ಉದ್ಯಮ ಸ್ನೇಹಿ ರಾಷ್ಟ್ರಗಳ ಪಟ್ಟಿ; 100ರಿಂದ 77ಕ್ಕೆ ಜಿಗಿತ ಕಂಡ ಭಾರತ
Team Udayavani, Nov 1, 2018, 8:35 AM IST
ಹೊಸದಿಲ್ಲಿ: ವಿಶ್ವಬ್ಯಾಂಕ್ ಪ್ರಕಟಿಸಿದ ಉದ್ಯಮ ಸ್ನೇಹಿ ಪಟ್ಟಿಯಲ್ಲಿ ಭಾರತ ಅಭೂತಪೂರ್ವ ಸಾಧನೆ ಮಾಡಿದೆ. ಕಳೆದ ವರ್ಷ 100ನೇ ಸ್ಥಾನದಲ್ಲಿದ್ದ ಭಾರತ ಈ ವರ್ಷ 77ಕ್ಕೆ ಏರಿಕೆ ಕಂಡಿದೆ. ಒಂದೇ ವರ್ಷದ ಅವಧಿಯಲ್ಲಿ 23 ಅಂಕ ಏರಿಕೆ ಕಂಡಂತಾಗಿದೆ. ಇದು ಚುನಾವಣೆ ಹೊಸ್ತಿಲಲ್ಲಿರುವ ನರೇಂದ್ರ ಮೋದಿ ಸರಕಾರಕ್ಕೆ ಮಹತ್ವದ ವರದಿಯಾಗಿದೆ. ಆರ್ಬಿಐ ಜೊತೆ ಆರ್ಥಿಕತೆ ಸುಧಾರಣೆ ವಿಚಾರದಲ್ಲಿ ತಿಕ್ಕಾಟಕ್ಕಿಳಿ ದಿರುವ ಮಧ್ಯೆಯೇ ಈ ವರದಿ ಬಿಡುಗಡೆಯಾಗಿದೆ. ಅಷ್ಟೇ ಅಲ್ಲ, ಉದ್ದಿಮೆ ವಿಚಾರದಲ್ಲಿ ಭಾರತ ಅಂತಾರಾಷ್ಟ್ರೀಯ ಮಾನದಂಡಗಳನ್ನು ಅಳ ವಡಿಸಿ ಕೊಳ್ಳು ತ್ತಿರುವ ದ್ಯೋತಕವೂ ಇದಾಗಿದೆ.
ಈ ವರ್ಷದಲ್ಲಿ ಗಮನಾರ್ಹ ಸುಧಾರಣೆ ಕಂಡಿರುವ 10 ದೇಶಗಳ ಪಟ್ಟಿಯಲ್ಲೂ ಭಾರತ ಸೇರಿದೆ. ಅಷ್ಟೇ ಅಲ್ಲ, ಇಷ್ಟು ಅಂಕಗಳ ಸುಧಾರಣೆ ಕಂಡಿರುವ ದೊಡ್ಡ ದೇಶಗಳ ಪೈಕಿ ಭಾರತ ಮೊದಲ ಸ್ಥಾನದಲ್ಲಿದೆ. ಕಳೆದ ವರ್ಷ ಅಂದರೆ 2017 ರಲ್ಲಿ 130 ರಿಂದ 100ಕ್ಕೆ ಏರಿಕೆ ಕಂಡಿತ್ತು. ಕಳೆದ ನಾಲ್ಕು ವರ್ಷಕ್ಕೆ ಹೋಲಿಸಿದರೆ ಉದ್ಯಮ ಸ್ನೇಹಿ ದೇಶಗಳ ಪಟ್ಟಿಯಲ್ಲಿ 65 ಸ್ಥಾನಗಳ ಸುಧಾರಣೆ ಕಂಡಿದೆ.
ದೇಶದ ಉದ್ಯಮ ಸ್ನೇಹಿ ವಾತಾವರಣದ ಬಗ್ಗೆ ಮಾನ ದಂಡ ರೂಪಿಸುವಲ್ಲಿ ಪ್ರಮುಖ 10 ಅಂಶಗಳನ್ನು ಪಟ್ಟಿ ಮಾಡ ಲಾಗಿದ್ದು, ಈ ಪೈಕಿ ಆರು ಅಂಶಗಳಲ್ಲಿ ಭಾರತ ಮಹತ್ವದ ಸುಧಾರಣೆಯನ್ನು ದಾಖಲಿಸಿದೆ. 10ರ ಪೈಕಿ 7 ಅಂಶಗಳಲ್ಲಿ ಅಂತಾರಾಷ್ಟ್ರೀಯ ಮಾನದಂಡಕ್ಕೆ ಹೋಲು ವಷ್ಟು ಉತ್ತಮ ವಾತಾವರಣವನ್ನು ರೂಪಿಸಿದೆ.
ಉದ್ಯಮ ಸ್ನೇಹಿ ದೇಶಗಳ ವಿಶ್ವ ಬ್ಯಾಂಕ್ ಪಟ್ಟಿಯಲ್ಲಿ ಭಾರತವನ್ನು 50ನೇ ಸ್ಥಾನಕ್ಕೆ ಕೊಂಡೊಯ್ಯುವ ಗುರಿಯನ್ನು ಪ್ರಧಾನಿ ನರೇಂದ್ರ ಮೋದಿ ಹೊಂದಿದ್ದಾರೆ. ಕಳೆದ ನಾಲ್ಕು ವರ್ಷಗಳಲ್ಲಿ ನಾವು ಈ ನಿಟ್ಟಿನಲ್ಲಿ ಮಹತ್ತರ ಸಾಧನೆ ಮಾಡಿದ್ದು, 77ನೇ ಸ್ಥಾನಕ್ಕೆ ಬಂದಿದ್ದೇವೆ.
ಅರುಣ್ ಜೇಟ್ಲಿ, ವಿತ್ತ ಸಚಿವ
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದಂತೆ ಭಾರತವು ತೆರಿಗೆಗಳ ರಾಜ ಅಲ್ಲ. ಇತರ ದೇಶಗಳಿಗೆ ಹೋಲಿಸಿದರೆ ಅಮೆರಿಕದ ಸಾಮಗ್ರಿಗಳ ಮೇಲೆ ಭಾರತದಲ್ಲಿ ಕಡಿಮೆ ತೆರಿಗೆ ಇದೆ.1991ರ ಕಾಲದಲ್ಲಿ ಅತಿ ಹೆಚ್ಚು ತೆರಿಗೆ ಇತ್ತು. ಆದರೆ ಆ ನಂತರ ಭಾರತ ಉದಾರವಾದಿಯಾಗಿದೆ.
ಶಾಂತ ದೇವರಾಜನ್, ವಿಶ್ವ ಬ್ಯಾಂಕ್ನ ಹಿರಿಯ ನಿರ್ದೇಶಕ