ಲೇಡಿಗೋಶನ್‌ ಆಸ್ಪತ್ರೆಗೆ 5.7 ಕೋಟಿ ರೂ. ಮಂಜೂರು

Team Udayavani, Dec 6, 2018, 10:56 AM IST

ಮಂಗಳೂರು: ವರ್ಷಕ್ಕೆ ಸುಮಾರು ಆರು ಸಾವಿರ ಶಿಶುಗಳು ಜನಿಸುವ ನಗರದ ಸರಕಾರಿ ಲೇಡಿ ಗೋಶನ್‌ ಆಸ್ಪತ್ರೆಗೆ ಮೂಲಸೌಲಭ್ಯ ಒದಗಿಸಿ ಎಂದು ವೈದ್ಯರೊಬ್ಬರು ಮಾಡಿದ ಮನವಿಗೆ ಸ್ಪಂದಿಸಿದ ಜನಪ್ರತಿ ನಿಧಿಗಳು ಹೆಚ್ಚುವರಿ ಆರ್ಥಿಕ ಸಹಾಯ ಕೊಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಯಂತ್ರಗಳು, ಪೀಠೊಪಕರಣ ಖರೀದಿಗೆ ಎಂಆರ್‌ಪಿಎಲ್‌-ಒಎನ್‌ಜಿಸಿ ಕಂಪೆನಿ ಯಿಂದ 5.7 ಕೋಟಿ ರೂ. ಹೆಚ್ಚುವರಿ ಹಣ ಮಂಜೂರಾಗಿದೆ.

ಆಸ್ಪತ್ರೆಯ ಎನ್‌ಐಸಿಯು ವಿಭಾಗದಲ್ಲಿ ಯಂತ್ರೋಪಕರಣಗಳ ಕೊರತೆಯಿಂದಾಗಿ ಉತ್ತಮ ಸೇವೆ ನೀಡಲು ಸಾಧ್ಯವಾಗುತ್ತಿಲ್ಲ. ವರ್ಷಕ್ಕೆ ಕನಿಷ್ಠ ಆರು ಸಾವಿರ ಶಿಶುಗಳು ಈ ಆಸ್ಪತ್ರೆಯಲ್ಲಿ ಜನ್ಮ ಪಡೆಯುತ್ತಿದ್ದು, ಶೀಘ್ರ ಆಸ್ಪತ್ರೆಗೆ ಮೂಲ ಸೌಕರ್ಯಗಳನ್ನು ಒದಗಿಸಿಕೊಡುವ ನಿಟ್ಟಿನಲ್ಲಿ ಕಾರ್ಯಯೋಜಿಸಬೇಕು ಎಂದು ವೈದ್ಯರಾದ ಡಾ| ಕಿರಣ್‌ ಬಾಳಿಗಾ ಅವರು ಶಾಸಕ ಡಿ. ವೇದವ್ಯಾಸ ಕಾಮತ್‌ ಅವರಿಗೆ ಕೆಲವು ದಿನಗಳ ಹಿಂದೆ ವಾಟ್ಸ್‌ ಆಪ್‌ ಸಂದೇಶ ರವಾನಿಸಿದ್ದರು. ಈ ಬಗ್ಗೆ ಖುದ್ದು ಮಾತನಾಡಿ, ಸಮಸ್ಯೆಗಳನ್ನು ವಿವರಿಸುವಂತೆ ಶಾಸಕರು ಮರು ಸಂದೇಶ ಕಳುಹಿಸಿದ್ದರು. ಬಳಿಕ ಡಾ| ಕಿರಣ್‌ ಬಾಳಿಗಾ ಅವರು ಶಾಸಕರನ್ನು ಸಂಪರ್ಕಿಸಿ ತಿಳಿಸಿದ್ದರು. ತತ್‌ಕ್ಷಣವೇ ಸ್ಪಂದಿಸಿದ ಶಾಸಕರು ಹಾಗೂ ಸಂಸದರು, ಎಂಆರ್‌ಪಿಎಲ್‌-ಒಎನ್‌ಜಿಸಿ ಕಂಪೆನಿಗೆ ಲಿಖೀತವಾಗಿ ಮನವಿ ಮಾಡಿ ಆಸ್ಪತ್ರೆಗೆ ಹೆಚ್ಚುವರಿ ಆರ್ಥಿಕ ಸಹಾಯ ಮಂಜೂರು ಮಾಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಎಂಆರ್‌ಪಿಎಲ್‌- ಒನ್‌ಜಿಸಿ ಕಂಪೆನಿಯು ಲೇಡಿಗೋಶನ್‌ ಆಸ್ಪತ್ರೆಯ ಹೊಸ ಕಟ್ಟಡಕ್ಕೆ ತನ್ನ ಸಿಆರ್‌ಎಸ್‌ ನಿಧಿಯಡಿ ಹಣ ನೀಡಿತ್ತು. ಆದರೆ ಅಲ್ಲಿ ಮೂಲ ಅಗತ್ಯಗಳಾದ ಯಂತ್ರೋಪಕರಣಗಳು ಮತ್ತು ಪೀಠೊಪಕರಣಗಳ ಖರೀದಿಗೆ ಆರ್ಥಿಕ ಸಂಪನ್ಮೂಲದ ಆವಶ್ಯಕತೆ ಇತ್ತು. ಅದರಿಂದ ವೈದ್ಯಾಧಿಕಾರಿಗಳು ಮತ್ತು ಜನಸಾಮಾನ್ಯರು ತೊಂದರೆ ಅನುಭವಿಸುತ್ತಿದ್ದರು.