ಚಂದ್ರನ ಮೇಲೆ ಇಸ್ರೋ ಗಣಿಗಾರಿಕೆ
Team Udayavani, Jun 28, 2018, 6:00 AM IST
ನವದೆಹಲಿ: ಭಾರತೀಯ ಬಾಹ್ಯಾಕಾಶ ಸಂಸ್ಥೆ ಇಸ್ರೋ, ವಿಶ್ವದ ಯಾವುದೇ ದೇಶ ಇನ್ನೂ ನಡೆಸಿಲ್ಲದ ಸಾಹಸಕ್ಕೆ ಕೈಹಾಕಿದೆ. ಚಂದ್ರನ ದಕ್ಷಿಣ ಭಾಗಕ್ಕೆ ಈ ಬಾರಿಯ ಚಂದ್ರಯಾನ ನಡೆಯಲಿದ್ದು, ನೌಕೆಯು ಕೋಟ್ಯಂತರ ರೂಪಾಯಿ ಮೌಲ್ಯದ ಇಂಧನದ ಗಣಿಗಾರಿಕೆ ಸಾಧ್ಯತೆಯ ಬಗ್ಗೆ ಅಧ್ಯಯನ ನಡೆಸಲಿದೆ. ಅಕ್ಟೋಬರ್ನಲ್ಲಿ ಇಸ್ರೋ ಗಗನ ನೌಕೆಯನ್ನು ಕಳುಹಿಸಲಿದೆ. ಈ ನೌಕೆಯು ನೀರು ಮತ್ತು ಹೀಲಿಯಂ-3 ಇದೆಯೇ ಎಂದು ಶೋಧ ನಡೆಸಲಿದೆ. ಹೀಲಿಯಂ-3 ಭೂಮಿಯಲ್ಲಿ ಅತ್ಯಂತ ಕಡಿಮೆ ಪ್ರಮಾಣದಲ್ಲಿದೆ. ಸೈದ್ಧಾಂತಿಕವಾಗಿ ಇದು ಚಂದ್ರನಲ್ಲಿ ವ್ಯಾಪಕ ಪ್ರಮಾಣದಲ್ಲಿದೆ ಎಂದು ಊಹಿಸಲಾಗಿದೆ. ಇದನ್ನು ಪಡೆಯಲು ಸಾಧ್ಯವಾದರೆ ಜಗತ್ತಿಗೆ 250 ವರ್ಷಗಳಿಗೆ ಅಗತ್ಯವಿರುವ ಇಂಧನ ಲಭಿಸಲಿದೆ.
ಈ ಇಂಧನವನ್ನು ಚಂದ್ರನಿಂದ ಭೂಮಿಗೆ ತರುವ ದೇಶವೇ ಜಗತ್ತನ್ನು ಆಳುತ್ತವೆ. ಈ ಪ್ರಕ್ರಿಯೆಯಲ್ಲಿ ನಾವು ಒಂದು ಭಾಗವಾಗಲು ಬಯಸುವುದಿಲ್ಲ. ನಾವೇ ಅದರ ನೇತೃತ್ವ ವಹಿಸಬೇಕು ಎಂದು ಇಸ್ರೋ ಮುಖ್ಯಸ್ಥ ಕೆ.ಶಿವನ್ ಹೇಳಿದ್ದಾರೆ. ನೌಕೆಯನ್ನು ಚಂದ್ರನಲ್ಲಿ ಇಳಿಸಿ ಅಧ್ಯಯನ ನಡೆಸುವುದು ಮೊದಲ ಹಂತವಾಗಿರಲಿದೆ.