ಶಿಮ್ಲಾ: ಸಾರಿಗೆ ನಿಗಮದ ಕಟ್ಟಡ ಕುಸಿದು ಇಬ್ಬರ ಸಾವು, ಐವರು ಗಂಭೀರ
Team Udayavani, Aug 4, 2017, 5:49 PM IST
ಶಿಮ್ಲಾ : ಇಲ್ಲಿಂದ 32 ಕಿ.ಮೀ. ದೂರದಲ್ಲಿರುವ ತೇವೋಗ್ ಎಂಬಲ್ಲಿ ಉಂಟಾಗಿರುವ ಜಡಿಮಳೆಗೆ ಹಿಮಾಚಲ ಪ್ರದೇಶ ರಸ್ತೆ ಸಾರಿಗೆ ನಿಗಮದ ಕಟ್ಟಡ ಕುಸಿದು ಸಂಭವಿಸಿದ ಭೀಕರ ದುರಂತದಲ್ಲಿ ಇಬ್ಬರು ಜೀವಂತ ಸಮಾಧಿಯಾಗಿ ಆರು ಮಂದಿ ಗಾಯಗೊಂಡಿದ್ದು ಈ ಪೈಕಿ ಐವರ ಸ್ಥಿತಿ ಚಿಂತಾಜನಕವಿದೆ ಎಂದು ವರದಿಯಾಗಿದೆ.
ಈ ದುರ್ಘಟನೆ ಇಂದು ಶುಕ್ರವಾರ ಮಧ್ಯಾಹ್ನ ಸಂಭವಿಸಿತ್ತು. ಜಡಿಮಳೆಗೆ ಎರಡು ಅಂತಸ್ತಿನ ಕಟ್ಟಡ ಕುಸಿದು ಬಿತ್ತು. ಕಟ್ಟಡದ ಒಳಗಿದ್ದವರು ಕುಸಿದ ಅವಶೇಷಗಳಡಿ ಸಿಲುಕಿಕೊಂಡರು ಎಂದು ಹೆಚ್ಚುವರಿ ಜಿಲ್ಲಾ ಮಾಜಿಸ್ಟ್ರೇಟ್ ಸುನೀಲ್ ಶರ್ಮಾ ತಿಳಿಸಿದ್ದಾರೆ.
ಕುಸಿದ ಅವಶೇಷಗಳ ಎಡೆಯಿಂದ ಮೇಲಕ್ಕೆತ್ತಲ್ಪಟ್ಟ ಎಂಟು ಮಂದಿಯಲ್ಲಿ ಇಬ್ಬರು ಸ್ಥಳದಲ್ಲೇ ಮೃತಪಟ್ಟರು. ಗಂಭೀರ ಗಾಯಾಳುಗಳಾಗಿರುವ ಐವರನ್ನು ಇಲ್ಲಿನ ಇಂದಿರಾಗಾಂಧಿ ಮೆಡಿಕಲ್ ಕಾಲೇಜ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಒಬ್ಬರನ್ನು ತೇವೋಗ್ ಆಸ್ಪತ್ರೆಗೆ ಸೇರಿಸಲಾಗಿದೆ.