CONNECT WITH US  

ಉತ್ತಮ ಜೀವನಶೈಲಿ, ಆಹಾರ ಕ್ರಮದಿಂದ ಆರೋಗ್ಯ ರಕ್ಷಣೆ

ಇಂದು ಆರೋಗ್ಯ ಸೇವಾ ಕ್ಷೇತ್ರದಲ್ಲಿ ಹಲವು ಬದಲಾವಣೆಗಳು ಕಂಡರೂ ಮನುಷ್ಯರ ಆರೋಗ್ಯ ಮಾತ್ರ ದಿನದಿಂದ ದಿನಕ್ಕೆ ಹದಗೆಡುತ್ತಲೇ ಹೋಗುತ್ತಿದೆ. ಹೊಸ ಹೊಸ ಕಾಯಿಲೆಗಳು ಹುಟ್ಟಿಕೊಳ್ಳುವುದರೊಂದಿಗೆ ಜೀವ ಹಿಂಡುವ ಕಾಯಿಲೆಗಳು ಅತಿಯಾಗುತ್ತಿವೆ. ಇವುಗಳಿಂದ ದೂರವಿರಲು ಆರೋಗ್ಯಕರ ಜೀವನಶೈಲಿ ಅಳವಡಿಸಿಕೊಳ್ಳುವುದೊಂದೇ ದಾರಿ ಎನ್ನಬಹುದು.

'ಆರೋಗ್ಯ ಮತ್ತು ಯುವ ಸಮೂಹ'
ಉತ್ತಮ ಆರೋಗ್ಯ ಪ್ರತಿಯೊಬ್ಬರಿಗೂ ಅಗತ್ಯ. ಆದರೆ ಅದನ್ನು ಕಾಪಾಡಿಕೊಳ್ಳುವ ಜವಾಬ್ದಾರಿಯೂ ಅವರದ್ದೇ. ಆರೋಗ್ಯ ಕಾಪಾಡುವುದೆಂದರೆ ಕೇವಲ ದೇಹಕ್ಕಂಟಿದ ರೋಗ ಶಮನವಷ್ಟೇ ಎಂದರ್ಥವಲ್ಲ. ಶಾರೀರಿಕ ಆರೋಗ್ಯ ಕಾಪಾಡಿಕೊಳ್ಳುವುದರೊಂದಿಗೆ ಆರೋಗ್ಯವಂತ ಸಮಾಜ ನಿರ್ಮಾಣ ಮಾಡುವ ಗುರುತರ ಹೊಣೆಗಾರಿಕೆ ನಮ್ಮ ಮೇಲಿದೆ. 'ಆರೋಗ್ಯ ಮತ್ತು ಯುವ ಸಮೂಹ' ನಮ್ಮ ಥೀಂ.

ಆಧುನಿಕತೆ, ಜೀವನಶೈಲಿ, ಪಾಶ್ಚಾತ್ಯ ಸಂಸ್ಕೃತಿಗೆ ಮಾರು ಹೋಗಿರುವುದರ ಪರಿಣಾಮ ಆರೋಗ್ಯ ಕೆಡುವುದರೊಂದಿಗೆ ಸಾಮಾಜಿಕ ಸ್ವಾಸ್ಥ್ಯವೂ ಹದಗೆಡುತ್ತಿರುವುದು ಕಳವಳಕಾರಿ.

ವಿಶ್ವ ಆರೋಗ್ಯ ದಿನ ಯಾಕಾಗಿ?
ಆರೋಗ್ಯದ ಬಗ್ಗೆ ಜಾಗೃತಿ ದಿನವಾಗಿ 'ವಿಶ್ವ ಆರೋಗ್ಯ ದಿನ'ವನ್ನು ಆಚರಿಸಲಾಗುತ್ತಿದೆ. ವಿಶ್ವಸಂಸ್ಥೆಯ ಅಂಗ ಸಂಸ್ಥೆ ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್‌ಒ) ಈ ಜಾಗೃತಿ ದಿನವನ್ನು ಎ.7ರಂದು ಆಚರಿಸಲು ಶುರು ಮಾಡಿತು. ಇದೀಗ ವಿಶ್ವಾದ್ಯಂತ ಈ ದಿನವನ್ನು ಆಚರಿಸಲಾಗುತ್ತಿದೆ.

