ಖಿನ್ನತೆಗೆ ದೇಶದಲ್ಲಿ 5 ಕೋಟಿ ಬಲಿ

Team Udayavani, Feb 27, 2017, 10:06 AM IST

ನವದೆಹಲಿ: ಬೆಚ್ಚಿಬೀಳುವ ಸುದ್ದಿ ಇದು. ವಿಶ್ವದಲ್ಲಿ ಬರೋಬ್ಬರಿ 322 ಮಿಲಿಯನ್‌, ಅಂದರೆ 32.30 ಕೋಟಿ ಮಂದಿ ಖಿನ್ನತೆ­ಯಿಂದ ಬಳಲುತ್ತಲೇ ಜೀವನ ಸಾಗಿಸುತ್ತಿ­ದ್ದಾರೆ. 

ಈ ಪೈಕಿ ಅರ್ಧದಷ್ಟು ಮಂದಿ ಆಗ್ನೇಯ ಏಷ್ಯಾ ವಲಯ ಹಾಗೂ ಪಶ್ಚಿಮ ಪೆಸಿಫಿಕ್‌ ವಲಯದವರಾಗಿದ್ದು, ಇದರಲ್ಲಿ ಭಾರತ ಮತ್ತು ಚೀನಾದ ಪಾಲು ಹೆಚ್ಚು ಎಂದು ವಿಶ್ವ ಆರೋಗ್ಯ ಸಂಸ್ಥೆ ನಡೆಸಿರುವ ಖನ್ನತೆ ಮತ್ತು ಇತರೆ ಸಾಮಾನ್ಯ ಮಾನಸಿಕ ಅಸ್ವಸ್ಥತೆ-ಜಾಗತಿಕ ಆರೋಗ್ಯ ಗಣತಿಯಲ್ಲಿ ಬಹಿರಂಗಗೊಂಡಿದೆ.

ವಿಶ್ವ ಆರೋಗ್ಯ ಸಂಸ್ಥೆ ಬಿಡುಗಡೆ ಮಾಡಿ­ರುವ ಅಂಕಿ ಅಂಶಗಳ ಪ್ರಕಾರ, 2015ರಲ್ಲಿ ಭಾರತದಲ್ಲಿ 5,66,75,969 ಮಂದಿ ಖಿನ್ನತೆ­ಯಿಂದ ಬಳಲಿರುವುದು ಕಂಡುಬಂದಿದೆ. ಹಾಗೇ ಆತಂಕಕಾರಿ ಕಾಯಿಲೆಗೆ ತುತ್ತಾಗಿ ಜೀವನ ಸಾಗಿಸುತ್ತಿರುವವರು 3,84,25,093 ಜನ ಎಂದಿದೆ. ಇವೆಲ್ಲದರ ಜತೆಗೆ ಈ ಕಾರಣಗಳಿಂದ ಆತ್ಮಹತ್ಯೆ ಮಾಡಿಕೊಂಡಿರುವವರ ಅಂಕಿ ಅಂಶಗಳಲ್ಲಿಯೂ ಭಾರತ ಅಗ್ರ ಪಂಕ್ತಿಯಲ್ಲಿದೆ. 2015ರಲ್ಲಿ ಬರೋಬ್ಬರಿ 7,88,000 ಜನರು ಆತ್ಮಹತ್ಯೆ ಮಾಡಿಕೊಂಡಿ­ದ್ದಾರೆ. ವಿಶ್ವ ಮಟ್ಟದಲ್ಲಿ ಆತ್ಮಹತ್ಯೆ ಮಾಡಿ­ಕೊಂಡಿರುವವರ ಸಂಖ್ಯೆ ಸರಾಸರಿ 1.5ರಷ್ಟು ಹೆಚ್ಚಿದ್ದು, ಇವರಲ್ಲಿ 19ರಿಂದ 29 ವಯೋ­ಮಾನದವರು ಜಾಸ್ತಿ ಇದ್ದಾರೆ. ಜಾಗತಿಕವಾಗಿ ಹೇಳುವುದಿದ್ದರೆ ಶೇ.78ರಷ್ಟು ಆತ್ಮಹತ್ಯೆಗಳು ಕೆಳ ಮತ್ತು ಮಧ್ಯಮ ಆದಾಯ ವರ್ಗದಲ್ಲಿ ಹೆಚ್ಚಾಗಿವೆ ಎಂದು ವರದಿಯಲ್ಲಿ ಉಲ್ಲೇಖೀ­ಸಲಾಗಿದೆ. ಪ್ರಪಂಚದಲ್ಲಿ 40 ಸೆಕೆಂಡ್‌ಗಳಿಗೆ ಒಬ್ಬರಂತೆ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ ಎಂಬ ಮತ್ತೂಂದು ಆಘಾತಕಾರಿ ಅಂಶವನ್ನು ವಿಶ್ವ ಆರೋಗ್ಯ ಸಂಸ್ಥೆಯ ವರದಿಯಲ್ಲಿ ಪ್ರಸ್ತಾಪ ಮಾಡಲಾಗಿದೆ.