CONNECT WITH US  

ಮಾಹಿತಿ ಕೇಳಿದ್ರೆ 1435 ಪ್ರತಿಕ್ರಿಯೆ

ನವದೆಹಲಿ: ದೆಹಲಿಯ ಖಾಸಗಿ ಶಾಲೆಗಳು ವಿದ್ಯಾರ್ಥಿಗಳಿಂದ ಎಷ್ಟು ಶುಲ್ಕ ಸಂಗ್ರಹಿಸಿವೆ ಮತ್ತು ಆ ಹಣವನ್ನು ಯಾವ ಉದ್ದೇಶಗಳಿಗೆ ಬಳಸುತ್ತಿವೆ ಎಂದು ತಿಳಿದುಕೊಳ್ಳಲು ಮಾಹಿತಿ ಹಕ್ಕು ಕಾಯ್ದೆ (ಆರ್‌ಟಿಐ) ಅಡಿ ಅರ್ಜಿ ಸಲ್ಲಿಸಿದರೆ ಅದಕ್ಕೆ ಎಷ್ಟು ಪ್ರತಿಕ್ರಿಯೆಗಳು ಬರಬಹುದು? 5 ಅಥವಾ 10 ಎಂದು ಯೋಚಿಸುತ್ತಿದ್ದರೆ ನೀವು ತೀರಾ ಹಿಂದಿದ್ದೀರ. ಏಕೆಂದರೆ ಹೀಗೆ ಅರ್ಜಿ ಸಲ್ಲಿಸಿದವರಿಗೆ ಬರುಧಿವುದು ಬರೋಬ್ಬರಿ 1435 ಪ್ರತಿಕ್ರಿಯೆಗಳು!

ಹೌದು. ದೆಹಲಿ ಸರ್ಕಾರದ ಶಿಕ್ಷಣ ನಿರ್ದೇಶನಾಲಯ ಆರ್‌ಟಿಐ ಅರ್ಜಿದಾರರಿಗೆ ಹೀಗೊಂದು ಟ್ವಿಸ್ಟೆಡ್‌ ಶಾಕ್‌ ನೀಡಿದೆ. ಶಾಲೆಗಳು ಸಂಗ್ರಹಿಸಿದ ಶುಲ್ಕ ಮತ್ತು ಬಳಕೆ ಕುರಿತು ಅರ್ಜಿ ಸಲ್ಲಿಸಿದರೆ ನಿರ್ದೇಶನಾಲಯ ಆ ಅರ್ಜಿಯನ್ನು ಮೊದಲು 11 ಜಿಲ್ಲಾ ಶಿಕ್ಷಣಾಧಿಕಾರಿ ಕಚೇರಿಗಳಿಗೆ ಕಳಿಸುತ್ತದೆ. ಅವರು ಅದನ್ನು 23 ವಲಯ ಶಿಕ್ಷಣ ಕಚೇರಿಗಳಿಗೆ ರವಾನಿಸುತ್ತಾರೆ. ಅವರು ಅರ್ಜಿಯನ್ನು 1400 ಖಾಸಗಿ ಶಾಲೆಗಳಿಗೆ ರವಾನಿಸಿ, ಅರ್ಜಿದಾರರಿಗೆ ನೇರವಾಗಿ ಪ್ರತಿಕ್ರಿಯಿಸುವಂತೆ ಸೂಚಿಸುತ್ತವೆ! ಹೀಗಾಗಿ ಅರ್ಜಿದಾರರಿಗೆ ಒಟ್ಟು 1435 ಪ್ರತಿಕ್ರಿಯೆಗಳು ಸಿಗುತ್ತವೆ. ಪ್ರಸ್ತುತ ದೆಹಲಿ ಸರ್ಕಾರದ ಈ ಕ್ರಮ ಪ್ರಶ್ನಿಸಿ "ಜಸ್ಟೀಸ್‌ ಫಾರ್‌ ಆಲ್‌' ಎನ್‌ಜಿಒ ಕಾರ್ಯದರ್ಶಿ ಶಿಖಾ ಬಗ್ಗಾ ಹೈಕೋರ್ಟ್‌ ಮೆಟ್ಟಿಲೇರಿದ್ದಾರೆ.

"ಕಾಯ್ದೆಯನ್ವಯ ಎಲ್ಲ ಖಾಸಗಿ ಶಾಲೆಗಳ ಶುಲ್ಕದ ಮಾಹಿತಿ ಶಿಕ್ಷಣ ನಿರ್ದೇಶನಾಲಯದ ಬಳಿ ಇರಬೇಕು. ನಿಯಮದಂತೆ ಆರ್‌ಟಿಐ ಅರ್ಜಿಗೆ ಶಿಕ್ಷಣ ನಿರ್ದೇಶನಾಲಯವೇ ಪ್ರತಿಕ್ರಿಯಿಸಬೇಕು. ಆದರೆ, ಅರ್ಜಿದಾರರಿಗೆ ಮಾಹಿತಿ ನೀಡಬಾರದು ಎಂಬ ಉದ್ದೇಶದಿಂದಲೇ ದೆಹಲಿ ಸರ್ಕಾರ ಈ ರೀತಿ ಸುತ್ತಿ ಬಳಸಿ ನಾಟಕವಾಡುತ್ತಿದೆ,' ಎಂದು ಶಿಖಾ ಬಗ್ಗಾ ಆರೋಪಿಸಿದ್ದಾರೆ. ವಿಚಾರಣೆ ನಡೆಸಿರುವ ನ್ಯಾಯಪೀಠ, ಶುಲ್ಕ ಸಂಗ್ರಹ ಮಾಹಿತಿ ತನ್ನ ಬಳಿ ಇದೆಯೇ ಇಲ್ಲವೇ ಎಂದು ಬುಧವಾರದೊಳಗೆ ಮಾಹಿತಿ ನೀಡುವಂತೆ ಸೂಚಿಸಿದೆ.

Trending videos

Back to Top