ಪತಿ ಜತೆ ಜಗಳ; 4 ಪುಟ್ಟ ಮಕ್ಕಳಿಗೂ ಬೆಂಕಿ ಹಚ್ಚಿ, ಸಾವಿಗೆ ಶರಣಾದ ತಾಯಿ

Team Udayavani, Oct 13, 2018, 4:01 PM IST

ಲಕ್ನೋ: ಗಂಡನ ಜೊತೆ ಜಗಳವಾಡಿದ್ದರ ಪರಿಣಾಮ ಆಕ್ರೋಶಗೊಂಡ ಪತ್ನಿ, ತನ್ನ ನಾಲ್ಕು ಮಕ್ಕಳ ಕೈ, ಕಾಲು ಕಟ್ಟಿ ನಂತರ ಮಕ್ಕಳ ಮೈಮೇಲೆ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿ, ತದನಂತರ ತಾನೂ ಮೈಮೇಲೆ ಸೀಮೆಎಣ್ಣೆ ಸುರಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡ ಹೃದಯವಿದ್ರಾವಕ ಘಟನೆ ಉತ್ತರಪ್ರದೇಶದಲ್ಲಿ ನಡೆದಿದೆ.

ಇಲ್ಲಿನ ಹಮಿರ್ ಪುರ್ ಜಿಲ್ಲೆಯ ಅಮ್ಗಾವ್ ಗ್ರಾಮದ ರಾತ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದೆ. 28 ವರ್ಷದ ಪ್ರೇಮ್ ವತಿ ಅಲಿಯಾಸ್ ಸುಖೋ ತನ್ನ ಗಂಡನ ಜೊತೆ ಜಗಳ ಮಾಡಿಕೊಂಡಿದ್ದಳು. ನಂತರ ಆಕೆ 7 ವರ್ಷದ ಸಪ್ನಾ, 5 ವರ್ಷದ ಪ್ರಶಾಂತ್, 3 ವರ್ಷದ ಸ್ನೇಹಾ ಹಾಗೂ ಒಂದು ವರ್ಷದ ಪುಟ್ಟ ಮಗು ದಿವ್ಯಾಂಶ್ ಕೈ, ಕಾಲು ಕಟ್ಟಿ ಸೀಮೆಎಣ್ಣೆ ಸುರಿದು ಬೆಂಕಿಹಚ್ಚಿದ್ದಳು. ನಂತರ ತಾನೂ ಸೀಮೆಎಣ್ಣೆ ಸುರಿದುಕೊಂಡು ಬೆಂಕಿಹಚ್ಚಿಕೊಂಡಿದ್ದಳು.

ಬೆಂಕಿ ಹೊತ್ತಿಕೊಂಡ ಕೂಡಲೇ ಪುಟ್ಟ ಮಗು ದಿವ್ಯಾಂಶ್ ಸ್ಥಳದಲ್ಲಿಯೇ ಸಾವನ್ನಪ್ಪಿತ್ತು. ಸಪ್ನಾ ಸ್ಥಳೀಯ ಕಮ್ಯೂನಿಟಿ ಆರೋಗ್ಯ ಕೇಂದ್ರದಲ್ಲಿ ಕೊನೆಯುಸಿರೆಳೆದಿದ್ದಳು. ಬೆಂಕಿಯಿಂದ ಸಂಪೂರ್ಣ ಸುಟ್ಟುಹೋಗಿದ್ದ ಪ್ರೇಮ್ ವತಿ, ಪ್ರಶಾಂತ್ ಹಾಗೂ ಸ್ನೇಹಾ ಸೇರಿದಂತೆ ಮೂವರನ್ನು ಝಾನ್ಸಿ ಮೆಡಿಕಲ್ ಕಾಲೇಜ್ ನಲ್ಲಿ ಚಿಕಿತ್ಸೆ ಕೊಡಿಸುವಂತೆ ವೈದ್ಯರು ಸಲಹೆ ನೀಡಿದ್ದರು. ಆದರೆ ಪ್ರೇಮ್ ವತಿ ಮತ್ತು ಸ್ನೇಹಾ ಝಾನ್ಸಿ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದರು. 5 ವರ್ಷದ ಪ್ರಶಾಂತ್ ಮಾತ್ರ ಆಸ್ಪತ್ರೆಯಲ್ಲಿ ಸುಟ್ಟ ಗಾಯಗಳಿಂದ ಜೀವನ್ಮರಣ ಹೋರಾಟ ನಡೆಸುತ್ತಿರುವುದಾಗಿ ವರದಿ ವಿವರಿಸಿದೆ.

ಶವಗಳನ್ನು ಪೋಸ್ಟ್ ಮಾರ್ಟ್ಂಗೆ ಕಳುಹಿಸಲಾಗಿದ್ದು, ಪ್ರಕರಣದ ಬಗ್ಗೆ ತನಿಖೆ ನಡೆಸುವಂತೆ ಸೂಚನೆ ನೀಡಲಾಗಿದೆ ಎಂದು ಪೊಲೀಸ್ ವರಿಷ್ಠಾಧಿಕಾರಿಗಳು ತಿಳಿಸಿದ್ದಾರೆ.