ನ್ಯಾ| ರಂಜನ್ ಗೊಗೋಯ್ ಮುಂದಿನ ಸಿಜೆಐ
Team Udayavani, Sep 2, 2018, 6:00 AM IST
ಹೊಸದಿಲ್ಲಿ: ಮುಖ್ಯ ನ್ಯಾಯಮೂರ್ತಿ ದೀಪಕ್ ಮಿಶ್ರಾ ನಿವೃತ್ತಿಯ ಅನಂತರ ಮುಂದಿನ ಸಿಜೆಐ ಆಗಿ ನ್ಯಾ| ರಂಜನ್ ಗೊಗೋಯ್ ಹೆಸರೇ ಅಂತಿಮವಾಗಿದೆ. ಸಿಜೆಐ ದೀಪಕ್ ಮಿಶ್ರಾ ಅವರು ನ್ಯಾ| ಗೊಗೋಯ್ ಹೆಸರನ್ನು ಶಿಫಾರಸು ಮಾಡಿದ್ದಾರೆ ಎನ್ನಲಾಗಿದೆ. ನ್ಯಾ| ಗೊಗೋಯ್ ಅ.3ರಂದು ಪ್ರಮಾಣ ಸ್ವೀಕರಿಸಲಿದ್ದಾರೆ. ಸಿಜೆಐ ದೀಪಕ್ ಮಿಶ್ರಾ ವಿರುದ್ಧ ಜನವರಿಯಲ್ಲಿ ಪತ್ರಿಕಾಗೋಷ್ಠಿ ನಡೆಸಿದ್ದ ವರಲ್ಲಿ ಇವರೂ ಒಬ್ಬರಾಗಿದ್ದರಿಂದ ಇವರ ಹೆಸರನ್ನು ಕೈಬಿಡಬಹುದು ಎಂಬ ಸಂದೇಹಗಳಿದ್ದವು.
ಶೀಘ್ರದಲ್ಲೇ ಮಿಶ್ರಾ ಶಿಫಾರಸು ಪತ್ರವನ್ನು ಕಾನೂನು ಸಚಿವಾಲಯಕ್ಕೆ ಕಳುಹಿಸಲಿದ್ದಾರೆ. ಇತ್ತೀಚೆಗಷ್ಟೇ ಮುಂದಿನ ಸಿಜೆಐ ಯಾರಾಗಬೇಕು ಎಂಬ ಶಿಫಾರಸು ನೀಡುವಂತೆ ಮಿಶ್ರಾಗೆ ಕೇಂದ್ರ ಸರಕಾರ ಸೂಚಿಸಿತ್ತು. ಸಾಮಾನ್ಯ ನಿಯಮದ ಪ್ರಕಾರ, ಹಿರಿತನದ ಆಧಾರದಲ್ಲಿ ಮುಖ್ಯ ನ್ಯಾಯಮೂರ್ತಿ ಯನ್ನು ಆಯ್ಕೆ ಮಾಡಲಾಗುತ್ತದೆ. ಅ.2ರಂದು ದೀಪಕ್ ಮಿಶ್ರಾ ನಿವೃತ್ತರಾಗಲಿದ್ದು, ಅವರ ಅವಧಿ ಮುಗಿಯುವ ಒಂದು ತಿಂಗಳು ಮುನ್ನ ಉತ್ತರಾಧಿಕಾರಿಯ ಶಿಫಾರಸು ಮಾಡಬೇಕಿರುತ್ತದೆ.
ಅಸ್ಸಾಂ ಮೂಲದವರಾದ ಗೊಗೋಯ್ ಹಲವು ಪ್ರಮುಖ ಪ್ರಕರಣಗಳನ್ನು ನಿರ್ವಹಿಸಿದ್ದಾರೆ. ಅಸ್ಸಾಂನಲ್ಲಿ ರಾಷ್ಟ್ರೀಯ ನಾಗರಿಕ ಪಟ್ಟಿ ಸಿದ್ಧಪಡಿಸುವ ಪ್ರಕ್ರಿಯೆಯ ಉಸ್ತುವಾರಿ ವಹಿಸಿದ್ದಾರೆ. ಲೋಕಪಾಲ ಮತ್ತು ಲೋಕಾಯುಕ್ತ ನೇಮಕಾತಿ ಪ್ರಕ್ರಿಯೆ ನಿರ್ವಹಣೆಯ ನ್ಯಾಯಪೀಠದಲ್ಲೂ ಇವರಿದ್ದಾರೆ. ಜಾಹೀರಾತುಗಳಲ್ಲಿ ರಾಜಕಾರಣಿಗಳನ್ನು ಮನಬಂದಂತೆ ವೈಭವೀಕರಿಸುವುದಕ್ಕೆ ಕಡಿವಾಣ ಹಾಕಿದ್ದು ಅವರ ಉಲ್ಲೇಖಾರ್ಹ ತೀರ್ಪು.