಬಾರದು. ಅದೂ ಅಲ್ಲದೆ ಕೂಡುವುದು, ಕಳೆಯುವುದಕ್ಕಿಂತ ಹೆಚ್ಚಿಗೆ ಕಲಿತು ಅವೇನು ಕಚೇರಿಗೆ ತೆರಳಬೇಕಿಲ್ಲವಲ್ಲ! ಪಾರಿವಾಳ, ಅನಾದಿ ಕಾಲದಿಂದಲೂ ಮನುಷ್ಯನ ಸಾಂಗತ್ಯದಲ್ಲಸೇ ಬೆಳೆದುಬಂದಿರುವ ಜೀವಿ.

ಹೀಗಾಗಿ ಇದು ಸಾಧ್ಯವಾಗಿರಬಹುದು ಎಬುದು ಹಲವರ ಅನಿಸಿಕೆ. ರಾಜರ ಕಾಲದಲ್ಲಿ ಪಾರಿವಾಳಗಳನ್ನು ಸಂದೇಶ ಕಳಿಸಲು ಬಳಸುತ್ತಿದ್ದುದನ್ನು ನೀವು ಓದಿ ತಿಳಿದಿರಬಹುದು. ಓಲೆಯನ್ನು ಸರಿಯಾದ ಸ್ಥಳಕ್ಕೆ ತಲುಪಿಸುವ ಜಾಣ್ಮೆಯನ್ನು ಹೊಂದಿರುವ ಪಾರಿವಾಳ, ಗಣಿತ ವಿಷಯದಲ್ಲಿ ಇತರೆ ಪ್ರಾಣಿಗಳಿಗಿಂತ ಮುಂದಿದೆ ಎಂಬುದರಲ್ಲಿಯೂ ಅಚ್ಚರಿಯಿಲ್ಲ. ಬುದ್ಧಿಮತ್ತೆಯಲ್ಲಿ ವಾನರನಿಗೆ ಪೈಪೋಟಿ ಕೊಡಬಲ್ಲುದು ಪಾರಿವಾಳ.

* ಹರ್ಷ

Trending videos

Back to Top