ಎ. 7ರಂದೇ ಏಕೆ?
1945ರಲ್ಲಿ ವಿಶ್ವಸಂಸ್ಥೆಯ ಸಭೆ ನಡೆದಿದ್ದು, ಈ ವೇಳೆ ವಿಶ್ವ ಆರೋಗ್ಯ ಕುರಿತ ಸಮಿತಿಯೊಂದನ್ನು ಸ್ಥಾಪಿಸುವ ಬಗ್ಗೆ ಚರ್ಚಿಸಲಾಯಿತು. ಇದು ಬಳಿಕ ವಿಶ್ವ ಆರೋಗ್ಯ ಸಂಸ್ಥೆ ಹುಟ್ಟಿಗೆ ಕಾರಣವೂ ಆಯಿತು. ಅದರಂತೆ, 1948 ಎ.7ರಂದು ಜಾಗತಿಕ ಆರೋಗ್ಯ ಸಮ್ಮೇಳನ ಮತ್ತು ಸಂಸ್ಥೆಯ ಸ್ಥಾಪನೆ ನಡೆದಿತ್ತು. ಅಂದು ಕೈಗೊಂಡ ನಿರ್ಣಯದಂತೆ ಪ್ರತಿ ವರ್ಷ ಎ.7ರಂದು ಆರೋಗ್ಯ ಜಾಗೃತಿ ದಿನವನ್ನು ಹಮ್ಮಿಕೊಳ್ಳಲು ನಿರ್ಧರಿಸಲಾಗಿದ್ದು, 1950ರಿಂದ ಅಧಿಕೃತವಾಗಿ ಜಾರಿಗೆ ಬಂತು. ಈ ವರ್ಷ 68ನೇ ಜಾಗೃತಿ ದಿನ ಹಮ್ಮಿಕೊಳ್ಳಲಾಗುತ್ತಿದೆ. 

ಸಾರ್ವತ್ರಿಕ ಆರೋಗ್ಯ ರಕ್ಷಣೆಯ ಅಗತ್ಯ 
.ಇಂದು ಪ್ರಪಂಚದಲ್ಲಿ ಅರ್ಧದಷ್ಟು ಮಂದಿಗೆ ಅಗತ್ಯ ಆರೋಗ್ಯ ಸೇವೆಗಳನ್ನು ಪಡೆಯಲು ಸಾಧ್ಯವಾಗುತ್ತಿಲ್ಲ.

.ವಿಶ್ವದಲ್ಲಿ ಇಂದು ಸುಮಾರು 10 ಕೋಟಿಯಷ್ಟು ಮಂದಿ ಕಡುಬಡತನದಲ್ಲಿ ಜೀವಿಸುತ್ತಿದ್ದು, ಅವರ ದಿನದ ಆದಾಯ 110 ರೂ. ಗಳಿಗೂ ಕಡಿಮೆ ಇದೆ. ಇದರಿಂದಾಗಿ ಅವರಿಗೆ ಆರೋಗ್ಯ ಸೇವೆಗಳನ್ನು ಪಡೆಯಲು ಸಾಧ್ಯವಾಗುತ್ತಿಲ್ಲ.

.ವಿಶ್ವದಲ್ಲಿ ಶೇ.12ರಷ್ಟು ಮಂದಿ ತಮ್ಮ ಆದಾಯದ ಬಹುತೇಕ ಭಾಗವನ್ನು ಕುಟುಂಬದವರ ವೈದ್ಯಕೀಯ ಖರ್ಚುವೆಚ್ಚಕ್ಕಾಗಿಯೇ ವಿನಿಯೋಗಿಸುತ್ತಿದ್ದಾರೆ. ಇದರಿಂದಾಗಿ ಆಪತ್ಕಾಲದಲ್ಲಿ ಅವರಿಗೆ ಹೆಚ್ಚಿನ ವೈದ್ಯಕೀಯ ವೆಚ್ಚ ಸಾಧ್ಯವಾಗುತ್ತಿಲ್ಲ.

 .ಆಪತ್ಕಾಲದಲ್ಲಿ ಹೆಚ್ಚಿನ ವೈದ್ಯಕೀಯ ವೆಚ್ಚ ಮಾಡಲಾಗದ ಸಮಸ್ಯೆ ಎಲ್ಲೆಡೆ ಇದೆ. ಆದರೆ ಮುಂದುವರಿದ ದೇಶಗಳಲ್ಲಿ ವಿಶೇಷವಾಗಿ ಯುರೋಪ್‌, ಲ್ಯಾಟಿನ್‌ ಅಮೆರಿಕಾ, ಏಷ್ಯಾದ ಕೆಲ ಭಾಗಗಳಲ್ಲಿ ಹೆಚ್ಚಿನ ವೈದ್ಯಕೀಯ ಸೌಲಭ್ಯಗಳ ಲಭ್ಯತೆ ಇದ್ದು, ಅಲ್ಲಿನ ಮಂದಿ ಶೇ. 10ರಷ್ಟು ತಮ್ಮ ಆದಾಯದ ಭಾಗವನ್ನು ಖರ್ಚು ಮಾಡದೇ, ಉತ್ತಮ ಆರೋಗ್ಯ ಸೇವೆಯನ್ನು ಪಡೆಯುತ್ತಿದ್ದಾರೆ.

Trending videos

Back to Top