ರಾಜೇಶ್‌, ಅಶ್ವಿ‌ನ್‌ ಸನಿಲ್‌ ಅವರಿಗೆ ಸಮ್ಮಾನ

Team Udayavani, Sep 20, 2018, 12:03 PM IST

ಮಹಾನಗರ: ದಕ್ಷಿಣ ಕೊರಿಯಾದ ಚಿಂಗ್‌ಜುನಲ್ಲಿ ಸೆ. 9ರಿಂದ 17ರ ವರೆಗೆ ನಡೆದ ಅಂತಾರಾಷ್ಟ್ರೀಯ ಅಗ್ನಿಶಾಮಕ ಕ್ರೀಡಾಕೂಟದಲ್ಲಿ ಪದಕ ಜಯಿಸಿದ ಕರ್ನಾಟಕ ಅಗ್ನಿಶಾಮಕ ಮತ್ತು ತುರ್ತು ಸೇವಾ ಇಲಾಖೆಯ ಸಿಬಂದಿ ರಾಜೇಶ್‌ ಕೆ. ಮಡಿವಾಳ ಹಾಗೂ ಅಶ್ವಿ‌ನ್‌ ಸನಿಲ್‌ ಅವರನ್ನು ಮಂಗಳೂರಿನ ಪಾಂಡೇಶ್ವರದಲ್ಲಿ ಅಗ್ನಿಶಾಮಕ ಠಾಣೆಯಲ್ಲಿ ಬುಧವಾರ ಸಮ್ಮಾನಿಸಲಾಯಿತು.

ಕರ್ನಾಟಕ ಅಗ್ನಿಶಾಮಕ ಮತ್ತು ತುರ್ತು ಸೇವಾ ಇಲಾಖೆಯ ನಿರ್ದೇಶಕ ಎಚ್‌.ಎಸ್‌. ವರದರಾಜನ್‌ ಅಧ್ಯಕ್ಷತೆ ವಹಿಸಿ ಸಮ್ಮಾನ ನೆರವೇರಿಸಿದರು. ಕ್ರೀಡಾಕೂಟದಲ್ಲಿ ದೇಶಕ್ಕೆ 15 ಪದಕ ಲಭ್ಯವಾಗಿದ್ದು, ಅದರಲ್ಲಿ ಮೂರು ಪದಕಗಳನ್ನು ಕರ್ನಾಟಕ ಪಡೆದುಕೊಂಡಿದೆ. ಆ ಮೂರೂ ಪದಕಗಳು ಮಂಗಳೂರಿನ ಸಿಬಂದಿ ಪಡೆದಿರುವುದು ಹೆಮ್ಮೆಯ ವಿಚಾರ ಎಂದರು.

ನಾಗಪುರದಲ್ಲಿ ಇತ್ತೀಚೆಗೆ ನಡೆದ ರಾಷ್ಟ್ರ ಮಟ್ಟದ ಕ್ರೀಡಾಕೂಟದಲ್ಲಿ ರಾಜೇಶ್‌ ಹಾಗೂ ಅಶ್ವಿ‌ನ್‌ ಸನಿಲ್‌ ಅವರು ಪದಕ ಜಯಿಸಿ ಅಂತಾರಾಷ್ಟ್ರೀಯ ಮಟ್ಟಕ್ಕೆ ಅರ್ಹತೆ ಪಡೆದ ಬಳಿಕವಷ್ಟೆ ಅವರನ್ನು ಸ್ಪರ್ಧೆಗೆ ಕಳುಹಿಸಲು ತೀರ್ಮಾನಿಸಿ ತಯಾರಿ ನಡೆಸಲಾಯಿತು. ಈವರೆಗೆ ಅಂತಾರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಭಾಗವಹಿಸುವ ಅವಕಾಶ ಕರ್ನಾಟಕ ಅಗ್ನಿಶಾಮಕ ಇಲಾಖೆ ಸಿಬಂದಿಗೆ ದೊರಕಿರಲಿಲ್ಲ. ಈ ಬಾರಿಯ ಯಶಸ್ಸು ಮುಂದೆ ಇನ್ನಷ್ಟು ಕ್ರೀಡಾ ಪ್ರತಿಭೆಗಳನ್ನು ಕ್ರೀಡಾಕೂಟಕ್ಕೆ ಕಳುಹಿಸಲು ಹಾಗೂ ಪದಕಗಳನ್ನು ಜಯಿಸಲು ಪ್ರೇರಣೆ ನೀಡಿದೆ ಎಂದರು.

ಅಂತಾರಾಷ್ಟ್ರೀಯ ಅಗ್ನಿಶಾಮಕ 13ನೇ ಕ್ರೀಡಾಕೂಟದಲ್ಲಿ ಅಶ್ವಿ‌ನ್‌ ಸನಿಲ್‌ ಅವರು 100 ಮೀಟರ್‌ ಓಟದಲ್ಲಿ 4ನೇ ಸ್ಥಾನ ಹಾಗೂ ರಿಲೇಯಲ್ಲಿ ಕಂಚಿನ ಪದಕ ಪಡೆದಿದ್ದಾರೆ. ರಾಜೇಶ್‌ ಕೆ. ಮಡಿವಾಳ ಅವರು ಬೆಂಚ್‌ಪ್ರಸ್‌ನ 135 ಕೆಜಿ ವಿಭಾಗದಲ್ಲಿ ಹಾಗೂ ಪವರ್‌ ಲಿಫ್ಟಿಂಗ್ ನ 435 ಕೆಜಿ ವಿಭಾಗದಲ್ಲಿ ಕಂಚಿನ ಪದಕ ಪಡೆದಿದ್ದಾರೆ.

ಸಮ್ಮಾನ ಸ್ವೀಕರಿಸಿ ಮಾತನಾಡಿದ ಅಶ್ವಿ‌ನ್‌ ಸನಿಲ್‌ ಅವರು, ಪದಕ ಜಯಿಸಿ ಬಂದ ತಮಗೆ ಇಲಾಖೆಯ ವತಿಯಿಂದ ನೀಡಿದ ಪ್ರೋತ್ಸಾಹದಿಂದ ಇನ್ನೂ ಹೆಚ್ಚಿನ ಸಾಧನೆಗೆ ಹುಮ್ಮಸ್ಸು ನೀಡಿದೆ ಎಂದರು. ಪ್ರಾದೇಶಿಕ ಅಗ್ನಿಶಾಮಕ ಅಧಿಕಾರಿ ತಿಪ್ಪೇಸ್ವಾಮಿ ಸ್ವಾಗತಿಸಿದರು. ಉಡುಪಿಯ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ವಸಂತ ಕುಮಾರ್‌ ವಂದಿಸಿದರು.